অভিনেত্ৰী ছাৰা আলী খানৰ কেদাৰনাথ মন্দিৰ ভ্ৰমণক লৈ নতুন বিতৰ্কৰ সৃষ্টি হৈছে। অভিনেত্ৰীগৰাকীয়ে মন্দিৰ দৰ্শন কৰি প্ৰাৰ্থনা কৰাক লৈ উত্তৰ প্ৰদেশৰ ইছলামিক ধৰ্মগুৰু মৌলানা মুফতি চাহাবুদ্দিন ৰাজৱী বাৰেলৱীয়ে আপত্তি প্ৰকাশ কৰিছে। আন ধৰ্মৰ উপাসনাস্থলীত গৈ প্ৰাৰ্থনা কৰাটো ইছলামিক বিধান অনুসৰি অনুমোদিত নহয় বুলি মন্তব্য কৰি তেওঁ ছাৰাৰ বিৰুদ্ধে ফতোৱা জাৰি কৰিছে।
উল্লেখ্য যে, ২৫ অক্টোবৰত ছাৰা আলী খানক কেদাৰনাথ মন্দিৰৰ বাহিৰত দৰ্শনৰ বাবে শাৰী পাতি থকা দেখা গৈছিল। মন্দিৰত প্ৰাৰ্থনা কৰাৰ পাছত অভিনেত্ৰীগৰাকীক হাতযোৰ কৰি থকা অৱস্থাতো দেখা যায়। এই ঘটনাৰ পাছতে তেওঁৰ মন্দিৰ ভ্ৰমণক লৈ ধৰ্মীয় মহলত চৰ্চা আৰম্ভ হয়।
ছাৰাক তওবা কৰিবলৈ আহ্বান মৌলানাৰ
এটা ভিডিঅ’ বিবৃতিত মৌলানা মুফতি চাহাবুদ্দিন ৰাজৱী বাৰেলৱীয়ে কয় যে, ইছলামিক শ্বৰীয়ত অনুসৰি আন ধৰ্মৰ উপাসনাৰ সৈতে জড়িত হোৱাটো অনুমোদিত নহয় আৰু তেওঁ ইয়াক ‘হাৰাম’ বুলি অভিহিত কৰে। তেওঁ ছাৰা আলী খানক আল্লাহৰ ওচৰত তওবা কৰিবলৈও আহ্বান জনায়। মৌলানাগৰাকীয়ে কয় যে অভিনেত্ৰীগৰাকীয়ে নিজৰ ভুল স্বীকাৰ কৰি তওবা কৰা উচিত। তেওঁ উল্লেখ কৰে যে কেদাৰনাথ মন্দিৰত ছাৰাই পূজা-অৰ্চনা কৰাটো শ্বৰীয়ত অনুসৰি জায়েজ হয় নে নহয়, সেই বিষয়ে কেইবাজনো যুৱকে তেওঁক প্ৰশ্ন কৰিছিল।
পূৰ্বেও বিতৰ্কৰ সন্মুখীন হৈছিল ছাৰা
কেদাৰনাথ মন্দিৰ ভ্ৰমণক লৈ ধৰ্মীয় মহলৰ সমালোচনাৰ সন্মুখীন হোৱা এয়াই প্ৰথম ঘটনা নহয়। ছাৰা আলী খান বিগত কেইবাবছৰ ধৰি নিয়মীয়াকৈ কেদাৰনাথলৈ গৈ আহিছে। অভিনেতা ছৈফ আলী খান আৰু অভিনেত্ৰী অমৃতা সিঙৰ কন্যা ছাৰাৰ প্ৰথম ছবি আছিল ‘কেদাৰনাথ’। ২০১৮ চনত মুক্তি পোৱা এই ছবিখনত তেওঁ প্ৰয়াত অভিনেতা সুশান্ত সিং ৰাজপুতৰ সৈতে অভিনয় কৰিছিল। ছবিখনৰ মুক্তিৰ সময়তো উত্তৰাখণ্ডৰ কেইবাটাও সোঁপন্থী সংগঠনে ছবিখনক লৈ আপত্তি প্ৰকাশ কৰিছিল।
অহিন্দু দৰ্শনাৰ্থীৰ বাবে শপতনামা বাধ্যতামূলক
ইফালে, বদ্ৰীনাথ আৰু কেদাৰনাথ মন্দিৰ পৰিচালনা কৰা বদ্ৰীনাথ-কেদাৰনাথ মন্দিৰ সমিতিয়ে মন্দিৰত প্ৰাৰ্থনা কৰিব বিচৰা অহিন্দু দৰ্শনাৰ্থীৰ বাবে শপতনামা দাখিল কৰাটো বাধ্যতামূলক কৰিছে। বদ্ৰীনাথ-কেদাৰনাথ মন্দিৰ সমিতিৰ মুখ্য কাৰ্যবাহী বিষয়া চোহন সিং ৰেংগাৰে সদৰী কৰা মতে ছাৰা আলী খানৰ দলেও তেওঁৰ মন্দিৰ ভ্ৰমণৰ পূৰ্বে প্ৰয়োজনীয় শপতনামা দাখিল কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
