NEET পেপাৰ লীক কেলেংকাৰীত কেৱল ধৰ্মেন্দ্ৰ প্ৰধানেই নহয় কেন্দ্ৰীয় শিক্ষামন্ত্ৰীগৰাকীৰ কন্যা নৈমিষা প্ৰধানো ব্যাপক সমালোচনাৰ সন্মুখীন হৈছে। CJPৰ প্ৰতিবাদ আৰম্ভ হোৱাৰে পৰা ছচিয়েল মিডিয়াত নৈমিষা প্ৰধান প্ৰতিবাদকাৰীসকলৰ টাৰ্গেটত আছিল। নৈমিষাই বিদেশত শিক্ষা গ্ৰহণ কৰাৰ বাবে প্ৰতিবাদকাৰীৰ তীব্ৰ সমালোচনাৰ সন্মুখীন হৈছিল।
আমেৰিকাত LLM সম্পূৰ্ণ কৰিছিল নৈমিষাই
উল্লেখ্য যে, নৈমিষাই আমেৰিকাৰ মেছাচুচেটছৰ এখন বিশ্ববিদ্যালয়ৰ পৰা আইন বিষয়ত স্নাতকোত্তৰ ডিগ্ৰী সম্পূৰ্ণ কৰিছিল। ইনষ্টাগ্ৰামত বহু ব্যৱহাৰকাৰীয়ে ভিডিঅ’ আৰু পোষ্টৰ জৰিয়তে নৈমিষাৰ বিদেশত শিক্ষা গ্ৰহণ কৰাৰ বিষয়টোক লৈ প্ৰশ্ন উত্থাপন কৰিছে আৰু তেওঁৰ পিতৃ ধৰ্মেন্দ্ৰ প্ৰধানৰ পদত্যাগ দাবী কৰিছে। কিছুমান ব্যৱহাৰকাৰীয়ে নৈমিষাই ইনষ্টাগ্ৰামত কৰা বিশ্ববিদ্যালয়ৰ পোষ্টসমূহত “ধৰ্মেন্দ্ৰ প্ৰধান পদত্যাগ কৰক” আদি শ্ল’গানৰে মন্তব্য কৰাৰ লগতে তেওঁক শিক্ষা প্ৰতিষ্ঠানখনৰ পৰা নিলম্বন কৰাৰ দাবীও জনাইছে। সংবাদ মাধ্যমৰ তথ্য অনুসৰি, নৈমিষাই ২০২৩ চনতেই LLM ডিগ্ৰী সম্পূৰ্ণ কৰিছিল।
‘দেশৰ শিক্ষা ব্যৱস্থাৰ ওপৰত আস্থা নাই’
নৈমিষাক টেগ কৰি এজন ইনষ্টাগ্ৰাম ব্যৱহাৰকাৰীয়ে লিখিছে-দেশৰ শিক্ষা ব্যৱস্থাৰ ওপৰত আস্থা নথকাৰ বাবেই শিক্ষামন্ত্ৰীৰ কন্যাই বিদেশত পঢ়িবলৈ গৈছিল। পোষ্টটোত কোৱা হৈছে, “আপুনি বিদেশত পঢ়িবলৈ গৈছে কাৰণ আপুনি সেই কথাটো জানে, যিটো লাখ লাখ ভাৰতীয় শিক্ষাৰ্থীয়ে আগতেই বুজি পাইছে। আমাৰ শিক্ষা ব্যৱস্থাই তেওঁলোকক হতাশ কৰিছে।” লগতে কোৱা হৈছে যে,-যদি আন শিক্ষাৰ্থীসকলৰ হাততো একে ধৰণৰ সুবিধা আৰু ধন থাকিলেহেঁতেন, তেন্তে তেওঁলোকেও বিদেশলৈ পঢ়িবলৈ গ’লহেঁতেন।
নৈমিষাই ইনষ্টাগ্ৰামৰ পৰা আঁতৰালে নিজৰ একাউণ্ট
আন্দোলন আৰম্ভ হোৱাৰে পৰা ব্যাপকভাৱে সমালোচনাৰ সন্মুখীন হৈছে শিক্ষামন্ত্ৰী ধৰ্মেন্দ্ৰ প্ৰধানৰ কন্যা নৈমিষা প্ৰধান। আন্দোলনকাৰীয়ে নৈমিষাৰ বিভিন্ন পোষ্টত ধৰ্মেন্দ্ৰ প্ৰধানক সমালোচনা কৰাৰ উপৰিও নৈমিষাকো আক্ৰমণৰ লক্ষ্য কৰি লোৱা দেখা গৈছে। শেষত উপায়ন্তৰবিহীন হৈ নৈমষাই ইনষ্টাগ্ৰামত থকা নিজৰ একাউণ্টটো আঁতৰাই দিবলৈ বাধ্য হোৱা দেখা গৈছে। ইপিনে বহুতে মত প্ৰকাশ কৰিছে যে এই বিষয়টোত কেৱল ধৰ্মেন্দ্ৰ প্ৰধানকেই জবাবদিহিতাৰ আওতালৈ অনা উচিত, তেওঁৰ পৰিয়ালৰ সদস্যসকলক ইয়াত জড়িত কৰা উচিত নহয়। এজন ব্যৱহাৰকাৰীয়ে লিখিছে, “পৰিয়ালৰ কোনো সদস্যক এই বিতৰ্কত টানি অনাটো উচিত নহয়, বিশেষকৈ যিজন সিদ্ধান্ত গ্ৰহণৰ অংশ নহয়। জবাবদিহিতা পদত থকা ব্যক্তিৰ পৰাই বিচাৰিব লাগে।”
ধৰ্মেন্দ্ৰ প্ৰধানৰ প্ৰতিক্ৰিয়া
ইফালে, যন্তৰ-মন্তৰত CJPৰ প্ৰতিবাদ সন্দৰ্ভত প্ৰথমবাৰৰ বাবে প্ৰতিক্ৰিয়া প্ৰকাশ কৰি কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে কংগ্ৰেছ আৰু লোকসভাৰ বিৰোধী দলপতি ৰাহুল গান্ধীক তীব্ৰ সমালোচনা কৰে। তেওঁ লগতে কয় যে, চৰকাৰে সংসদত NEET আৰু যুৱসমাজৰ উদ্বেগ-সম্পৰ্কীয় বিষয়সমূহৰ ওপৰত আলোচনা কৰিবলৈ সম্পূৰ্ণ সাজু আছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
