APP ভিত্তিক কেব সেৱা ব্যৱহাৰ কৰা যাত্ৰীসকলৰ বাবে গুৰুত্বপূৰ্ণ খবৰ। এতিয়াৰে পৰা Ola, Uber, Rapidoৰ দৰে ৰাইড-হেলিং প্লেটফৰ্মত যাত্ৰা বুক কৰাৰ সময়ত ৰাইডাৰে গ্ৰাহকৰ পৰা অতিৰিক্ত ধন বিচাৰিব নোৱাৰিব। কেন্দ্ৰীয় পথ পৰিবহণ আৰু ঘাইপথ মন্ত্ৰালয়ে এই ক্ষেত্ৰত কঠোৰ নিৰ্দেশ জাৰি কৰিছে।
শেহতীয়াকৈ কেব বুক কৰাৰ সময়ত কিছুমান এপত ‘Advance Tip’, ‘Add-on’ আদিৰ গইনাৰে যাত্ৰীক মূল ভাড়াৰ উপৰি অতিৰিক্ত ধন দিবলৈ উৎসাহিত কৰা বা দাবী কৰা হৈছিল। APP বা ৰাইডাৰৰ এই ব্যৱস্থাৰ বিৰুদ্ধে কেন্দ্ৰই তীব্ৰ আপত্তি দৰ্শাইছে। মন্ত্ৰালয়ে স্পষ্ট কৰিছে যে যাত্ৰা সম্পূৰ্ণ হোৱাৰ আগলৈকে টিপ বা অতিৰিক্ত পেমেণ্টৰ বাবে কোনো prompt, message, add-on, payment option বা user-interface element দেখুৱাব নোৱাৰিব।
কেন্দ্ৰৰ নিৰ্দেশনাত উল্লেখ কৰা অনুসৰি টিপ সম্পূৰ্ণ স্বেচ্ছামূলক হ’ব আৰু যাত্ৰা শেষ হোৱাৰ পিছতহে সেই সুবিধা আগবঢ়াব পাৰিব, সেয়া নিৰ্ভৰ কৰিব একমাত্ৰ যাত্ৰীৰ ইচ্ছাৰ ওপৰত। অৰ্থাৎ যাত্ৰীগৰাকীয়ে সেৱা কেনেকুৱা পালে সেই অভিজ্ঞতাৰ ভিত্তিত ইচ্ছা কৰিলে ড্ৰাইভাৰক অতিৰিক্ত টকা দিব পাৰিব। বুকিং কৰাৰ সময়ত বা যাত্ৰা চলি থকাৰ সময়ত টিপ দি ৰাইড লাভ কৰাৰ সুবিধা সৃষ্টি কৰিব নোৱাৰিব।
ইয়াত এটা গুৰুত্বপূৰ্ণ পাৰ্থক্য বুজি লোৱা প্ৰয়োজন। কেন্দ্ৰীয় চৰকাৰৰ শেহতীয়া নিৰ্দেশটো মূলতঃ ‘Advance Tip’ বা যাত্ৰা সম্পূৰ্ণ হোৱাৰ আগতে টিপ বিচৰা ব্যৱস্থাৰ বিৰুদ্ধে; ১০টকা, ২০টকা বা তেনে কোনো অতিৰিক্ত ভাড়া দিলে ৰাইড নিশ্চিত হ’ব—এনে নিৰ্দিষ্ট নতুন নিষেধাজ্ঞা এই নিৰ্দেশৰ মূল বিষয় নহয়। অৱশ্যে কোনো ড্ৰাইভাৰে এপত দেখুওৱা ভাড়াত ৰাইড নলৈ যাত্ৰীক ব্যক্তিগতভাৱে অধিক ধন বিচৰা বা অতিৰিক্ত ধন নিদিলে ৰাইড বাতিল কৰা বিষয়টো পৃথক অভিযোগ হিচাপে গণ্য হ’ব পাৰে। এনে ক্ষেত্ৰত যাত্ৰীসকলে এপৰ ভিতৰত অভিযোগ দাখিল কৰা আৰু বুকিঙৰ ভাড়া, ড্ৰাইভাৰৰ বাৰ্তা আদি প্ৰমাণ হিচাপে সংৰক্ষণ কৰা উচিত।
Motor Vehicle Aggregator Guidelines 2025-এ কি কয়?
কেন্দ্ৰীয় চৰকাৰে ২০২৫ চনত Motor Vehicle Aggregator Guidelines সংশোধন কৰি এপভিত্তিক কেব সেৱাৰ বাবে নতুন নিয়ম প্ৰৱৰ্তন কৰিছিল। এই নিয়মত ভাড়াৰ ক্ষেত্ৰতো নিৰ্দিষ্ট সীমা নিৰ্ধাৰণ কৰা হৈছে। গাইডলাইন অনুসৰি ৰাজ্য চৰকাৰে নিৰ্ধাৰণ কৰা ভাড়াই base fare হিচাপে কাম কৰিব। Aggregator-এ সাধাৰণ সময়ত base fare-ৰ ৫০ শতাংশ পৰ্যন্ত কম ভাড়া ল’ব পাৰে, আনহাতে peak demand-ৰ সময়ত dynamic pricing-ৰ জৰিয়তে সৰ্বাধিক base fare-ৰ দুগুণ পৰ্যন্ত ভাড়া ল’ব পাৰে। অৰ্থাৎ, ‘surge pricing’ সম্পূৰ্ণৰূপে নিষিদ্ধ কৰা হোৱা নাই। কিন্তু ভাড়া নিৰ্ধাৰণৰ ক্ষেত্ৰত নিৰ্দিষ্ট সীমা আৰু স্বচ্ছতা বজাই ৰখাৰ ব্যৱস্থা কৰা হৈছে।
ড্ৰাইভাৰে ৰাইড বাতিল কৰিলে কি হ’ব?
নতুন গাইডলাইনত ড্ৰাইভাৰ আৰু যাত্ৰী—দুয়োপক্ষৰ বাবে cancellation rule আছে। কোনো বৈধ কাৰণ নথকাকৈ ড্ৰাইভাৰে যাত্ৰা গ্ৰহণ কৰাৰ পিছত ৰাইড বাতিল কৰিলে ভাড়াৰ ১০ শতাংশ, সৰ্বাধিক ১০০টকা পৰ্যন্ত penalty আৰোপ কৰিব পৰা যায়। একেধৰণে বৈধ কাৰণ নথকাকৈ যাত্ৰীয়ে ৰাইড বাতিল কৰিলেও cancellation fee প্ৰযোজ্য হ’ব পাৰে। অৱশ্যে কোনটো কাৰণ ‘valid reason’ হিচাপে গণ্য হ’ব, সেই কথা aggregator-ৰ app আৰু website-ত স্পষ্টকৈ উল্লেখ কৰিব লাগিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
