অসমৰ শেহতীয়া ভয়ংকৰ বানপানীয়ে ৰাজ্যখনৰ লাখ লাখ মানুহৰ জীৱন-জীৱিকা বিপৰ্যস্ত কৰি তুলিছে। বিস্তীৰ্ণ অঞ্চল জলমগ্ন হোৱাৰ ফলত বহু পৰিয়ালে বাসস্থান হেৰুৱোৱাৰ লগতে কৃষিভূমি, পশুধন আৰু দৈনন্দিন জীৱনৰ ওপৰত গভীৰ প্ৰভাৱ পৰিছে। এই দুৰ্যোগৰ সময়ত ৰাজ্য চৰকাৰ, বিভিন্ন স্বেচ্ছাসেৱী সংগঠনৰ লগতে দেশৰ বহু বিশিষ্ট ব্যক্তিত্বই বানাক্ৰান্তসকলৰ সহায়ত আগবাঢ়ি আহিছে।
উদ্যোগী তথা সমাজসেৱী অনন্যা বিৰলাই অসমৰ বানপীড়িতসকলৰ সহায়ৰ বাবে কেৱল আৰ্থিক সাহায্য আগবঢ়োৱাই নহয়, তেওঁ সামাজিক মাধ্যমৰ জৰিয়তে সমগ্ৰ দেশৰ ৰাইজকো বানাক্ৰান্তসকলৰ সহায়ৰ বাবে আগবাঢ়ি আহিবলৈ আহ্বান জনায়।
কেৱল টেলিভিশ্যন বা ছচিয়েল মিডিয়াযোগে বানাক্ৰান্তৰ খবৰ লোৱাই নহয় অনন্যা বিৰলাই বানাক্ৰান্তসকলৰ দুখ আৰু দুৰ্দশা উপলব্ধি কৰিবলৈ শিৱসাগৰ, চৰাইদেউৰ বন্যাৰ্তসকলৰ কাষতো উপস্থিত হয়। তেওঁৰ মতে, দুৰ্যোগৰ সময়ত একত্ৰিত মানৱীয় প্ৰচেষ্টাইহে অসহায় লোকসকলক নতুনকৈ জীৱন আৰম্ভ কৰাৰ শক্তি দিব পাৰে।
আনহাতে, বলীউডৰ জনপ্ৰিয় অভিনেতা কাৰ্তিক আৰিয়ানে অসমৰ বানপীড়িতসকলৰ বাবে ১ কোটি টকাৰ সাহায্য আগবঢ়াইছে। মুখ্যমন্ত্ৰীৰ সাহায্য পুঁজিলৈ ইতিমধ্যে অভিনেতাজনে এই ধন প্ৰেৰণ কৰিছে।
অভিনেতাজনৰ এই পদক্ষেপে মানৱীয় দায়বদ্ধতাৰ এক উজ্জ্বল নিদৰ্শন দাঙি ধৰে। তেওঁৰ এই সহায়ৰ খবৰে ৰাজ্যবাসীৰ মাজত আশাৰ সঞ্চাৰ কৰাৰ লগতে দেশৰ বিভিন্ন প্ৰান্তৰ অন্য বহু লোকো সাহায্যৰ বাবে উৎসাহিত কৰিছে।
ইফালে, বিহাৰৰ বিধায়ক তথা প্ৰাক্তন আইপিএছ বিষয়া আনন্দ মিশ্ৰয়ো অসমৰ দুৰ্যোগৰ সময়ত সহানুভূতিৰ হাত আগবঢ়াইছে। তেওঁ নিজৰ এমাহৰ দৰমহা অসমৰ বানাক্ৰান্ত ৰাইজৰ সাহায্যৰ বাবে প্ৰেৰণ কৰাৰ কথা সদৰী কৰে।
অসমৰ পৰিৱেশৰ লগত চিনাকি পূৰ্বৰ IPS বিষয়াজনে সামাজিক মাধ্যমযোগে ২ লাখ টকাৰ আৰ্থিক সাহায্য আগবঢ়োৱাৰ কথা ঘোষণা কৰে। অসমৰ সৈতে তেওঁৰ আত্মিক সম্পৰ্কৰ কথা উল্লেখ কৰি আনন্দ মিশ্ৰই কয় যে, দুৰ্যোগৰ এই সময়ত অসমৰ জনসাধাৰণৰ কাষত থিয় দিয়াটো তেওঁৰ নৈতিক দায়িত্ব।
বানৰ দৰে ভয়ংকৰ প্ৰাকৃতিক দুৰ্যোগৰ সময়ত এনে মানৱীয় পদক্ষেপে কেৱল আৰ্থিক সহায়েই আগবঢ়োৱা নহয়, বিপদৰ সন্মুখীন হোৱা হাজাৰ হাজাৰ পৰিয়ালক নতুন আশাও প্ৰদান কৰে। অনন্যা বিৰলা, কাৰ্তিক আৰিয়ান আৰু আনন্দ মিশ্ৰৰ দৰে ব্যক্তিত্বৰ এই সহায় আৰু ৰাইজলৈ জনোৱা আহ্বানে সমাজৰ আন বহু লোককো সহায়ৰ হাত আগবঢ়াবলৈ অনুপ্ৰাণিত কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
