বলিউডৰ লগতে দক্ষিণ ভাৰতীয় চলচ্চিত্ৰ জগতৰো কেইবাজনো তাৰকাই দিল্লীৰ যন্তৰ-মন্তৰত চলি থকা প্ৰতিবাদ সন্দৰ্ভত নিজৰ মত প্ৰকাশ কৰিছে। শেহতীয়াকৈ তামিল ৰেপাৰ তথা কণ্ঠশিল্পী আৰিভুৱে তামিলনাডুৰ সচিবালয়ৰ সন্মুখত NEET প্ৰশ্নকাকত ফাদিল কেলেংকাৰীৰ বিৰুদ্ধে প্ৰতিবাদ সাব্যস্ত কৰিছে। ইয়াৰ পিছতে আৰিভুক তামিলনাডু আৰক্ষী আটক কৰে। অৱশ্যে পিছত তেওঁক মুকলিও কৰি দিয়া হয়। মুকলি কৰাৰ পিছতে তামিলনাডুৰ মুখ্যমন্ত্ৰী জোছেফ বিজয়ক সাক্ষাৎ কৰে তামিল কণ্ঠশিল্পীগৰাকীয়ে।
তামিল চলচ্চিত্ৰ পৰিচালকৰ সমালোচনা
ইপিনে তামিল চলচ্চিত্ৰ পৰিচালক ৰঞ্জিতে ‘ককৰোচ জনতা পাৰ্টি’ৰ নেতৃত্বত আন্দোলন কৰি থকা শিক্ষাৰ্থীসকলৰ ওপৰত আৰক্ষীয়ে কৰা লাঠীচাৰ্জৰ ঘটনাক তীব্ৰ সমালোচনা কৰিছে। শিক্ষাৰ্থী, অভিভাৱক আৰু সাধাৰণ নাগৰিকৰ সমৰ্থনত চলি থকা এই দেশজোৰা প্ৰতিবাদৰ মূল দাবী হৈছে NEET পৰীক্ষাৰ অনিয়মৰ বাবে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানক জবাবদিহি কৰিবলৈ বাধ্য কৰা আৰু তেওঁৰ পদত্যাগৰ দাবী। Xত দিয়া এক পোষ্টত পৰিচালক ৰঞ্জিতে কয় যে-আৰম্ভণিতে জবাবদিহিৰ দাবীত আৰম্ভ হোৱা এই আন্দোলন এতিয়া এক বৃহৎ গণআন্দোলনত পৰিণত হৈছে। এয়া যুৱপ্ৰজন্মৰ সামূহিক ক্ষোভৰ প্ৰতিফলন, যিয়ে লাখ লাখ শিক্ষাৰ্থীৰ ভৱিষ্যতৰ সৈতে বাৰে বাৰে খেলি থকা চৰকাৰখনৰ মুকলি মনে বিৰোধিতা কৰিছে। পৰিচালক ৰঞ্জিতে লগতে কয়-এই আন্দোলনে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধান আৰু কেন্দ্ৰ চৰকাৰৰ পৰা জবাবদিহি বিচৰা দেশবাসীৰ এক যৌথ দাবীক প্ৰতিফলিত কৰিছে। সাৰ্বজনীন শিক্ষা ব্যৱস্থাৰ বাৰে বাৰে হোৱা ব্যৰ্থতাৰ বিৰুদ্ধে এই প্ৰতিবাদ সাব্যস্ত হৈছে।
প্ৰতিবাদ সন্দৰ্ভত তামিল কণ্ঠশিল্পী আৰিভুৰ মন্তব্য
কণ্ঠশিল্পী আৰিভুৱে আন্দোলন সন্দৰ্ভত নিজৰ মতামত প্ৰকাশ কৰি কয়,-“মই তামিলনাডু সচিবালয়ৰ সন্মুখত থিয় হৈ দিল্লীত NEET পৰীক্ষা আৰু ইয়াৰ অনিয়মৰ বিৰুদ্ধে শান্তিপূৰ্ণভাৱে প্ৰতিবাদ কৰি থকা শিক্ষাৰ্থীসকলৰ ওপৰত চলি থকা হিংসা তৎক্ষণাত বন্ধ কৰিবলৈ কেন্দ্ৰ চৰকাৰক আহ্বান জনাইছোঁ। লগতে তামিলনাডু চৰকাৰকো এই প্ৰতিবাদকাৰী শিক্ষাৰ্থীসকলৰ কাষত থিয় দিবলৈ অনুৰোধ জনাইছোঁ।” কণ্ঠশিল্পীগৰাকীৰ মতে-NEET পৰীক্ষাই বহু শিক্ষাৰ্থীৰ মনত ভয় আৰু অনিশ্চয়তাৰ সৃষ্টি কৰিছে। ইয়াৰ ফলত ইতিমধ্যে বহু শিক্ষাৰ্থীয়ে জীৱন হেৰুৱাইছে আৰু এনে ঘটনা পুনৰ সংঘটিত হোৱাৰ আশংকাও আছে। এই পৰিস্থিতিয়ে শিক্ষাৰ্থীৰ মানসিক স্বাস্থ্য আৰু দেশৰ ভৱিষ্যতৰ ওপৰত গভীৰ প্ৰভাৱ পেলাইছে। সেয়ে এজন দায়িত্বশীল নাগৰিক হিচাপে তেওঁ তামিলনাডু চৰকাৰক NEET সম্পূৰ্ণৰূপে বাতিল কৰাৰ প্ৰচেষ্টা অধিক জোৰদাৰ কৰিবলৈ আহ্বান জনাইছে।
দিল্লীলৈ যাব নেকি CM জোছেফ বিজয়
তামিল ৰেপাৰ তথা কণ্ঠশিল্পী আৰিভুৰ এই প্ৰতিবাদ আৰু মুখ্যমন্ত্ৰী জোছেফ বিজয়ৰ সাক্ষাতৰ পিছতে স্বাভাৱিকতে প্ৰশ্ন উঠিছে এইবাৰ দক্ষিণৰ ছুপাৰষ্টাৰ তথা তামিলনাডুৰ মুখ্যমন্ত্ৰীজনেও দিল্লীলৈ যাব নেকি? অনুৰাগী তথা প্ৰতিবাদৰ সমৰ্থনকাৰীসকলৰ মনতো এই প্ৰশ্নটো উদয় হৈছে যে আন কেইবাটাও ৰাজনৈতিক নেতাৰ দৰে CM বিজয়েও দিল্লীলৈ গৈ কক্ৰোচ জনতা পাৰ্টীৰ আন্দোলনত ভাগ ল’ব নেকি? অৱশ্যে এই সন্দৰ্ভত কোনো আনুষ্ঠানিকতা প্ৰকাশ কৰা নাই তামিলনাডুৰ মুখ্যমন্ত্ৰীৰ কাৰ্যালয়ে। সমান্তৰালভাৱে ৰাজনৈতিক বিশেষজ্ঞসকলে বিজয় থালাপতিয়ে দিল্লীত হৈ থকা আন্দোলনত অংশগ্ৰহণৰ সম্ভাৱনাক নুই কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
