বলীউডৰ অভিনেত্ৰী কিয়াৰা আদৱানীক আগন্তুক ছবি “টক্সিক”ত দেখা যাব। ছবিখনৰ টিজাৰত কিয়াৰা আদৱানীক দেখাৰ পিছৰে পৰা ছবিখনৰ অন্তৰংগ দৃশ্য সন্দৰ্ভত বহু ট্ৰ’লিঙৰ সন্মুখীন হ’বলগীয়া হৈছে অভিনেত্ৰীগৰাকী। বেংগালুৰুত ছবিখনৰ গ্ৰেণ্ড ট্ৰেইলাৰ লঞ্চৰ সময়ত ট্ৰলিঙৰ বিৰোধিতা কৰি অভিনেতা য়শে কিয়াৰাৰ পক্ষ লয়। বেংগালুৰুৰ এটা মলত টক্সিকৰ ট্ৰেইলাৰ মুকলি অনুষ্ঠান অনুষ্ঠিত হয়। অনুষ্ঠানৰ সময়ত য়শে মঞ্চত উঠি সহ অভিনেতাসকলৰ বিষয়ে কয়। কিয়াৰা আদৱানীক প্ৰশংসা কৰি য়শে কয় যে ট্ৰেইলাৰত তেওঁৰ চৰিত্ৰৰ সামান্য আভাসহে দেখা গৈছে।
টক্সিকৰ অভিনেতা য়শে কয়, “এই ছবিখনত কিয়াৰাই অভিনয় কৰা চৰিত্ৰটোৰ মাত্ৰ সামান্য আভাসহে ট্ৰেইলাৰতহে পোৱা গৈছে। কিয়াৰা নিজৰ কামৰ প্ৰতি অতি নিষ্ঠাবান। মই দেখিছো যে তেওঁ এই ছবিখনত কিমান কষ্ট কৰিছে। প্ৰথম অৱস্থাত আমি সকলোৱে ভাবিছিলো যে ইমানবোৰ অভিনেতা একেলগে থাকিলে বহু সমস্যাৰ সৃষ্টি হ’ব। কিন্তু কিয়াৰা আৰম্ভণিৰে পৰাই অতি ডাউন-টু-আৰ্থ আছিল আৰু ছবিখনৰ দৃষ্টিভংগীৰ প্ৰতি নিজকে সম্পূৰ্ণৰূপে উৎসৰ্গা কৰিছিল।”
টক্সিক ছবিখনত কিয়াৰা আদৱানীয়ে চাৰ্কাছৰ নাদিয়াৰ চৰিত্ৰত অভিনয় কৰিছে। ছবিখনৰ টিজাৰ আৰু গীত “তাবাহী”ত কিয়াৰা আৰু য়শৰ চৰিত্ৰৰ মাজত ৰোমাঞ্চ আৰু কিছু অন্তৰংগ দৃশ্যই দৰ্শকৰ দৃষ্টি আকৰ্ষণ কৰিছিল। পৰৱৰ্তী সময়ত এই দৃশ্যসমূহৰ বাবে ছ’চিয়েল মিডিয়াত কিয়াৰাক ব্যাপকভাৱে ট্ৰ’ল কৰা হৈছিল।
ট্ৰেইলাৰ মুকলিৰ সময়ত য়শে কাৰো নাম নোলোৱাকৈয়ে ট্ৰ’ল সন্দৰ্ভত মন্তব্য আগবঢ়ায়। তেওঁ কিয়াৰাক সমৰ্থন কৰি কয় যে অভিনেত্ৰীগৰাকীয়ে যি ভাল বুলি বিশ্বাস কৰে সেয়াহে কৰিছে। য়শে আৰু কয়, “এগৰাকী অভিনেত্ৰী হিচাপে আপুনি যিয়েই নকৰক কিয়, সেয়া চৰিত্ৰ আৰু কাহিনীৰহে দাবী, গতিকে এই ট্ৰলসমূহৰ প্ৰতি গুৰুত্ব দিয়া উচিত নহয়। আপুনি যি উপযুক্ত বুলি বিশ্বাস কৰে তাকেই কৰক। মানুহে আপোনাৰ কামৰ শলাগ ল’ব।”
‘টক্সিক’ গীতু মহন দাসৰ পৰিচালনাত নিৰ্মিত এখন প্যান ইণ্ডিয়া একচন থ্ৰিলাৰ ছবি। য়শ আৰু কিয়াৰা আদৱানীৰ উপৰিও ছবিখনত নয়ন্তৰা, তাৰা সুতাৰিয়া, ৰুক্মিণী বসন্ত আৰু হুমা কুৰেশ্বীয়েও গুৰুত্বপূৰ্ণ চৰিত্ৰত অভিনয় কৰিছে। নতুনকৈ মুক্তি পোৱা ট্ৰেইলাৰটোত য়শক দুটা চৰিত্ৰত দেখা গৈছে, পিতৃ-পুত্ৰ উভয়ৰে চৰিত্ৰত অভিনয় কৰিছে। অহা ২৬ আগষ্টত বিশ্বজুৰি ছবিগৃহত মুক্তি পাব ছবিখন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
