‘শ্বিলঙত ভয়ংকৰ হৈয়েই আছে পৰিস্থিতি’, চোহৰাত আবদ্ধ অসমৰ ২ শতাধিক বাহন

অসম আৰু মেঘালয়ৰ মাজত চলি থকা উত্তেজনাই ক্ৰমাৎ অধিক ভয়াৱহ ৰূপ ধাৰণ কৰিছে। শ্বিলঙত অসমৰ বাহন আৰু লোকক লক্ষ্য কৰি সংঘটিত আক্ৰমণৰ অভিযোগক কেন্দ্ৰ কৰি অসমতো প্ৰতিবাদ তীব্ৰ হৈ উঠিছে। শুকুৰবাৰে পুৱাৰে পৰা যোৰাবাট অঞ্চলত পৰিস্থিতি উত্তপ্ত হৈ পৰে। প্ৰতিবাদৰ মাজতে যোৰাবাট আৰক্ষীয়ে দুজন লোকক আটক কৰাৰ খবৰ পোৱা গৈছে।

যোৰাবাটত ML নম্বৰপ্লেটৰ বাহনক বাধা

শ্বিলঙৰ হিংসাত্মক ঘটনাৰ প্ৰতিবাদত যোৰাবাটত একাংশ কেব চালক আৰু প্ৰতিবাদকাৰীয়ে মেঘালয়ৰ পঞ্জীয়ন নম্বৰ থকা বাহনক বাধা দিয়ে। বাহনৰ নম্বৰপ্লেটত ‘ML’ দেখিলেই একাংশ কেব চালকে বাহনসমূহ অসমলৈ প্ৰৱেশ কৰিবলৈ নিদি ওভতাই পঠোৱাৰ অভিযোগ উত্থাপিত হৈছে। আনকি ‘ON ARMY DUTY’ বুলি লিখা এখন বাহনকো যোৰাবাটৰ পৰা ওভতাই পঠিওৱাৰ ঘটনা পোহৰলৈ আহিছে। প্ৰতিবাদকাৰীসকলে স্পষ্ট কৰি দিছে যে মেঘালয়ৰ নম্বৰপ্লেট থকা বাহন কোনোপধ্যেই অসমত প্ৰৱেশ কৰিবলৈ দিয়া নহ’ব। ইয়াৰ ফলত যোৰাবাটত পুৱাৰে পৰা যান-বাহন চলাচলক লৈ উত্তেজনাময় পৰিস্থিতিৰ সৃষ্টি হয়।

মেঘালয়তো অসমৰ বাহনত আক্ৰমণ

ইয়াৰ মাজতে মেঘালয়ৰ পৰা পুনৰ অসমৰ বাহনত আক্ৰমণৰ অভিযোগ আহিছে। শিলচৰৰ পৰা মেঘালয় হৈ আহি থকা এখন ট্ৰাকক শ্বিলং বাইপাছৰ সমীপত দুৰ্বৃত্তই আক্ৰমণ কৰাৰ অভিযোগ উত্থাপিত হৈছে। ট্ৰাক চালকৰ বৰ্ণনা অনুসৰি, নম্বৰপ্লেটবিহীন এখন বাহনত অহা একাংশ লোকে মুখত ক’লা কাপোৰ মেৰিয়াই আছিল। তেওঁলোকে অসমৰ নম্বৰপ্লেট থকা বাহন লক্ষ্য কৰি শিলগুটি নিক্ষেপ কৰে। প্ৰায় ৩-৪খন বাহনলৈ শিলগুটি নিক্ষেপ কৰাৰ অভিযোগ উঠিছে। আক্ৰমণৰ পৰা কোনোমতে প্ৰাণ ৰক্ষা কৰি ট্ৰাকখনৰ চালক অসমত উপস্থিত হয়। ঘটনাটোৰ ভয়াৱহ অভিজ্ঞতা অসম Live24ৰ কেমেৰাৰ সন্মুখত বৰ্ণনা কৰি চালকজনে নিজৰ লগতে আন বাহন চালকসকলৰ সুৰক্ষাক লৈ গভীৰ উদ্বেগ প্ৰকাশ কৰে।

চোহৰাত আবদ্ধ অসমৰ শতাধিক বাহন

ইফালে মেঘালয়ৰ চোহৰা অঞ্চলত অসমৰ শতাধিক বাহন আবদ্ধ হৈ থকাৰ খবৰ পোৱা গৈছে। এই বাহনসমূহৰ ভিতৰত পৰ্যটক কঢ়িওৱা বহু ট্ৰেভেলাৰ আৰু অন্যান্য বাণিজ্যিক বাহন আছে। একাংশ তথ্য অনুসৰি, ৭০খনতকৈ অধিক ট্ৰেভেলাৰসহ মুঠ দুই শতাধিক বাহন বৰ্তমানেও চোহৰা অঞ্চলত আবদ্ধ হৈ আছে। এই বাহনসমূহৰ বহুতে অসমৰ পৰা পৰ্যটকক মেঘালয়ৰ বিভিন্ন পৰ্যটনস্থলীলৈ লৈ গৈছিল। পৰিস্থিতি উত্তপ্ত হৈ পৰাৰ পিছত তেওঁলোকে নিৰাপদে অসমলৈ উভতি আহিব পৰা নাই। বাহনসমূহৰ ভিতৰত শিশু, মহিলা আৰু বয়োজ্যেষ্ঠ লোকো আবদ্ধ হৈ থকা বুলি একাংশ চালকে জানিবলৈ দিছে। ফলত আবদ্ধ হৈ থকা পৰ্যটক আৰু বাহনসমূহক শীঘ্ৰে নিৰাপদে অসমলৈ ঘূৰাই অনাৰ বাবে অসম আৰক্ষী তথা মুখ্যমন্ত্ৰীৰ হস্তক্ষেপৰ আহ্বান জনাইছে একাংশ চালকে।

শ্বিলং-গুৱাহাটীৰ বাণিজ্যিক টেক্সি সেৱা বন্ধ

পৰিস্থিতিৰ প্ৰভাৱ পৰিছে অসম-মেঘালয়ৰ মাজৰ বাণিজ্যিক যাতায়াত ব্যৱস্থাতো। মেঘালয়ৰ টেক্সি চালক সন্থাই শ্বিলং-গুৱাহাটী পথত চলাচল কৰা বাণিজ্যিক টেক্সি সেৱা বন্ধ ঘোষণা কৰিছে। আজি পুৱা ৭ বজাৰ পৰা পুনৰ প্ৰতিবাদী কাৰ্যসূচী আৰম্ভ কৰাৰ কথা জানিব পৰা গৈছে। ইয়াৰ প্ৰতিক্ৰিয়াত অসমৰ পৰাও মেঘালয়লৈ টেক্সি সেৱা বন্ধ কৰাৰ হুংকাৰ দিছে একাংশ চালকে। ফলত দুয়োখন ৰাজ্যৰ মাজত দৈনন্দিন যাতায়াত আৰু পৰ্যটন ব্যৱস্থাৰ ওপৰত ইয়াৰ যথেষ্ট প্ৰভাৱ পৰাৰ আশংকা দেখা দিছে।

পৰিস্থিতি নিয়ন্ত্ৰণৰ আহ্বান

বৰ্তমান অসম-মেঘালয় সীমান্তৰ পৰিস্থিতিক লৈ সাধাৰণ লোকৰ মাজত উদ্বেগ বৃদ্ধি পাইছে। বাহনত আক্ৰমণ, শিলগুটি নিক্ষেপ, যাতায়াত বন্ধ আৰু পৰ্যটক আবদ্ধ হৈ থকাৰ দৰে ঘটনাই পৰিস্থিতি অধিক জটিল কৰি তুলিছে। এনে অৱস্থাত দুয়োখন ৰাজ্যৰ প্ৰশাসন আৰু আৰক্ষীয়ে ক্ষিপ্ৰতাৰে ব্যৱস্থা গ্ৰহণ কৰি সাধাৰণ লোক, পৰ্যটক আৰু বাহন চালকসকলৰ নিৰাপত্তা নিশ্চিত কৰাটো অত্যন্ত গুৰুত্বপূৰ্ণ। বিশেষকৈ চেৰাপুঞ্জীত আবদ্ধ হৈ থকা অসমৰ পৰ্যটক আৰু বাহনসমূহক সুৰক্ষিতভাৱে উদ্ধাৰ কৰাৰ বাবে শীঘ্ৰে ব্যৱস্থা গ্ৰহণৰ দাবী উঠিছে। একেদৰে, প্ৰতিবাদৰ নামত কোনো বাহন বা নিৰীহ লোকক আক্ৰমণ নকৰিবলৈও আহ্বান জনোৱা হৈছে। দুয়োখন ৰাজ্যৰ মাজত দীৰ্ঘদিনীয়া যাতায়াত, বাণিজ্য আৰু পৰ্যটনৰ সম্পৰ্ক থকাৰ পৰিপ্ৰেক্ষিতত বৰ্তমানৰ উত্তেজনা যাতে অধিক হিংসাত্মক ৰূপ নলয়, তাৰ বাবে প্ৰশাসনৰ তৎপৰতা অতি প্ৰয়োজনীয় হৈ পৰিছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ