ৰণবীৰ সিঙে অভিনয় কৰা ব্লকবাষ্টাৰ ছবি ‘ধুৰন্ধৰ’ৰ ‘শ্বৰাৰত’ শীৰ্ষক গীতটোত অভিনয় কৰা অভিনেত্ৰী আয়শা খানক মুম্বাই আৰক্ষীয়ে আটক কৰিছে। এই কথা সদৰী কৰি আয়শাই নিজেই ইনষ্টাগ্ৰামত ভিডিঅ’ শ্বেয়াৰ কৰিছে। এটা ভিডিঅ’ত তেওঁ আৰক্ষী থানাত আটকাধীন অৱস্থাতেই সমগ্ৰ ঘটনাটোৰ বিষয়ে বিস্তাৰিতভাৱে বৰ্ণনা কৰিছে। আন এটা ভিডিঅ’ত দেখা যায়, জোৰ-জবৰদস্তিৰে তেওঁক আটক কৰি এখন আৰক্ষীৰ ভেনত উঠাই লৈ যোৱাৰ দৃশ্য। আয়শাই বন্ধু আৰু ভাতৃৰ সৈতে মুম্বাইৰ দাদৰলৈ গৈছিল। NEET পেপাৰ লীক কেলেংকাৰী আৰু দিল্লীত ছাত্ৰ-ছাত্ৰীসকলৰ ওপৰত হোৱা লাঠিচাৰ্জৰ প্ৰতিবাদত আয়োজিত এক প্ৰতিবাদী কাৰ্যসূচীত অংশ লোৱাৰ উদ্দেশ্যে তেওঁলোক গৈছিল।
অভিনেত্ৰীগৰাকীয়ে শ্বেয়াৰ কৰা ভিডিঅ’টোৰ কেপচনত তেওঁ প্ৰশ্ন কৰিছে— “ৰাস্তাত থিয় হৈ থকাটো কেতিয়াৰ পৰা অপৰাধ হ’ল?” ভিডিঅ’টোত দেখা অনুসৰি আৰক্ষীয়ে আয়েশাক জোৰকৈ ভেনত উঠাবলৈ চেষ্টা কৰাৰ দৃশ্য দেখা গৈছে। আয়শাই বাৰে বাৰে সুধিছে যে তেওঁক কিয় আটক কৰা হৈছে। তেওঁৰ কেইবাজনো বন্ধুৱেও ইয়াৰ বিৰোধিতা কৰে। আয়শাই কাৰণ সোধাত এজন সাধাৰণ পোছাক পিন্ধা ব্যক্তিয়ে কয় যে, “ইয়াত ধাৰা ১৪৪ জাৰি আছে, আপুনি ইয়াত থাকিব নোৱাৰে।”
প্ৰকৃততে কি হৈছিল?
আনহাতে ৱৰ্লী আৰক্ষী থানাৰ পৰা শ্বেয়াৰ কৰা এটা ভিডিঅ’ত আয়শাই কয়, “মই এতিয়া ৱৰ্লী আৰক্ষী থানাত আছোঁ। আমি NEETৰ ছাত্ৰ-ছাত্ৰীসকলৰ সমৰ্থনত দাদৰত সন্ধিয়া ৪ বজাত হ’বলগীয়া প্ৰতিবাদত অংশ ল’ব বিচাৰিছিলোঁ। আমি মাত্ৰ ঘটনাস্থলীত উপস্থিত হৈ ৰাস্তাত থিয় হৈছিলোঁ। আমি তেতিয়াও কোনো প্ৰতিবাদ আৰম্ভ কৰা নাছিলোঁ, কোনো শ্ল’গান দিয়া নাছিলোঁ। ঠিক সেই সময়তে এজন আৰক্ষী বিষয়াই আহি ক’লে যে আমি প্ৰতিবাদ কৰিব নোৱাৰোঁ। আমি ক’লোঁ— ‘ঠিক আছে ছাৰ, তেন্তে আন কি উপায় আছে সেয়া কওক।’ কিন্তু কথাবাৰ্তা আগবঢ়োৱাৰ আগতেই তেওঁ মোৰ ভাই আৰু বন্ধু-বান্ধৱক আৰক্ষীৰ ভেনত উঠাই লৈ গ’ল। তেওঁলোকক লৈ যোৱাৰ পিছত মই একেবাৰে বিভ্ৰান্ত হৈ পৰিছিলোঁ। এই অঞ্চললৈ মই আগতে কেতিয়াও অহা নাছিলোঁ, সেয়ে কি কৰিম বা ক’লৈ যাম বুজি পোৱা নাছিলোঁ।”
আৰক্ষীৰ বিৰুদ্ধে আয়শাৰ অভিযোগ
আয়শাই আৰু কয়, “মই আৰু মোৰ দুজন বন্ধু তাত মাত্ৰ থিয় হৈ আছিলোঁ। সেই সময়ত প্ৰায় ১৫-২০ জন আৰক্ষী আহিল। তাৰে প্ৰায় ১০ জন পুৰুষ আৰু ৫ গৰাকী মহিলা আৰক্ষী আছিল। তেওঁলোকে আমাকো জোৰকৈ আৰক্ষীৰ ভেনত উঠাবলৈ ধৰিলে। মই বাৰে বাৰে সুধিছিলোঁ— ‘আমাক কিয় ভেনত উঠোৱা হৈছে? আমি কেৱল ৰাস্তাত থিয় হৈ আছিলোঁ।’ কিন্তু মোৰ কোনো প্ৰশ্নৰ উত্তৰ আৰক্ষীয়ে নিদিলে। শেষত চাৰি-পাঁচগৰাকী মহিলা আৰক্ষীয়ে মোক টানি ভেনত উঠাই দিলে।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
