টেলিভিছনৰ জনপ্ৰিয় অভিনেত্ৰী স্মিতা বংশলে স্বামী তথা পৰিচালক অংকুশ মোহলাৰ সৈতে পুনৰ বৈদিক ৰীতিৰে বিৱাহৰ মাংগলিক অনুষ্ঠান সম্পূৰ্ণ কৰিলে। গোৱাক অনুষ্ঠিত বিৱাহৰ এই অনুষ্ঠানত বগা ৰঙৰ বিবাহৰ সাজ-পোছাক পৰিধান কৰি তেওঁলোকে ‘হোৱাইট ৱেডিং’ শৈলীত এই বিশেষ মুহূৰ্ত উদযাপন কৰে। পুনৰবাৰ দম্পতীটোৱে বিৱাহৰ মাংগলিক অনুষ্ঠানৰ আয়োজন কৰাৰ মূলতে আছিল তেওঁলোকৰ এটা বিশেষ দিন। কাৰণ এই দিনটোতে তেওঁলোকৰ বিৱাহৰ ২৫ বছৰ সম্পূৰ্ণ কৰিলে। এই বিশেষ দিনটো স্মৰণীয় কৰি ৰাখিবলৈ দম্পতীটোৱে গোৱাত পুনৰ বিয়াৰ অনুষ্ঠানৰ আয়োজন কৰে।
স্মিতা আৰু অংকুশৰ এই সুন্দৰ উদযাপনৰ কেইবাখনো ফটো আৰু ভিডিঅ’ ছ’চিয়েল মিডিয়াত শ্বেয়াৰ কৰিছে তেওঁলোকৰ উদ্যোগৰ বন্ধু-বান্ধৱীসকলে। ফটো এখনত অংকুশে পত্নী স্মিতাৰ গালত চুমা খোৱা দেখা গৈছে। আনহাতে, বগা ৰঙৰ ব্ৰাইডেল গাউন পিন্ধি স্মিতাক হাঁহিমুখে দেখা গৈছে। অংকুশেও গাঢ় ৰঙৰ ছ্যুট পৰিধান কৰি পত্নীক মৰমেৰে সাবটি ধৰিছে।
আন এটা ভিডিঅ’ত সাগৰৰ পাৰত ফুলেৰে সজোৱা মণ্ডপৰ তলত দুয়োকে একেলগে নৃত্য কৰা দেখা গৈছে। মুকলি আকাশৰ তলত আয়োজন কৰা এই অনুষ্ঠানৰ পৰিৱেশো আছিল অতি মনোমোহা। ক্ৰীম ৰঙৰ কাপোৰেৰে সজোৱা কাঠৰ চকীৰ শাৰী, বিভিন্ন ফুলৰ সজ্জা আৰু সুন্দৰকৈ সজাই তোলা অনুষ্ঠানস্থলীয়ে সকলোৰে দৃষ্টি আকৰ্ষণ কৰিছিল।
অনুষ্ঠানস্থলীত ‘অংকুশ এণ্ড স্মিতা’ নামৰ লগতে ২৬ অক্টোবৰৰ তাৰিখ উল্লেখ থকা এখন সজ্জিত ফলকো ৰখা হৈছিল। বিৱাহৰ ২৫ বছৰ সম্পূৰ্ণ হোৱাৰ আনন্দ উদযাপনৰ কথাও তাত উল্লেখ কৰা হৈছিল। স্মিতা আৰু অংকুশৰ এই বিশেষ অনুষ্ঠানত টেলিভিছনৰ অভিনেত্ৰী নেহা মাৰ্দাই অংশগ্ৰহণ কৰে। ইয়াৰ উপৰি সংগীতা ঘোষ, জয়তী ভাটিয়া আৰু টেলিভিছন জগতৰ আন কেইবাগৰাকীও তাৰকাই অনুষ্ঠানটোৰ ফটো আৰু ভিডিঅ’ ছ’চিয়েল মিডিয়াত শ্বেয়াৰ কৰে।
উল্লেখ্য যে স্মিতা বংশল আৰু অংকুশ মোহলাৰ বিৱাহ হৈছিল ২০০০ চনৰ ৮ ডিচেম্বৰত। তেওঁলোকৰ স্তাশা আৰু অনাঘা নামৰ দুগৰাকী কন্যা সন্তান আছে। দীৰ্ঘ ২৫ বছৰীয়া বৈৱাহিক জীৱনৰ এই বিশেষ মুহূৰ্তক পুনৰ বিয়াৰ মাধ্যমেৰে উদযাপন কৰি দম্পতীটোৱে নিজৰ সম্পৰ্কৰ মধুৰতা প্ৰকাশ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
