স্পেইনৰ বিশ্বজয়ৰ পিছতে কূটনৈতিক মহলত আমেৰিকা-ইৰানৰ যুদ্ধৰ প্ৰসংগ

ফিফা বিশ্বকাপ ২০২৬ৰ ফাইনেলত স্পেইনে ডিফেণ্ডিং চেম্পিয়ন আর্জেণ্টিনাক পৰাস্ত কৰি খিতাপ দখল কৰে। কিন্তু স্পেইনৰ এই জয়ক কেৱল এখন টুৰ্ণামেণ্টৰ খিতাপ জয়তেই সীমাবদ্ধ নাৰাখি, আন্তঃৰাষ্ট্ৰীয় কূটনীতিৰ দৃষ্টিৰেও চাবলৈ আৰম্ভ কৰিছে আন্তঃৰাষ্ট্ৰীয় কূটনীতিবিদসকলে। আর্জেণ্টিনাৰ ৰাষ্ট্ৰপতি জাভিয়েৰ মাইলেইৰে মুকলিকৈ ইজৰাইলক সমৰ্থন কৰাৰ বিপৰীতে স্পেইনৰ ফিলিষ্টাইন তথা ইৰানক সমৰ্থন কৰা বিভিন্ন নীতিৰ বাবে বহু বিশ্লেষকে ফিফা বিশ্বকাপৰ এই ফলাফলক আমেৰিকা আৰু ইজৰাইলৰ বাবে এক কূটনৈতিক আঘাত হিচাপে ব্যাখ্যা কৰিছে।

নেতান্যায়াহুৰ আর্জেণ্টিনাক মুকলি সৰ্মথন

বিশ্বৰ বিভিন্ন প্ৰান্তৰ সাধাৰণ নাগৰিকৰ পৰা আৰম্ভ কৰি বচা বচা বিশ্বনেতালৈ স্বাভাৱিকতে ফিফা বিশ্বকাপৰ ফাইনেলৰ ওপৰত সমগ্ৰ বিশ্বৰ দৃষ্টি থাকে। ইয়াৰ ব্যতিক্ৰম নাছিল ইজৰাইলৰ প্ৰধানমন্ত্ৰী বেঞ্জামিন নেতান্যায়াহুও। নেতান্যায়াহুৱে মুকলিভাৱেই মেচখনৰ পূৰ্বে আর্জেণ্টিনাক সমৰ্থন জনাইছিল। ইয়াৰ বিভিন্ন কাৰণৰ ভিতৰত মূল কাৰণ আছিল, আর্জেণ্টিনাৰ বৰ্তমানৰ ৰাষ্ট্ৰপতি জাভিয়েৰ মাইলেই আমেৰিকা আৰু ইজৰাইলৰ ঘনিষ্ঠ সমৰ্থক। আনহাতে, স্পেইন চৰকাৰে দীৰ্ঘদিন ধৰি ইজৰাইলৰ নীতিৰ কঠোৰ সমালোচনা কৰি আহিছে। শেহতীয়াকৈ স্পেইনে ফিলিষ্টাইনক স্বাধীন ৰাষ্ট্ৰ হিচাপে আনুষ্ঠানিক স্বীকৃতি দিছে আৰু গাজাত ইজৰাইলৰ সামৰিক অভিযানৰ তীব্ৰ বিৰোধিতা কৰিছে। সেয়ে ইজৰাইলে নিজৰ ঘনিষ্ঠ মিত্ৰ দেশ আর্জেণ্টিনাৰ জয় আশা কৰিছিল। কিন্তু নেতান্যায়াহুৰ সেই আশাত চেঁচাপানী ঢালি দুৰ্দান্ত প্ৰদৰ্শনেৰে ফিফা বিশ্বকাপত দ্বিতীয়বাৰলৈ চেম্পিয়ন হ’ল স্পেইন।

ইৰানৰ বিৰুদ্ধে সামৰিক আক্ৰমণৰ বিৰোধিতা

স্পেইনৰ অৱস্থান কেৱল ফিলিষ্টাইনৰ ক্ষেত্ৰতেই নহয়, ইৰানৰ বিষয়তো আমেৰিকা আৰু ইজৰাইলৰ নীতিৰ বিৰুদ্ধে আছিল স্পেইন। য’ত আমেৰিকা আৰু ইজৰাইলে ইৰানৰ ওপৰত কঠোৰ নিষেধাজ্ঞা আৰু প্ৰয়োজন হ’লে সামৰিক ব্যৱস্থা গ্ৰহণৰ পক্ষে মত প্ৰকাশ কৰি আহিছে, ঠিক ইয়াৰ বিপৰীতে স্পেইনে সদায় যিকোনো সামৰিক আক্ৰমণৰ বিৰোধিতা কৰি মধ্যপ্ৰাচ্যত শান্তি আৰু কূটনৈতিক আলোচনাৰ ওপৰত গুৰুত্ব আৰোপ কৰি আহিছে। স্পেইনৰ এই স্বতন্ত্ৰ নীতিয়ে বহু সময়ত আমেৰিকাৰ সৈতে মতভেদৰ সৃষ্টি কৰিছে।

স্পেইনক সমালোচনা কৰিও ট্ৰফী প্ৰদান কৰিবলৈ বাধ্য ট্ৰাম্প!

সকলোৱে জানে যে মেক্সিকো আৰু কানাডাৰ লগতে চলিত বিশ্বকাপৰ আয়োজনৰ মূল দায়িত্ব লাভ কৰিছিল আমেৰিকাই। ড’নাল্ড ট্ৰাম্পে বিভিন্ন সময়ত স্পেইনৰ বাওঁপন্থী নীতি, মধ্যপ্ৰাচ্য সম্পৰ্কীয় অৱস্থান আৰু নেটো (NATO)ৰ বাজেট বিষয়ত স্পেইনৰ সমালোচনা কৰিছিল। কিন্তু আয়োজক দেশৰ প্ৰতিনিধি হিচাপে ট্ৰাম্পে অৱশেষত নিজৰ মাটিতেই স্পেইনৰ অধিনায়ক ৰদ্ৰিৰ হাতত বিশ্বকাপৰ ট্ৰফী তুলি দিবলগীয়া হয়। বহু বিশ্লেষকৰ মতে, এই দৃশ্যই এক ধৰণৰ কূটনৈতিক অস্বস্তিৰ প্ৰতীক হিচাপে ধৰা দিছিল। সেইবাবে, এই ফাইনেলখন কেৱল দুটা শক্তিশালী ফুটবল দলৰ মাজৰ প্ৰতিযোগিতা হিচাপে নহয়, বৰঞ্চ ভিন্ন ৰাজনৈতিক দৃষ্টিভংগী আৰু কূটনৈতিক অৱস্থানৰ এক প্ৰতীকী সংঘাত হিচাপেও বহুতে মূল্যায়ন কৰিছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ