মেঘালয়ৰ ৰাজধানী শ্বিলঙত পুনৰ উত্তপ্ত হৈ পৰিছে পৰিস্থিতি। বিভিন্ন দাবীক লৈ খাচী ছাত্ৰ সন্থা (KSU)-এ সাব্যস্ত কৰা প্ৰতিবাদক কেন্দ্ৰ কৰি বুধবাৰে বিয়লি প্ৰায় ৪ বজাৰ পাছৰ পৰা পৰিস্থিতি অধিক জটিল হৈ পৰে। প্ৰতিবাদকাৰীসকলে ক’লা পতাকা উৰুৱাই প্ৰতিবাদ সাব্যস্ত কৰাৰ লগতে চৰকাৰৰ বিৰুদ্ধে ক্ষোভ প্ৰকাশ কৰে। প্ৰাপ্ত তথ্য অনুসৰি, KSU-এ পাঁচ দফীয়া দাবীৰে এই প্ৰতিবাদ সাব্যস্ত কৰিছে। সংগঠনটোৱে পূৰ্বে মেঘালয় চৰকাৰক দাবীসমূহ পূৰণৰ বাবে ১৫ দিনীয়া সময়সীমা বান্ধি দিছিল। নিৰ্ধাৰিত সময়ৰ পাছতো দাবীসমূহৰ ক্ষেত্ৰত আশানুৰূপ পদক্ষেপ গ্ৰহণ নকৰাৰ অভিযোগ তুলি সংগঠনটোৱে পুনৰ প্ৰতিবাদ তীব্ৰতৰ কৰি তোলে।
প্ৰতিবাদৰ মাজতে শ্বিলঙৰ বিভিন্ন স্থানত উত্তেজনাময় পৰিৱেশৰ সৃষ্টি হয়। প্ৰতিবাদকাৰীসকলে মেঘালয় চৰকাৰৰ কেইবাখনো বাহন লণ্ড-ভণ্ড কৰে। ইয়াৰ লগতে কিছুমান বাহনত অগ্নিসংযোগ কৰাৰ অভিযোগো উত্থাপিত হৈছে। ইয়াৰ ফলত পৰিস্থিতি অধিক ভয়ংকৰ ৰূপ ধাৰণ কৰে। ইফালে, শ্বিলঙলৈ ফুৰিবলৈ যোৱা অসমৰ পৰ্যটকৰ বাহনতো আক্ৰমণৰ ঘটনা সংঘটিত হোৱাৰ খবৰ পোৱা গৈছে। এই ঘটনাই অসমৰ পৰ্যটকসকলৰ মাজতো উদ্বেগ সৃষ্টি কৰিছে। শ্বিলং অসমৰ পৰ্যটকৰ অন্যতম জনপ্ৰিয় পৰ্যটনস্থলী হোৱাৰ বাবে বৰ্তমানৰ পৰিস্থিতিয়ে অসমৰ পৰা শ্বিলঙলৈ যাত্ৰা কৰা লোকসকলক চিন্তিত কৰি তুলিছে। পৰিস্থিতি নিয়ন্ত্ৰণৰ বাবে নিৰাপত্তাৰক্ষী মোতায়েন কৰা হৈছে যদিও বিয়লি সময়ছোৱাত উত্তেজনা অব্যাহত থকাৰ অভিযোগ উঠিছে। প্ৰতিবাদকাৰীসকলৰ সৈতে নিৰাপত্তাৰক্ষীৰ সংঘাতৰ আশংকাও বৃদ্ধি পাইছে।
বৰ্তমান শ্বিলঙৰ পৰিস্থিতি স্বাভাৱিক নোহোৱা পৰ্যন্ত পৰ্যটকসকলক অধিক সাৱধানতা অৱলম্বন কৰাৰ আহ্বান জনোৱা হৈছে। বিশেষকৈ অসমৰ পৰা ব্যক্তিগত বাহনেৰে শ্বিলঙলৈ যোৱাৰ পৰিকল্পনা কৰা লোকসকলে যাত্ৰাৰ পূৰ্বে স্থানীয় পৰিস্থিতি আৰু প্ৰশাসনৰ নিৰ্দেশনা সম্পৰ্কে নিশ্চিত হৈ লোৱাটো জৰুৰী। পৰিস্থিতি কেতিয়া সম্পূৰ্ণৰূপে নিয়ন্ত্ৰণলৈ আহিব, সেয়া এতিয়াও স্পষ্ট নহয়। KSUৰ দাবী আৰু চৰকাৰৰ পৰৱৰ্তী পদক্ষেপৰ ওপৰতে শ্বিলঙৰ পৰিস্থিতি কোন দিশে আগবাঢ়ে, সেয়া এতিয়া লক্ষ্যণীয় হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
