ডাকঘৰৰ ৫ খন বিশেষ আঁচনি, যাৰ লাভৰ বিষয়ে আজিও নাজানে বহুতে!

শ্বেয়াৰ মাৰ্কেটত বিনিয়োগ কৰি ডাঙৰ ৰিটাৰ্ণ পাব পাৰি, তথাপিও বজাৰৰ ৰিস্ক আছে। যদি মাৰ্কেট হ্ৰাস হয় তেন্তে আপোনাৰ বিনিয়োগ কৰা ধনৰ মূল্যও কমি যায়। যদি আপুনি বিপদমুক্ত বিনিয়োগ কৰিব বিচাৰে, তেন্তে ডাকঘৰৰ সৰু সৰু সঞ্চয় আঁচনি আপোনাৰ বাবে লাভজনক বিকল্প হ’ব পাৰে। প্ৰতিখন আঁচনিৰ কাৰ্যকাল আৰু সুতৰ হাৰ বেলেগ বেলেগ। আপুনি আপোনাৰ প্ৰয়োজন অনুসৰি আঁচনিখন বাছি ল’ব পাৰে। যদি আপুনি ১ লাখ টকা বিনিয়োগ কৰিব বিচাৰে তেন্তে বেছি ৰিটাৰ্ণ ক’ত পাব?

পাব্লিক প্ৰভিডেন্ট ফাণ্ড (PPF)

যদি আপুনি দীৰ্ঘদিন ধৰি বিনিয়োগ কৰিব বিচাৰে তেন্তে পাব্লিক প্ৰভিডেন্ট ফাণ্ড (PPF) আপোনাৰ বাবে সৰ্বোত্তম বিকল্প। ২০২৬ চনৰ অক্টোবৰৰ পৰা ডিচেম্বৰলৈকে এই ত্ৰৈমাসিকৰ বাবে ৭.১ শতাংশ বাৰ্ষিক সুত উপলব্ধ।আপুনি নূন্যতম ১৫ বছৰৰ বাবে পিপিএফত বিনিয়োগ কৰিব লাগিব। এটা বিত্তীয় বৰ্ষত নূন্যতম ৫০০ টকা আৰু সৰ্বাধিক ১.৫ লাখ টকা জমা কৰিব পাৰিব। প্ৰয়োজন হ’লে কিছুমান চৰ্ত সাপেক্ষে পিপিএফ একাউণ্টৰ পৰা ধন আংশিকভাৱে উলিওৱাৰ ব্যৱস্থাও আছে। ইয়াৰ উপৰিও এই আঁচনিখনত বিনিয়োগৰ বাবে কৰ কৰ্তনৰ ব্যৱস্থাও হ’ব পাৰে। কিন্তু ই প্ৰযোজ্য আয়কৰ নিয়ম আৰু নিৰ্বাচিত কৰ ব্যৱস্থাৰ ওপৰত নিৰ্ভৰ কৰে। প্ৰতি বছৰে পিপিএফত বিনিয়োগ কৰিব লাগিব। যদি আপুনি প্ৰতি বছৰে ১ লাখ টকা বিনিয়োগ কৰে, তেন্তে মেচিউৰিটিৰ সময়ত (এই সুতৰ হাৰত) আপুনি ২৭.১২ লাখ টকা পাব।

ৰাষ্ট্ৰীয় সঞ্চয়ৰ প্ৰমাণ পত্ৰ (NSC)

ৰাষ্ট্ৰীয় সঞ্চয়ৰ প্ৰমাণ পত্ৰ তেতিয়াহে লাভজনক হয় যেতিয়া আপুনি ৫ বছৰৰ দীৰ্ঘ সময়ৰ বাবে ধন জমা কৰিব পাৰে। অক্টোবৰ-ডিচেম্বৰ ত্ৰৈমাসিকত এন এছ চিয়ে লাভ কৰিছে ৭.৭ শতাংশ বাৰ্ষিক সুত। এই আঁচনিখনত প্ৰতি বছৰে সুত জমা কৰা হয় আৰু সাধাৰণতে সম্পূৰ্ণ ধন মেচিউৰিটিৰ সময়ত উপলব্ধ হয়। মাত্ৰ ১০০০ টকাৰে বিনিয়োগ আৰম্ভ কৰিব পাৰি। ইয়াৰ উপৰিও বিনিয়োগকাৰীয়ে প্ৰযোজ্য নিয়ম অনুসৰি কৰ কৰ্তনৰ সুবিধাও লাভ কৰিব পাৰে। ১ লাখ টকা জমা কৰিলে মেচিউৰিটিৰ সময়ত ১,৪৪,৯০৩ টকা পাব।

ডাকঘৰৰ মাহেকীয়া আয় আঁচনি (MIS)

যদি আপুনি প্ৰতিমাহে নিৰ্দিষ্ট পৰিমাণৰ আয় বিচাৰে, তেন্তে আপোনাৰ সৰ্বোত্তম গন্তব্যস্থান হ’ল ডাকঘৰৰ মাহেকীয়া আয় আঁচনি। আপোনাৰ বিনিয়োগৰ ৭.৪ শতাংশ সুত লাভ কৰিব পাৰিব। একক একাউণ্টৰ ক্ষেত্ৰত যৌথ একাউণ্টত সৰ্বাধিক ৯ লাখ ১৫ লাখ টকা জমা কৰিব পাৰিব। মাহেকীয়া আয় আঁচনিত ১ লাখ টকা জমা দিলে প্ৰতিমাহে ৬১৭ টকা পাব।

জ্যেষ্ঠ নাগৰিক সঞ্চয় আঁচনি (SCSS)

জ্যেষ্ঠ নাগৰিক সঞ্চয় আঁচনি জ্যেষ্ঠ নাগৰিকৰ বাবে এক মহান আঁচনি। বৰ্তমান এই আঁচনিখনে সৰ্বাধিক ৮.২ শতাংশ সুতৰ হাৰ আগবঢ়াইছে। প্ৰতি তিনিমাহৰ মূৰে মূৰে একাউণ্টধাৰীৰ একাউণ্টত সুত জমা হয়। এই আঁচনিখনত ৫ বছৰ ধৰি ৰাখিব লাগিব ধন। অৱসৰৰ পিছত যিসকলে নিয়মীয়াকৈ আয়ৰ উৎস বিচাৰে তেওঁলোকে এই সঞ্চয় আঁচনিৰ কথা বিবেচনা কৰিব পাৰে। এই আঁচনিখনত ১ লাখ টকা দিলে মেচিউৰিটিৰ সময়ত ১,৪১,০০০ টকা পাব।

কিষাণ বিকাশ পাত্ৰ (KVP)

যিসকলে নিৰ্দিষ্ট সময়ৰ ভিতৰত সঞ্চয় বৃদ্ধি কৰিব বিচাৰে তেওঁলোকৰ বাবে কিষাণ বিকাশ পাত্ৰ এক বিকল্প। এই আঁচনিখনে ২০২৬ চনৰ অক্টোবৰ-ডিচেম্বৰ ত্ৰৈমাসিকৰ বাবে ৭.৫% বাৰ্ষিক সুতৰ হাৰ আগবঢ়াইছে।বৰ্তমানৰ সুতৰ হাৰত এই আঁচনিৰ বিনিয়োগ ১১৫ মাহত অৰ্থাৎ প্ৰায় ৯ বছৰ ৭ মাহত দুগুণ বৃদ্ধি পায়। মাত্ৰ ১০০০ টকাৰে বিনিয়োগ আৰম্ভ কৰিব পাৰিব। কিন্তু বিনিয়োগ কৰাৰ আগতে এটা কথা মনত ৰাখিব যে এই আঁচনিখনত দীৰ্ঘ সময় ধৰি ধন ৰখা হয় আৰু মেচিউৰিটিৰ পূৰ্বে উলিওৱাৰ ক্ষেত্ৰত কিছুমান নিয়ম প্ৰযোজ্য। ১ লাখ টকা জমা কৰিলে ২ লাখ টকা পাব।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ