শূন্য দূৰত্বৰ পৰা এইগৰাকী জনপ্ৰিয় কণ্ঠশিল্লীক গু*লীয়াই হ*ত্যা

উত্তৰ প্ৰদেশৰ পশ্চিম ছামলী জিলাত বুধবাৰে সন্ধিয়া সংঘটিত হয় এক চাঞ্চল্যকৰ হ*ত্যাকাণ্ড। দুৰ্বৃত্তই জনপ্ৰিয় হাৰিয়ানী গায়ক অংকিত বালিয়ানক গুলীয়াই হত্যা কৰে। সদৰ কোতৱালি অঞ্চলৰ ড্ৰেইন ট্ৰেকৰ সমীপত সংঘটিত এই ঘটনাই সমগ্ৰ অঞ্চলটোত আতংকৰ সৃষ্টি কৰিছে। জানিব পৰা মতে, অংকিত বালিয়ানে সদায়ৰ দৰে জিমলৈ গৈছিল। সন্ধিয়া প্ৰায় ৬:৪৫ বজাত জিমৰ পৰা ওলাই অহাৰ সময়তে পূৰ্বৰে পৰা অপেক্ষা কৰি থকা আক্ৰমণকাৰীয়ে তেওঁক লক্ষ্য কৰি গুলীচালনা কৰে। প্ৰত্যক্ষদৰ্শীৰ মতে, আততায়ীয়ে ২০জাইতকৈ অধিক গু*লী চলাই ঘটনাস্থলীৰ পৰা পলায়ন কৰে। গু*লীৰ শব্দ শুনি ওচৰৰ লোকসকলৰ মাজত হাহাকাৰ লাগে। অংকিত গুৰুতৰভাৱে আহত হৈ পথত বাগৰি পৰে। লগে লগে স্থানীয় লোকে তেওঁক চিকিৎসালয়লৈ লৈ যায় যদিও চিকিৎসাধীন অৱস্থাত তেওঁৰ মৃ*ত্যু হয়।

জনপ্ৰিয় গীতেৰে লাভ কৰিছিল পৰিচয়

অংকিত বালিয়ান হাৰিয়ানী সংগীত জগতৰ এগৰাকী পৰিচিত শিল্পী আছিল। তেওঁৰ ‘ভৰি ক’ৰ্ট মেই গো*লি মাৰেংগে মেৰী জান’ গীতটো যথেষ্ট জনপ্ৰিয় হৈছিল। এই গীতৰ জৰিয়তে তেওঁ পশ্চিম উত্তৰ প্ৰদেশ আৰু হাৰিয়ানাত বিশেষ পৰিচিতি লাভ কৰিছিল। অংকিতৰ ঘৰ ছামলীৰ বাণ্টীখেড়া অঞ্চলত বুলি জানিব পৰা গৈছে। তেওঁ জনপ্ৰিয় হাৰিয়ানী গায়ক মাছুম শৰ্মাৰ সৈতেও কাম কৰিছিল। তেওঁৰ আকস্মিক মৃ*ত্যুৰ খবৰে অনুৰাগী আৰু পৰিচিতসকলৰ মাজত গভীৰ শোকৰ ছাঁ পেলাইছে।

২০২৩ চনতো চৰ্চালৈ আহিছিল অংকিত

ইয়াৰ পূৰ্বেও অংকিত বালিয়ান এটা ৰোড শ্ব’ক কেন্দ্ৰ কৰি চৰ্চালৈ আহিছিল। ২০২৩ চনৰ জুলাইত ছামলীত তেওঁৰ কনভয়ৰ ৰোড শ্ব’ক লৈ অংকিতসহ প্ৰায় ৪০জন লোকৰ বিৰুদ্ধে আৰক্ষীয়ে গোচৰ ৰুজু কৰিছিল। তদুপৰি, তেওঁ জিলা পঞ্চায়ত নিৰ্বাচনত প্ৰতিদ্বন্দ্বিতা কৰাৰ বাবেও প্ৰস্তুতি চলাইছিল বুলি জানিব পৰা গৈছে। অৱশ্যে এই পূৰ্বৰ ঘটনাসমূহৰ সৈতে বৰ্তমানৰ হ*ত্যাকাণ্ডৰ কোনো সম্পৰ্ক আছে নে নাই, সেয়া এতিয়াও স্পষ্ট হোৱা নাই।

আৰক্ষীৰ তদন্ত আৰম্ভ

অংকিত বালিয়ানক কিয় হ*ত্যা কৰা হ’ল, সেই বিষয়ে এতিয়াও কোনো স্পষ্ট তথ্য পোহৰলৈ অহা নাই। জিমৰ পৰা ওলাই অহাৰ সময়তে তেওঁক লক্ষ্য কৰি আক্ৰমণ কৰা ঘটনাই আৰক্ষীৰ সন্দেহ অধিক বৃদ্ধি কৰিছে। আক্ৰমণকাৰীয়ে অংকিতৰ দৈনন্দিন গতিবিধি আৰু জিমৰ পৰা ওলোৱাৰ সময়ৰ বিষয়ে আগতীয়াকৈ জানিছিল নেকি, সেই বিষয়েও তদন্ত কৰা হৈছে। ঘটনাৰ পিছতে আৰক্ষীয়ে ঘটনাস্থলীত উপস্থিত হৈ তদন্ত আৰম্ভ কৰে। ওচৰৰ অঞ্চলসমূহৰ CCTV ফুটেজ পৰীক্ষা কৰা হৈছে। আক্ৰমণকাৰীসকল কোনখন বাহনত আহিছিল আৰু গু*লীচালনাৰ পিছত কোন পথেৰে পলায়ন কৰিছিল, সেই তথ্য বিচাৰি আৰক্ষীয়ে অভিযান চলাইছে। বৰ্তমান কেইবাটাও আৰক্ষীৰ দলে ঘটনাটোৰ তদন্ত অব্যাহত ৰাখিছে। আক্ৰমণকাৰীৰ পৰিচয়, হ*ত্যাৰ উদ্দেশ্য আৰু এই হ*ত্যাকাণ্ডৰ আঁৰৰ সম্পূৰ্ণ কাৰণ তদন্ত সম্পূৰ্ণ হোৱাৰ পিছতহে স্পষ্ট হ’ব।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ