দেশত বেংক ধৰ্মঘটৰ আহ্বান। বেংক ইউনিয়নে ১১ ছেপ্টেম্বৰত দেশজুৰি বেংক ধৰ্মঘটৰ আহ্বান জনাইছে। ২৬ অক্টোবৰৰ পৰা অনিৰ্দিষ্টকালৰ বাবে এই ধৰ্মঘটৰ আহ্বান। এই বেংক ধৰ্মঘটৰ বাবে সাধাৰণ মানুহ চৰম সমস্যাৰ সন্মুখীন হ’ব পাৰে।
ধৰ্মঘট কেতিয়া?
ইউনাইটেড ফ’ৰাম অৱ বেংক ইউনিয়নে অবিৰতভাৱে বেংক ধৰ্মঘটৰ আহ্বান জনাইছে। ইয়াত দেশৰ ৰাজহুৱা খণ্ডৰ ৯০ শতাংশ বেংক, ব্যক্তিগত খণ্ডৰ বেংক, বিদেশী বেংক, গ্ৰাম্য বেংক আৰু সমবায় বেংক আদি সামৰি লোৱা হৈছে। তেওঁলোকে কৈছে যে ১১ ছেপ্টেম্বৰত দেশজুৰি বেংক ধৰ্মঘট অনুষ্ঠিত হ’ব। তাৰ পিছত ২৮, ২৯ আৰু ৩০ ছেপ্টেম্বৰত বেংক ধৰ্মঘট হ’ব। যদি দাবী পূৰণ নহয় তেন্তে ২৬ অক্টোবৰৰ পৰা অনিৰ্দিষ্টকালীন ধৰ্মঘট আহ্বান কৰা হৈছে।
ধৰ্মঘটৰ দাবী কি?
ইউনাইটেড ফ’ৰাম অৱ বেংক ইউনিয়নৰ এটা দাবী হ’ল বেংকসমূহ সপ্তাহত পাঁচ দিন খোলা থাকিব লাগে, দুদিন ছুটীৰ সৈতে। ২০২৪ চনত সপ্তাহত পাঁচ দিন বেংক খোলা ৰখাৰ নিয়মত বেংকসমূহে সন্মতি প্ৰকাশ কৰিছিল বুলি দাবী জনাইছে। এমাহৰ ভিতৰত দুটা শনিবাৰ বন্ধৰ পৰিৱৰ্তে প্ৰতি শনিবাৰ আৰু দেওবাৰে বেংক বন্ধ থাকিব । বিনিময়ত সোমবাৰৰ পৰা শুকুৰবাৰলৈ কামৰ সময় ৪০ মিনিট বৃদ্ধি কৰা হ’ব।
যদিও বেংকৰ কৰ্মচাৰীসকলে এই প্ৰস্তাৱত সন্মতি প্ৰকাশ কৰিছে, তথাপিও বিত্ত মন্ত্ৰালয়ৰ অনুমোদন লাভ কৰা নাই। দুবছৰীয়া দাবী পূৰণৰ বাবে বেংক ধৰ্মঘটৰ আহ্বান জনাইছে সংগঠনটোৱে।
কেন্দ্ৰীয় চৰকাৰে শেহতীয়াকৈ প্ৰৱৰ্তন কৰা নতুন প্ৰৰোচনামূলক আঁচনিখনৰ ওপৰতো বেংক কৰ্মচাৰী সংগঠনসমূহে আপত্তি দাঙি ধৰিছে আৰু দ্বিপাক্ষিক আলোচনাৰ দাবী জনাইছে। ইউনাইটেড ফ’ৰাম অৱ বেংক ইউনিয়নে চৰকাৰৰ পাৰফৰমেন্স লিংকড ইনচেণ্টিভ প্ৰত্যাহাৰৰ দাবী জনাইছে আৰু ইয়াক “একপক্ষীয় আৰু বৈষম্যমূলক” বুলি অভিহিত কৰিছে।
পুৰণি পিএলআই আঁচনিখন কি?
ইণ্ডিয়ান বেংক এছ’চিয়েশ্যন আৰু বেংক কৰ্মচাৰী ইউনিয়নৰ মাজত হোৱা চুক্তিৰ ভিত্তিত ২০২০ চনৰ নৱেম্বৰ মাহত বৰ্তমানৰ পাৰফৰমেন্স লিংকড ইনচেণ্টিভ (পিএলআই) আঁচনি আৰম্ভ কৰা হৈছিল। এই আঁচনিখনে প্ৰথম স্কেলৰ পৰা সপ্তম স্কেললৈকে বেংকৰ কৰ্মচাৰী আৰু বিষয়াসকলক সামৰি লৈছিল। বেংকৰ কাম-কাজ আৰু লাভৰ ওপৰত নিৰ্ভৰ কৰি কৰ্মচাৰীসকলে নূন্যতম এদিনৰ দৰমহাৰ পৰা সৰ্বাধিক ১৫ দিনৰ দৰমহালৈকে প্ৰৰোচনা লাভ কৰিব। এই প্ৰৰোচনাৰ নিয়ম একেটা বেংকৰ কৰ্মচাৰীৰ বাবে একে আছিল।
নতুন সূত্ৰৰ ওপৰত আপত্তি
সংগঠনটোৱে দাবী কৰে যে ২০২৪ চনৰ নৱেম্বৰ মাহত বিত্ত মন্ত্ৰালয়ৰ অধীনস্থ বিত্তীয় সেৱা বিভাগে বেংকসমূহক স্কেল চতুৰ্থৰ পৰা সপ্তম স্কেললৈকে বিষয়াসকলৰ বাবে নতুন প্ৰৰোচনামূলক সূত্ৰ প্ৰৱৰ্তন কৰিবলৈ নিৰ্দেশ দিছিল।
এই আদেশ ২০২০ৰ দ্বিপাক্ষিক চুক্তিৰ বিৰোধী বুলি অভিযোগ উত্থাপন কৰে সংগঠনসমূহে। কাৰণ নতুন ব্যৱস্থাত বেংকৰ সামগ্ৰিক কৰ্মক্ষমতাৰ পৰিৱৰ্তে প্ৰতিজন বিষয়াৰ ব্যক্তিগত কৰ্মক্ষমতাৰ ওপৰত ভিত্তি কৰি প্ৰৰোচনাৰ ব্যৱস্থা কৰা হৈছে। ইউনিয়নসমূহে দাবী কৰে যে নতুন আঁচনিখনত নিৰ্দিষ্ট বিষয়াসকলক তেওঁলোকৰ ব্যক্তিগত কৰ্মক্ষমতাৰ ওপৰত ভিত্তি কৰি সৰ্বাধিক ৩৬৫ দিনৰ দৰমহা পৰ্যন্ত প্ৰৰোচনা প্ৰদান কৰিব পৰা যাব। আনহাতে পুৰণি দ্বিপাক্ষিক চুক্তি আঁচনিখনত সৰ্বোচ্চ প্ৰৰোচনা আছিল ১৫ দিনৰ দৰমহা।
দেশৰ বেংকিং খণ্ডত মুঠ কৰ্মচাৰীৰ সংখ্যা প্ৰায় ৮ লাখ। ইয়াৰে চতুৰ্থ স্কেলৰ পৰা সপ্তম স্কেললৈকে বিষয়াৰ সংখ্যা প্ৰায় ৪০ হাজাৰ অৰ্থাৎ মুঠ কৰ্মচাৰীৰ প্ৰায় ৫ শতাংশ। বাকী ৯৫ শতাংশ কৰ্মচাৰীৰ বাবে সৰ্বোচ্চ প্ৰৰোচনা এদিনৰ দৰমহা হোৱাৰ বিপৰীতে নতুন আঁচনিৰ অন্তৰ্ভুক্ত ৫ শতাংশ বিষয়াই ৩৬৫ দিনৰ দৰমহা পৰ্যন্ত প্ৰৰোচনা লাভ কৰিব পাৰে বুলি সংগঠনটোৱে দাবী কৰে।
এই নিৰ্দেশনাৰ বিৰোধিতা কৰি সংগঠনসমূহে আই বি এৰ সৈতে আলোচনা কৰি চৰকাৰৰ নতুন সূত্ৰৰ পৰিৱৰ্তনৰ প্ৰস্তাৱ আগবঢ়ায়। অৱশ্যে ইউ এফ বি ইউৰ দাবী যে ডি এফ এছ বা চৰকাৰৰ পৰা এতিয়ালৈকে কোনো সঁহাৰি পোৱা নাই।
সংগঠনটোৱে আৰু অভিযোগ কৰে যে নতুন ডি এফ এছ আঁচনিখন পুৰণি পাৰস্পৰিকভাৱে চুক্তিবদ্ধ ইউনিফৰ্ম পি এল আই ব্যৱস্থাৰ বিৰুদ্ধে। নতুন ব্যৱস্থাটোৱে বেংকৰ সামগ্ৰিক প্ৰদৰ্শনৰ পৰিৱৰ্তে ব্যক্তিগত কাম-কাজক গুৰুত্ব প্ৰদান কৰে। ইয়াৰ উপৰিও বিষয়াসকলক ‘ভাল প্ৰদৰ্শনকাৰী’ আৰু ‘বেয়া প্ৰদৰ্শনকাৰী’ৰ দৰে পৃথক পৃথক শিতানত ভাগ কৰিব লাগিব বুলিও অভিযোগ উত্থাপন কৰিছে। তেওঁলোকে দাবী কৰে যে ইয়াৰ ফলত মুঠ কৰ্মশক্তিৰ মাত্ৰ ৫ শতাংশৰ বাবে বেংকটোৰ বাবে অতিৰিক্ত আৰু অসমতাপূৰ্ণ খৰচ বৃদ্ধি হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
