গুৱাহাটীৰ বিলাস ইন কাণ্ডৰ মূল অভিযুক্ত ঘনকান্ত গগৈৰ এটাৰ পিছত আনটো চাঞ্চল্যকৰ তথ্য পোহৰলৈ আহিছে। এইবাৰ অভিযুক্তজনৰ প্ৰকৃত পৰিচয়, পূৰ্বৰ ঠিকনা আৰু অতীতৰ কাৰ্যকলাপক লৈ উত্থাপিত তথ্যই ঘটনাটোক লৈ নতুন ৰহস্যৰ সৃষ্টি কৰিছে।
এসময়ত ডিব্ৰুগড়ত ঘৰ বুলি পৰিচয় দিয়া ঘনকান্ত গগৈৰ প্ৰকৃত ঘৰ তিনিচুকীয়া জিলাৰ নাহৰকটীয়াৰ জয়পুৰৰ লেবাং কুলা গাঁৱত বুলি জানিব পৰা গৈছে। আনহাতে, তেওঁৰ প্ৰকৃত নাম জোন গগৈ বুলিও তথ্য পোৱা গৈছে। আধাৰ কাৰ্ডৰ সৈতে প্ৰকৃত পৰিচয়ৰ মিল নাই ঘনকান্তৰ। কেৱল নামেই নহয়, নিজৰ ঠিকনা সন্দৰ্ভতো ভুল তথ্য দিছে অভিযুক্তই।
স্থানীয় তথ্য অনুসৰি, লেবাং কুলা এল পি স্কুলৰ সন্মুখত ঘনকান্তৰ ঘৰ। তেওঁৰ পিতৃৰ নাম প্ৰয়াত মনোজ গগৈ বুলি উল্লেখ কৰা হৈছে। অৱশ্যে, এই পৰিচয় আৰু ঠিকনাৰ তথ্য আৰক্ষীৰ আনুষ্ঠানিক নিশ্চিতকৰণৰ পিছতহে চূড়ান্তভাৱে গ্ৰহণযোগ্য হ’ব।
ঘনকান্ত গগৈৰ অতীতক লৈ উত্থাপিত আন এক গুৰুতৰ অভিযোগে ব্যাপক চাঞ্চল্যৰ সৃষ্টি কৰিছে। অভিযোগ অনুসৰি, তেওঁ অৰুণাচল প্ৰদেশত সংঘটিত ডকাইতিৰ ঘটনাৰ সৈতে জড়িত আছিল। আনকি, আৰক্ষীৰ পোছাক পৰিধান কৰি ডকাইতি সংঘটিত কৰাৰো অভিযোগ আছে।
দাবী কৰা হৈছে যে এই ঘটনাৰ পিছতেই জোন গগৈয়ে নিজৰ নাম সলনি কৰি ঘনকান্ত গগৈ হিচাপে পৰিচয় দিবলৈ আৰম্ভ কৰিছিল। অৱশ্যে, এই অভিযোগৰ সমৰ্থনত কোনো আৰক্ষী গোচৰ, আদালতৰ নথি বা আনুষ্ঠানিক বক্তব্যৰ তথ্য ইয়াত উপলব্ধ নহয়।
ইয়াৰ পূৰ্বে গুৱাহাটীত ছয়জন লোকক গুলীওৱাৰ ঘটনাত অভিযুক্ত ঘনকান্ত গগৈৰ বিৰুদ্ধে পূৰ্বেও অপৰাধৰ অভিযোগ। ২০২৪ চনৰ ১২ জুনত যোৰহাটৰ পুলিবৰত বন্দুক দেখুৱাই স্থানীয় লোকক ভাবুকি দিয়াৰ লগতে মাৰপিট কৰাৰ অভিযোগ উঠিছিল ঘনকান্ত আৰু তেওঁৰ তিনি সহযোগীৰ বিৰুদ্ধে। সেই সময়ত স্থানীয় ৰাইজে ঘনকান্তক আৰক্ষীক গতাই দিছিল। ঘটনা সন্দৰ্ভত পুলিবৰ থানাত এজাহাৰ দাখিল কৰা হৈছিল।
গাড়ীত কিয় লিখিছিল ‘PRESS’?
বিলাস ইন কাণ্ডৰ অভিযুক্ত ঘনকান্ত গগৈৰ বাহনখনক লৈও এতিয়া প্ৰশ্ন উত্থাপন হৈছে। প্ৰকাশিত তথ্য অনুসৰি, তেওঁ হেৰিয়াৰ বাহন ব্যৱহাৰ কৰি ঘূৰি ফুৰিছিল। য’ত বাহনখনত ‘PRESS’ বুলি লিখা আছিল।
কিন্তু গাড়ীখনত কিয় ‘PRESS’ লিখা হৈছিল? তেওঁ কোনো সংবাদ মাধ্যমৰ সৈতে জড়িত আছিল নেকি, নে আন কোনো কাৰণত বাহনখনত এই শব্দটো ব্যৱহাৰ কৰিছিল? এই প্ৰশ্নসমূহৰ এতিয়াও স্পষ্ট উত্তৰ পোৱা হোৱা নাই।
তথ্য অনুসৰি, বাহনখন এতিয়াও গুৱাহাটীৰ সাউকুছিত থকা ভাড়াঘৰটোতে আছে বুলি জানিব পৰা গৈছে। বাহনখনৰ পঞ্জীয়ন, মালিকীস্বত্ব আৰু ‘PRESS’ লিখাৰ আঁৰৰ কাৰণ তদন্তৰ আওতালৈ আহিলে এই সন্দৰ্ভত অধিক তথ্য পোহৰলৈ অহাৰ সম্ভাৱনা আছে।
এতিয়া সকলোৰে দৃষ্টি তদন্তৰ পৰৱৰ্তী অগ্ৰগতিৰ ওপৰত। ‘PRESS’ লিখা বাহনখনৰ আঁৰৰ ৰহস্য, ঘনকান্ত গগৈৰ প্ৰকৃত পৰিচয় আৰু তেওঁৰ অতীতক লৈ উত্থাপিত অভিযোগসমূহৰ সত্যতা তদন্তৰ পিছতহে স্পষ্ট হ’ব।
(এই তথ্য যুগুতাইছে বৰষা মিশ্ৰই)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
