কেৱল ২০০ বা ৫০০ টকীয়া নকল নোটেই নহয়, এইবাৰ বজাৰত দেখা দিছে ২০ টকীয়া নকল মুদ্ৰা। উত্তৰ প্ৰদেশৰ চাহাৰানপুৰত আৰক্ষীয়ে ২০ টকীয়া নকল মুদ্ৰা প্ৰস্তুত কৰি বজাৰত চলোৱা এটা বৃহৎ চক্ৰ উৎখাত কৰিছে। এই অভিযানত আৰক্ষীয়ে ৫জন লোকক গ্ৰেপ্তাৰ কৰাৰ লগতে ৬,৪০০টা নকল ২০ টকীয়া মুদ্ৰা জব্দ কৰিছে। আৰক্ষীৰ মতে, এই চক্ৰটোৱে ইতিমধ্যে প্ৰায় ৭০ কোটি টকাৰ নকল মুদ্ৰা বজাৰত চলাইছিল বুলি তদন্তত তথ্য পোহৰলৈ আহিছে।
ঘটনাটো পোহৰলৈ অহাৰ পিছতে নকল মুদ্ৰাৰ প্ৰচলনক লৈ নতুনকৈ উদ্বেগ সৃষ্টি হৈছে। বিশেষকৈ সাধাৰণ লেনদেনত ২০ টকীয়া মুদ্ৰা সহজে গ্ৰহণ কৰা হয় বাবে এই ধৰণৰ নকল মুদ্ৰা চিনাক্ত কৰাটো গ্ৰাহকৰ বাবে প্ৰত্যাহ্বান হৈ পৰিব পাৰে। আৰক্ষীৰ তথ্য অনুসৰি, চাহাৰানপুৰৰ কোতৱালি নগৰ আৰক্ষী, SOG, SWAT আৰু Surveillance টীমে যৌথভাৱে অভিযান চলাই এই চক্ৰটোৰ বিৰুদ্ধে ব্যৱস্থা গ্ৰহণ কৰে। ১৩ ছেপ্টেম্বৰ ২০২৬ত ৫ জন অভিযুক্তক গ্ৰেপ্তাৰ কৰা হয়।
আৰক্ষীয়ে অভিযান চলোৱাৰ সময়ত কেৱল তৈয়াৰ কৰি থোৱা নকল মুদ্ৰাই নহয়, মুদ্ৰা প্ৰস্তুত কৰাৰ বাবে ব্যৱহাৰ কৰা যন্ত্ৰপাতিও জব্দ কৰে। উদ্ধাৰ হোৱা সামগ্ৰীৰ ভিতৰত ৬টা মেচিন আৰু কেইবাখনো লো-ডাই থকাৰ কথা আৰক্ষীয়ে জনাইছে। আৰক্ষীৰ অভিযানত মুঠ ৬,৪০০টা নকল ২০ টকীয়া মুদ্ৰা উদ্ধাৰ হয়। ২০ টকা হিচাপে হিচাপ কৰিলে এই মুদ্ৰাসমূহৰ মুঠ মূল্য ১ লাখ ২৮ হাজাৰ টকা।
উল্লেখযোগ্য কথাটো হৈছে নকল মুদ্ৰা প্ৰস্তুত কৰাৰ চক্ৰটোৰ ক্ষমতা। আৰক্ষীৰ মতে, চক্ৰটোৱে ব্যৱহাৰ কৰা যন্ত্ৰপাতিৰ সহায়ত দিনে প্ৰায় ১০,০০০ৰ পৰা ১২,০০০টা নকল ২০ টকীয়া মুদ্ৰা প্ৰস্তুত কৰিছিল। আৰক্ষীৰ তদন্তত এটা সুসংগঠিত নেটৱৰ্কৰ তথ্য পোহৰলৈ অহাৰ কথা প্ৰকাশ পাইছে। তদন্তত পোহৰলৈ অহা তথ্য অনুসৰি, নকল মুদ্ৰাসমূহ বিভিন্ন ঠাইত সৰু সৰু লেনদেনৰ জৰিয়তে বজাৰত চলোৱা হৈছিল বুলি আৰক্ষীয়ে দাবী কৰিছে। প্ৰতিবেদন অনুসৰি সুৰাৰ দোকান, টোল প্লাজা আৰু গেলামালৰ দোকান আদি ঠাইত এই নকল মুদ্ৰা চলোৱাৰ অভিযোগ উঠিছে।
গ্ৰেপ্তাৰ হোৱা পাঁচজনৰ ভিতৰত আছে এই চক্ৰটোৰ মূল অভিযুক্ত উপকাৰ লুথ্ৰা ওৰফে অভয় প্ৰতাপ সিং। অভয় পাঞ্জাবৰ মোহালিত সোণাৰ হিচাপে কাম কৰিছিল। আনহাতে, গ্ৰেপ্তাৰ হোৱা আন চাৰিজন হৈছে চাহাৰানপুৰৰ হিমাংশু ওৰফে গুল্লু, মুজাফ্ফৰনগৰৰ কুলদীপ, ভাদোহীৰ অনুৰাগ পাল ওৰফে লংকেশ আৰু বিহাৰৰ সন্তোষ চৌৰাছিয়া ওৰফে জনাৰ্দন। বিভিন্ন চক্ৰৰে মিলি এই গেংগটোৱে ১০ৰ পৰা ১২ টকা মূল্যত বিক্ৰি কৰিছিল এই ২০টকীয়া নকল মুদ্ৰা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
