মাত্ৰ কেইদিনমান আগলৈকে কান্দোন আৰু শোকেৰে ভৰি আছিল এটা পৰিয়াল। কাৰণ পৰিয়ালটোৰ এজন সদস্যই ইহঃসংসাৰ ত্যাগ কৰি বিদায় মাগিছিল এই মায়াৰ ধৰাৰ পৰা। কিন্তু হঠাতে সেই ঘৰখনত সৃষ্টি হ’ল আনন্দৰ পৰিৱেশ। কাৰণ, যিজন ব্যক্তিক মৃত বুলি পৰিয়ালে শেষকৃত্য সম্পন্ন কৰিছিল, তেওঁক হঠাতে জীৱন্ত ৰূপত দেখি আনন্দত আত্মহাৰা হৈ পৰে পৰিয়ালটো। অবিশ্বাস্য যেন লাগিলেও সেয়াই সত্য প্ৰমাণিত হৈছে ৰাজস্থানৰ আজমেৰ জিলাৰ পুষ্কৰত। এই ঘটনাই পৰিয়ালটোক যেন নতুন জীৱন দিলে যদিও আৰক্ষীৰ সন্মুখত এতিয়া সৃষ্টি হৈছে এক ডাঙৰ ৰহস্য। এই ঘটনাৰ পিছতে এতিয়া আটাইতকৈ ডাঙৰ প্ৰশ্ন হৈছে—পৰিয়ালে শ্মশানত দাহ কৰা মৃ*তদেহটো তেনেহলে কাৰ আছিল?
বিগত ২০ ছেপ্টেম্বৰত পুষ্কৰ চৰকাৰী চিকিৎসালয়ৰ পিছফালে আৰক্ষীয়ে এজন অচিনাক্ত যুৱকৰ মৃ*তদেহ উদ্ধাৰ কৰে। মৃ*তদেহটোৰ পকেটত এখন পুৰণি হস্পিতালৰ শ্লীপ পোৱা যায়। সেই শ্লীপখনত শংকৰ ৰায়গৰৰ পুত্ৰ নাথুৰ নাম আৰু ঠিকনা আছিল। আৰক্ষীয়ে শ্লীপখনত থকা যোগাযোগ নম্বৰত ফোন কৰি নাথুৰ পৰিয়ালৰ সৈতে যোগাযোগ কৰে। পিছদিনা, অৰ্থাৎ ২১ ছেপ্টেম্বৰত নাথুৰ ভাতৃ আৰু পুত্ৰ পুষ্কৰ থানাত উপস্থিত হয়।
মৰ্গত থকা মৃ*তদেহটোৰ অৱস্থা তেতিয়া যথেষ্ট বেয়া হৈ পৰিছিল। পৰিয়ালৰ দাবী অনুসৰি, আৰক্ষীয়ে মৃ*তদেহটো ভালদৰে চিনাক্ত কৰাৰ সুযোগ নিদিলে। দুৰ্গন্ধ আৰু মৃ*তদেহৰ অৱস্থাৰ কথা উল্লেখ কৰি খৰখেদাকৈ মৃ*তদেহটো পৰিয়ালৰ হাতত গতাই দিয়া হয়। পুৰণি হাস্পতালৰ শ্লীপখনত নাথুৰ নাম থকাৰ বাবেই পৰিয়ালে মৃ*তদেহটো নাথুৰ বুলি বিশ্বাস কৰে। তাৰ পিছত গভীৰ শোকৰ মাজতে পৰিয়ালে যথাযথ ৰীতি-নীতিৰে তেওঁৰ শেষকৃত্য সম্পন্ন কৰে।
শেষকৃত্য সম্পন্ন কৰাৰ পিছত পৰিয়ালত শোকৰ পৰিৱেশ চলি আছিল। পৰিয়ালৰ লোকসকলে ১২ দিনৰ অনুষ্ঠানৰ বাবে প্ৰয়োজনীয় সামগ্ৰী সংগ্ৰহ কৰাত ব্যস্ত হৈ পৰে। ঠিক সেই সময়তে গাঁৱৰ এজন লোকে পৰিয়ালটোক জনায় যে নাথুক ওচৰৰ এটা অঞ্চলত শ্ৰমিক হিচাপে কাম কৰি থকা দেখা গৈছে। খবৰটো শুনি পৰিয়ালৰ লোকসকল ততাতৈয়াকৈ সেই স্থানত উপস্থিত হয়। তাত গৈ তেওঁলোকে যি দৃশ্য দেখিলে, সেয়া আছিল তেওঁলোকৰ বাবে একেবাৰে অবিশ্বাস্য আছিল। নাথু সুস্থ আৰু জীৱিত অৱস্থাত তাত কাম কৰি আছিল! জীৱিত নাথুক চকুৰ সন্মুখত দেখি পৰিয়ালৰ লোকসকল স্তম্ভিত হৈ পৰে। তেওঁক লগে লগে ঘৰলৈ লৈ অহা হয়। মুহূৰ্ততে শোকত ডুবি থকা ঘৰখনত আনন্দৰ পৰিৱেশ সৃষ্টি হয়।
জানিব পৰা মতে, নাথু পেছাত এগৰাকী নিৰ্মাণ শ্ৰমিক। কামৰ বাবে তেওঁ প্ৰায়ে কাকো বিশেষ খবৰ নিদিয়াকৈ কেইবাদিনো ঘৰৰ পৰা আঁতৰি থাকে। সেয়েহে নাথু বহুদিন ধৰি ঘৰত নথকাত পৰিয়ালৰ লোকসকলৰ বিশেষ সন্দেহ হোৱা নাছিল। কিন্তু আৰক্ষীৰ ওচৰত পোৱা হাস্পতালৰ শ্লীপ আৰু মৃ*তদেহৰ ঘটনাৰ সৈতে নাথুৰ নাম জড়িত হৈ পৰাত পৰিয়ালে মৃ*তদেহটো নাথুৰ বুলি বিশ্বাস কৰিছিল।
নাথু জীৱিত অৱস্থাত উদ্ধাৰ হোৱাৰ পিছতে আৰক্ষীৰ মৃ*তদেহ চিনাক্তকৰণ প্ৰক্ৰিয়াক লৈ বহু প্ৰশ্ন উত্থাপন হৈছে। পুষ্কৰ থানাৰ বিষয়া অশোক বিসুৱে জানিবলৈ দিয়া মতে, অচিনাক্ত মৃ*তদেহটোৰ মৰণোত্তৰ পৰীক্ষাৰ সময়ত আৰক্ষীয়ে ডি এন এ নমুনা সংৰক্ষণ কৰি ৰাখিছিল। এতিয়া সেই ডি এন এ নমুনাৰ পৰীক্ষাৰ জৰিয়তে মৃ*তদেহটো আচলতে কাৰ আছিল, সেই কথা জানিবলৈ চেষ্টা চলোৱা হৈছে। লগতে, নাথুৰ নাম আৰু ঠিকনা থকা হাস্পতালৰ শ্লীপখন মৃতদেহটোৰ পকেটলৈ কেনেকৈ গ’ল আৰু নাথুৰ বুলি ভুল কৰি যিজন অচিনাক্ত ব্যক্তিৰ শেষকৃত্য সম্পন্ন কৰা হ’ল, তেওঁ কোন—এই সকলো প্ৰশ্নৰ উত্তৰ বিচাৰি আৰক্ষীয়ে তদন্ত অব্যাহত ৰাখিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
