প্ৰথম স্বামীৰে মিলি দ্বিতীয় স্বামীক হ*ত্যা

প্ৰায় এবছৰ পূৰ্বে সংঘটিত এটি লোমহৰ্ষক হ*ত্যাকাণ্ডৰ ৰহস্য শেহতীয়াকৈ আৰক্ষীয়ে ভেদ কৰিবলৈ সক্ষম হৈছে। এই হ*ত্যাকাণ্ডটো সংঘটিত হৈছিল মধ্য প্ৰদেশৰ পন্না জিলাত। আৰক্ষীয়ে শেহতীয়াকৈ সদৰী কৰা অনুসৰি প্ৰায় এবছৰ পূৰ্বে হ*ত্যাৰ বলি হোৱা মৃ*ত নন্নু ছোনীৰ পত্নী অৰ্চনা ছোনীয়ে নিজৰ প্ৰথম স্বামী ৰামপ্ৰতাপ ছোনীৰ সৈতে মিলি সম্পত্তি-সংক্ৰান্ত বিবাদৰ বাবে এই হ*ত্যাকাণ্ডৰ ষড়যন্ত্ৰ ৰচিছিল। হ*ত্যাৰ পিছত দুই অভিযুক্তই বেশ সলাই ৮খন ৰাজ্যত আত্মগোপন কৰি আছিল। অৱশেষত গুজৰাটৰ ছুৰাটৰ পৰা আৰক্ষীয়ে দুয়োকে গ্ৰেপ্তাৰ কৰে।

দুবাৰকৈ বিৱাহপাশত আৱদ্ধ হৈছিল হ*ত্যাকাৰী অৰ্চনা

ঘটনা সন্দৰ্ভত আৰক্ষীয়ে সদৰী কৰা অনুসৰি, অজয়গড় থানাৰ অন্তৰ্গত বগহা গাঁৱৰ বাসিন্দা ৰামপ্ৰতাপ ছোনী আৰু অৰ্চনাৰ প্ৰায় ৮–৯ বছৰ পূৰ্বে বিৱাহ সম্পন্ন হৈছিল। তেওঁলোকৰ দুটা সন্তানো আছে। কিন্তু পাৰিবাৰিক বিবাদৰ পিছত অৰ্চনাই পিতৃগৃহত থাকিবলৈ লয়। ইয়াৰ পিছত ২৭ মে’ ২০২৫ তাৰিখে অৰ্চনাই ৰৈপুৰাৰ বাসিন্দা নন্নু ছোনীৰ সৈতে আদালতৰ জৰিয়তে দ্বিতীয়বাৰৰ বাবে বিৱাহপাশত হয় আৰু দুই সন্তানক লগত লৈ নন্নুৰ ঘৰত থাকিবলৈ আৰম্ভ কৰে। কিন্তু দ্বিতীয় বিৱাহতো অৰ্চনাৰ বিবাদ আৰম্ভ হয়। বিৱাহৰ কিছুদিনৰ পিছতেই স্বামী-স্ত্ৰীৰ মাজত মতানৈক্য আৰম্ভ হয়। আৰক্ষীৰ তথ্য অনুসৰি, অৰ্চনাই বিচাৰিছিল যে নন্নুৱে নিজৰ মাটি-সম্পত্তি তেওঁৰ দুয়ো পুত্ৰৰ নামত লিখি দিয়ক। কিন্তু নন্নুৱে অৰ্চনাৰ পূৰ্বৰ স্বামীৰ পৰা পোৱা সন্তানৰ নামত নিজৰ সম্পত্তি অৰ্পণ কৰিবলৈ বিচৰা নাছিল । ইয়াকে লৈ কন্দল বাঢ়ি যোৱাৰ পিছত অৰ্চনাই নিজৰ প্ৰথম স্বামী ৰামপ্ৰতাপৰ সৈতে পুনৰ যোগাযোগ কৰে আৰু দুয়ো মিলি নন্নুক হ*ত্যাৰ পৰিকল্পনা কৰে।

কেনেকৈ দ্বিতীয় স্বামীক হ*ত্যা কৰিছিল অৰ্চনাই

আৰক্ষীয়ে সদৰী কৰা অনুসৰি, ১০ জুলাই ২০২৫ৰ নিশা প্ৰথম স্বামী ৰামপ্ৰতাপৰ সৈতে মিলি অৰ্চনাই দ্বিতীয় স্বামী নন্নুক নিজৰ কোঠাত শুই থকা অৱস্থাত লাঠিৰে মূৰত একাধিকবাৰ আঘাত কৰে। গুৰুতৰ আঘাতৰ ফলত ঘটনাস্থলীতেই নন্নুৰ মৃ*ত্যু হয়। এই হ*ত্যাকাণ্ডৰ পিছতে সন্তানক লগত লৈ দুই অভিযুক্তই পলায়ন কৰে।

৮খন ৰাজ্যত বেশ সলাই কৰিছিল আত্মগোপন

হ*ত্যাৰ পিছতে অভিযুক্তদ্বয়ে নিজৰ চেহেৰা, মোবাইল নম্বৰ আৰু বাসস্থান সঘনাই সলাই আৰক্ষীক ফাঁকি দি আছিল। তেওঁলোকক বিচাৰি আৰক্ষীয়ে মধ্য প্ৰদেশ, উত্তৰ প্ৰদেশ, হাৰিয়ানা, ৰাজস্থান, মহাৰাষ্ট্ৰ, দিল্লী, ছত্তীশগড় আৰু গুজৰাটকে ধৰি একাধিক ৰাজ্যত অভিযান চলায়। দীঘলীয়া অনুসন্ধানৰ পিছত চাইবাৰ চেল আৰু গোপন সূত্ৰৰ সহায়ত গুজৰাটৰ ছুৰাটৰ কাপোদৰা অঞ্চলত তেওঁলোকৰ অৱস্থান নিশ্চিত হয়। তাৰ পিছত আৰক্ষীয়ে দুয়োকে গ্ৰেপ্তাৰ কৰে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ