ৰাখী বন্ধনকে ধৰি আগন্তুক উৎসৱসমূহৰ পূৰ্বে ভেজাল খাদ্যৰ বিৰুদ্ধে কঠোৰ অভিযান আৰম্ভ কৰিছে খাদ্য সুৰক্ষা আৰু ঔষধ প্ৰশাসনে (এফ এছ ডি এ)। সোমবাৰে নিশা উত্তৰ প্ৰদেশৰ আলিগড়ৰ বিজয়গড় আৰক্ষী থানা এলেকাত ভেজাল খোয়া(khoya) প্ৰস্তুত কৰা কাৰখানাত অভিযান চলায় খাদ্য সুৰক্ষা বিভাগৰ দলে। অভিযানৰ সময়ত কাৰখানাটোৰ পৰা প্ৰায় ৫ কুইণ্টল ভেজাল খোয়া(khoya) জব্দ কৰা হয়। জানিব পৰা মতে, এই সামগ্ৰীখিনি এখন বিচনাৰ তলত লুকুৱাই ৰখা হৈছিল।
খাদ্য বিভাগৰ তথ্য অনুসৰি, কাৰখানাটোত অস্বাস্থ্যকৰ পৰিৱেশত খোয়া(khoya) প্ৰস্তুত কৰা হৈছিল। অভিযানৰ সময়ত চক পাউডাৰ, ৰিফাইন অইল আৰু বিভিন্ন ৰাসায়নিক পদাৰ্থ পোৱা যায়। এই সামগ্ৰীবোৰ ব্যৱহাৰ কৰি ভেজাল খোয়া প্ৰস্তুত কৰাৰ অভিযোগ উত্থাপন হৈছে। FSDAৰ আলিগড়ৰ দলটোৱে কিছুদিন ধৰি নগলা ভূৰা অঞ্চলত বৃহৎ পৰিসৰত ভেজাল খাদ্য প্ৰস্তুত কৰাৰ তথ্য লাভ কৰি আছিল। কাৰখানাটোত তালাচী চলোৱাৰ সময়ত এখন বিচনা খুলি চোৱাত তাৰ তলত বৃহৎ পৰিমাণৰ খোয়া (khoya) লুকুৱাই থোৱা দেখা যায়। খাদ্য বিভাগৰ দলটোৱে সেই স্থানৰ পৰা প্ৰায় ৫ কুইণ্টল সন্দেহযুক্ত ভেজাল খোয়া উদ্ধাৰ কৰে। উদ্ধাৰ কৰা সামগ্ৰীখিনি এক্সকেভেটৰৰ সহায়ত গাঁৱৰ বাহিৰত গাঁত খান্দি ধ্বংস কৰা হয়। লগতে কাৰখানাটোত পোৱা অন্যান্য সামগ্ৰীৰ নমুনা সংগ্ৰহ কৰি পৰীক্ষাগাৰলৈ প্ৰেৰণ কৰা হৈছে। অভিযানৰ সময়ত কাৰখানাৰ অপাৰেটৰ অৰ্জুন যাদৱে পলায়ন কৰে। তেওঁৰ বিৰুদ্ধে বিজয়গড় আৰক্ষী থানাত সংশ্লিষ্ট ধাৰাত গোচৰ ৰুজু কৰা হৈছে। এফ এছ ডি এৰ সহকাৰী আয়ুক্ত দীপক সিঙে কয় যে, অঞ্চলটোত বৃহৎ পৰিসৰত ভেজাল খোয়া প্ৰস্তুত কৰাৰ তথ্য লাভ কৰাৰ পিছতে এই অভিযান চলোৱা হৈছিল।
খাদ্য সুৰক্ষা বিভাগে সন্দেহ কৰিছে যে ৰাখী বন্ধনকে ধৰি আগন্তুক উৎসৱৰ সময়ত বজাৰত বিক্ৰীৰ বাবে এই ভেজাল খোয়া প্ৰস্তুত কৰা হৈছিল। বিভাগৰ মতে, এই কাৰখানাত প্ৰস্তুত কৰা ভেজাল আৰু অস্বাস্থ্যকৰ খোয়া NCR আৰু ওচৰৰ বিভিন্ন জিলালৈ যোগান ধৰাৰো তথ্য পোৱা গৈছিল। উৎসৱৰ সময়ত খোয়া, গাখীৰ, মিঠাই আদি খাদ্য সামগ্ৰীৰ চাহিদা যথেষ্ট বৃদ্ধি পায়। এই সুযোগ লৈ অসাধু ব্যৱসায়ীয়ে যাতে ভেজাল খোয়া বজাৰত বিক্ৰী কৰিব নোৱাৰে, তাৰ বাবে খাদ্য বিভাগে অভিযান অধিক তীব্ৰ কৰাৰ কথা প্ৰকাশ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
