কৰ্কট ৰোগৰ চিকিৎসাৰ ক্ষেত্ৰত এক আশাব্যঞ্জক খবৰ পোহৰলৈ আহিছে। আমেৰিকাৰ কোম্পানী মডাৰ্না আৰু ঔষধ নিৰ্মাতা মাৰ্কে (Merck) মিলি প্ৰস্তুত কৰা এক ব্যক্তিগতকৃত mRNA কেন্সাৰ ভেকচিনে মেলানোমা নামৰ গুৰুতৰ ছালৰ কৰ্কট ৰোগৰ চিকিৎসাত আশাব্যঞ্জক ফলাফল দেখুৱাইছে। এই ভেকচিন সকলো ৰোগীৰ বাবে একে নহ’ব। বৰং প্ৰতিজন ৰোগীৰ নিজৰ টিউমাৰৰ জিনীয় বৈশিষ্ট্য পৰীক্ষা কৰি সেই অনুসৰি ভেকচিন প্ৰস্তুত কৰা হ’ব। সহজ ভাষাত ক’বলৈ গ’লে, ৰোগীৰ কৰ্কট ৰোগৰ বাবে যি ভেকচিন প্ৰয়োজন, সেইটো তেওঁৰ টিউমাৰৰ তথ্যৰ ওপৰত ভিত্তি কৰি তৈয়াৰ কৰা হ’ব।
কেনেকৈ কাম কৰিব এই ভেকচিনে?
প্ৰথমে চিকিৎসকে ৰোগীৰ টিউমাৰৰ নমুনা পৰীক্ষা কৰিব। এই পৰীক্ষাৰ জৰিয়তে কৰ্কট কোষত থকা বিশেষ জিনীয় পৰিৱৰ্তন বা মিউটেচন চিনাক্ত কৰা হ’ব। তাৰ পিছত কৃত্ৰিম বুদ্ধিমত্তা বা AIৰ সহায়ত কৰ্কট কোষৰ আটাইতকৈ গুৰুত্বপূৰ্ণ বৈশিষ্ট্যসমূহ বাছনি কৰা হ’ব। এইবোৰক নিঅ’এন্টিজেন বুলি কোৱা হয়। এজন ৰোগীৰ ভেকচিনত ৩৪টালৈকে এনে নিঅ’এন্টিজেন থাকিব পাৰে। ভেকচিনত থকা mRNAই শৰীৰৰ কোষক এই তথ্য দিয়ে। ফলত শৰীৰৰ ৰোগ প্ৰতিৰোধ ক্ষমতাৰ গুৰুত্বপূৰ্ণ কোষ টি-চেলে কৰ্কট কোষক চিনি পাবলৈ আৰু সেইবোৰ আক্ৰমণ কৰিবলৈ শিকে।
কেন্সাৰ চিকিৎসাত ‘ডাবল ষ্ট্ৰাইক’
এই চিকিৎসাত মডাৰ্নাৰ ভেকচিনৰ সৈতে মাৰ্কৰ কীট্ৰুডা (Keytruda) নামৰ ইমিউন’থেৰাপি ঔষধ ব্যৱহাৰ কৰা হৈছে। ইয়াৰ উদ্দেশ্য দুটা দিশত কাম কৰা। ভেকচিনে শৰীৰৰ ৰোগ প্ৰতিৰোধ ক্ষমতাক কৰ্কট কোষ চিনি পাবলৈ শিকায়। আনহাতে কীট্ৰুডাই সেই ৰোগ প্ৰতিৰোধ ক্ষমতাক কৰ্কট কোষৰ বিৰুদ্ধে অধিক ফলপ্ৰসূভাৱে কাম কৰাত সহায় কৰে। সেইবাবেই এই পদ্ধতিক কৰ্কট ৰোগৰ বিৰুদ্ধে একধৰণৰ ‘ডাবল ষ্ট্ৰাইক’ বুলি বুজাব পাৰি।
পৰীক্ষাত কি ফলাফল পোৱা গ’ল?
এই চিকিৎসাৰ তৃতীয় পৰ্যায়ৰ INTERPATH-001 পৰীক্ষাত ১,১৩৭ জন মেলানোমা ৰোগীক অন্তৰ্ভুক্ত কৰা হৈছিল। এই ৰোগীসকলৰ অস্ত্ৰোপচাৰৰ জৰিয়তে উন্নত পৰ্যায়ৰ কৰ্কট ৰোগ আঁতৰোৱা হৈছিল। ৰোগীসকলক কীট্ৰুডা দিয়া হৈছিল। ইয়াৰে এটা গোটে ইয়াৰ লগতে ব্যক্তিগতকৃত mRNA ভেকচিনো লাভ কৰিছিল। প্ৰাথমিক ফলাফলত দেখা গৈছে যে কেৱল কীট্ৰুডা লোৱা ৰোগীৰ তুলনাত ভেকচিন আৰু কীট্ৰুডা দুয়োটা লোৱা ৰোগীৰ ক্ষেত্ৰত কৰ্কট ৰোগ পুনৰ ঘূৰি অহাৰ সম্ভাৱনা কমিছিল। লগতে শৰীৰৰ আন দূৰৈৰ অংশলৈ কৰ্কট ৰোগ বিয়পি পৰাৰ ক্ষেত্ৰতো উন্নত ফলাফল দেখা গৈছে।
কিয় ইমান গুৰুত্বপূৰ্ণ এই ভেকচিন?
এই পদ্ধতিৰ আটাইতকৈ ডাঙৰ বিশেষত্ব হৈছে—ই সকলো ৰোগীৰ বাবে একে চিকিৎসা নহয়। প্ৰতিজন ৰোগীৰ কৰ্কট ৰোগৰ বৈশিষ্ট্য অনুসৰি চিকিৎসা প্ৰস্তুত কৰাৰ চেষ্টা কৰা হৈছে। অস্ত্ৰোপচাৰৰ পিছত শৰীৰত অতি সৰু পৰিমাণৰ কৰ্কট কোষ ৰৈ যাব পাৰে। এই কোষবোৰৰ বাবেই পিছলৈ ৰোগ পুনৰ দেখা দিব পাৰে। নতুন ভেকচিনটোৱে এনে অৱশিষ্ট কৰ্কট কোষ চিনাক্ত কৰি ধ্বংস কৰাত সহায় কৰাৰ লক্ষ্য ৰাখিছে।
এতিয়াই সকলো ৰোগীয়ে এই ভেকচিন পাবনে?
এতিয়াই এই ভেকচিনক সাধাৰণ কৰ্কট চিকিৎসা হিচাপে ব্যৱহাৰ কৰিব পৰা হোৱা নাই। পৰীক্ষাৰ প্ৰাথমিক ফলাফল আশাব্যঞ্জক হ’লেও সম্পূৰ্ণ তথ্য এতিয়াও ঔষধ অনুমোদনকাৰী সংস্থাসমূহৰ আগত দাখিল আৰু মূল্যায়নৰ প্ৰক্ৰিয়াত আছে। লগতে ৰোগীৰ সামগ্ৰিক আয়ুসৰ ওপৰত এই চিকিৎসাৰ প্ৰভাৱ কিমান, সেয়াও এতিয়ালৈ সম্পূৰ্ণভাৱে স্পষ্ট হোৱা নাই। সেয়েহে বৰ্তমান এই ভেকচিনক কেন্সাৰৰ নিশ্চিত নিৰাময় বুলি কোৱা উচিত নহ’ব। কিন্তু মেলানোমাৰ দৰে গুৰুতৰ কৰ্কট ৰোগৰ চিকিৎসাত এই ফলাফল যথেষ্ট গুৰুত্বপূৰ্ণ। বিশেষকৈ ক’ভিড-১৯ ভেকচিনৰ পিছত mRNA প্ৰযুক্তিক কৰ্কট চিকিৎসাৰ ক্ষেত্ৰতো ব্যৱহাৰ কৰাৰ সম্ভাৱনাই চিকিৎসা বিজ্ঞানত নতুন আশাৰ সৃষ্টি কৰিছে। আগন্তুক দিনত অধিক পৰীক্ষা আৰু নিয়ন্ত্ৰণকাৰী সংস্থাৰ অনুমোদন লাভ কৰিলে এই ব্যক্তিগতকৃত চিকিৎসা পদ্ধতিয়ে কেন্সাৰ চিকিৎসাৰ ক্ষেত্ৰত এক নতুন দিশ মুকলি কৰিব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
