প্ৰস্ৰাৱৰ সংক্ৰমণ অতি সাধাৰণ সমস্যা, কিন্তু ইউটিআই অৰ্থাৎ প্ৰস্ৰাৱৰ সংক্ৰমণৰ সমস্যা পুৰুষতকৈ মহিলাৰ ক্ষেত্ৰত বেছি, যদিও ইয়াৰ আঁৰৰ স্পষ্ট কাৰণ জনা নাযায়। UTI (Urinary Tract Infection) অৰ্থাৎ মূত্ৰনলীৰ সংক্ৰমণত প্ৰস্ৰাৱ কৰাৰ সময়ত জ্বলা-পোৰা, বাৰে বাৰে প্ৰস্ৰাৱৰ অনুভূতি, তলপেটত বিষ, প্ৰস্ৰাৱৰ ৰং সলনি হোৱা বা দুৰ্গন্ধ আদি সমস্যা দেখা দিব পাৰে। সাধাৰণতে বেক্টেৰিয়াৰ সংক্ৰমণৰ ফলত UTI হয় আৰু কেতিয়াবা চিকিৎসাৰ বাবে এণ্টিবায়’টিকৰ প্ৰয়োজন হ’ব পাৰে।
এই সময়ত খাদ্যই UTI নিৰাময় নকৰে যদিও সঠিক পৰিমাণৰ পানী আৰু কিছুমান খাদ্যাভ্যাসে শৰীৰক হাইড্ৰেটেড ৰখাত আৰু অস্বস্তি কমোৱাত সহায় কৰিব পাৰে।
UTI হ’লে কি খাব?
পৰ্যাপ্ত পানী খাব
UTIৰ সময়ত আটাইতকৈ গুৰুত্বপূৰ্ণ কথাটো হৈছে পৰ্যাপ্ত পৰিমাণে পানী খোৱা। পানী খালে প্ৰস্ৰাৱ নিয়মিত হয় আৰু মূত্ৰনলীৰ পৰা বেক্টেৰিয়া বাহিৰ কৰাত সহায় কৰিব পাৰে। অৱশ্যে কিডনী ফেইলিউৰ বা হৃদৰোগৰ দৰে সমস্যাৰ বাবে যদি চিকিৎসকে পানী সীমিত কৰিবলৈ কৈছে, তেন্তে নিজৰ ইচ্ছামতে অধিক পানী নাখাব।
পানীসমৃদ্ধ ফল-মূল আৰু শাক-পাচলি
তৰমুজ, বগৰী, কম পানী থকা নহয় এনে সতেজ ফল-মূল, শাক-পাচলি আদি খাদ্যত ৰাখিব পাৰে। ফল-মূল আৰু শাক-পাচলিয়ে স্বাস্থ্যকৰ খাদ্যাভ্যাস বজাই ৰখাত সহায় কৰে।
আঁহযুক্ত খাদ্য
সম্পূৰ্ণ শস্য, শাক-পাচলি, ফল-মূল আদি আঁহযুক্ত খাদ্য খাব পাৰে। কোষ্ঠকাঠিন্য এৰাই চলাটোও মূত্ৰনলীৰ স্বাস্থ্যৰ বাবে উপকাৰী।
সহজে হজম হোৱা স্বাস্থ্যকৰ খাদ্য
ভাত, দাইল, সিজোৱা শাক-পাচলি, কম তেল-মছলাৰ খাদ্য, ডিম বা প্ৰয়োজন অনুসৰি লীন প্ৰটিন খাব পাৰে। UTIৰ বাবে কোনো বিশেষ ‘মেজিক’ খাদ্যৰ প্ৰমাণ নাই; মূল লক্ষ্য হ’ব লাগে সুষম খাদ্য আৰু পৰ্যাপ্ত পানী।
UTI হ’লে কি কি নাখাব?
কফি আৰু অত্যধিক কেফেইন
কফি আৰু বেছি কেফেইনযুক্ত পানীয়ই কিছুমান লোকৰ মূত্ৰাশয়ত অস্বস্তি বা জ্বলা-পোৰা বৃদ্ধি কৰিব পাৰে। সেয়ে UTIৰ সময়ত কফি কমোৱাটো ভাল।
এলকহল
এলকহল মূত্ৰাশয়ত অস্বস্তি বৃদ্ধি কৰিব পাৰে। UTIৰ সময়ত এলকহল এৰাই চলাটো ভাল।
অত্যধিক মছলাযুক্ত খাদ্য
মছলা বেছি থকা খাদ্যই কিছুমান লোকৰ মূত্ৰাশয়ৰ জ্বলা-পোৰা বা অস্বস্তি বৃদ্ধি কৰিব পাৰে। এনে খাদ্য খাই সমস্যা বাঢ়িলে সাময়িকভাৱে বাদ দিয়ক।
বেছি চেনি থকা খাদ্য-পানীয়
অত্যধিক চেনি থকা পানীয় আৰু খাদ্য কমোৱাটো ভাল। NHSৰ মতে, অত্যধিক চেনিযুক্ত খাদ্য-পানীয় নিয়মিত গ্ৰহণ কৰাটো UTIৰ ক্ষেত্ৰত এৰাই চলা উচিত।
কোমল পানীয় আৰু কিছুমান ফলৰ জুচ
ফিজি ড্ৰিংকছ, কেফেইনযুক্ত পানীয় আৰু কিছুমান ফলৰ জুচে মূত্ৰাশয়ত অস্বস্তি বৃদ্ধি কৰিব পাৰে। বিশেষকৈ পানীকে মুখ্য পানীয় হিচাপে লোৱাটো ভাল।
Cranberry juice খালে UTI ভাল হয় নেকি?
Cranberryক লৈ বহু কথা প্ৰচলিত যদিও ই ইতিমধ্যে হোৱা UTI নিৰাময় কৰে বুলি প্ৰমাণ নাই। কিছুমান গৱেষণাত cranberry-এ পুনৰাবৃত্তি হোৱা UTI প্ৰতিৰোধত কিছু সহায় কৰিব পাৰে বুলি ইংগিত পোৱা গৈছে, কিন্তু প্ৰমাণ এতিয়াও নিশ্চিত নহয়। সেয়ে cranberry juice বা supplementক চিকিৎসাৰ বিকল্প হিচাপে ল’ব নালাগে।
কেৱল খাদ্য খাই UTI ভাল কৰিবলৈ চেষ্টা নকৰিব
UTI এটা বেক্টেৰিয়াজনিত সংক্ৰমণ হ’ব পাৰে। সেয়ে কেৱল পানী, জুচ বা ঘৰুৱা উপায়েৰে চিকিৎসা কৰাৰ চেষ্টা কৰি চিকিৎসকৰ পৰামৰ্শ পলম কৰা উচিত নহয়। প্ৰয়োজন অনুসৰি চিকিৎসকে পৰীক্ষা কৰি উপযুক্ত চিকিৎসা, কেতিয়াবা এণ্টিবায়’টিকো দিব পাৰে।
জ্বৰ, কঁপনি, পিঠি বা কঁকালৰ ওপৰৰ ফালে বিষ, প্ৰস্ৰাৱত তেজ, অত্যধিক দুৰ্বলতা বা বমি আদি লক্ষণ দেখা দিলে বিশেষভাৱে সোনকালে চিকিৎসকৰ পৰামৰ্শ লোৱা উচিত, কাৰণ সংক্ৰমণ কিডনীলৈ বিয়পি যাব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
