জন্মদিনৰ পাৰ্টিলৈ নিয়াৰ অজুহাতেৰে তিনিগৰাকী নাবালিকাক লৈ গৈ দুগৰাকী ভগ্নীক দলবদ্ধ ধ*ৰ্ষণ কৰাৰ অভিযোগ উত্থাপন হৈছে ৪ লম্পটৰ বিৰুদ্ধে। আনহাতে, লগত থকা তৃতীয়গৰাকী নাবালিকাই কোনোমতে পলায়ন কৰি নিজৰ জীৱন ৰক্ষা কৰিবলৈ সক্ষম হয়। এই ঘটনাৰ পিছতে আৰক্ষীয়ে তদন্ত আৰম্ভ কৰিছে। ইতিমধ্যে ৩ অভিযুক্তক আটক কৰা হৈছে আৰু চতুৰ্থজনৰ সন্ধানত অভিযান অব্যাহত আছে। এই ঘটনা সংঘটিত হৈছে ঝাৰখণ্ডৰ খুঁটি জিলাত।
প্ৰাথমিক তথ্য অনুসৰি, খুঁটি জিলাৰ মুৰহু থানা এলেকাত সংঘটিত হৈছে এই ঘটনা। অভিযোগ অনুসৰি, কিছুদিন পূৰ্বে দুগৰাকী নাবালিকা ভগ্নীয়ে এজন যুৱকৰ সৈতে চিনাকি হৈছিল। পৰৱৰ্তী সময়ত যুৱকজনে জন্মদিনৰ পাৰ্টিত অংশগ্ৰহণ কৰাৰ লগতে ফুৰিবলৈ যোৱাৰ প্ৰস্তাৱ দিয়ে। এই প্ৰস্তাৱৰ ভিত্তিত দুগৰাকী ভগ্নী আৰু তেওঁলোকৰ এগৰাকী নাবালিকা বান্ধৱী যুৱকজনৰ সৈতে যাবলৈ সন্মত হয়। ইয়াৰ পিছতে যুৱকজনে আন তিনিজন বন্ধুকো ফোন কৰি মাতি আনে।
অভিযোগ অনুসৰি, চাৰিজন যুৱকে তিনিগৰাকী নাবালিকাক এখন বাইক আৰু এখন স্কুটাৰত উঠাই মৰাংহাড়া অঞ্চলৰ এখন গাঁৱলৈ লৈ যায়। তাত সকলোৱে একেলগে খাদ্য গ্ৰহণ কৰে। তাৰ পিছত ফুৰিবলৈ নিয়াৰ অজুহাতেৰে নাবালিকাকেইগৰাকীক এটা নিৰ্জন স্থানলৈ লৈ যোৱা হয়। অভিযোগ অনুসৰি, নিৰ্জন স্থানত চাৰিজন যুৱকে দুগৰাকী নাবালিকা ভগ্নীৰ ওপৰত যৌ*ন নিৰ্যাতন চলায়। সেই সময়তে লগত থকা তৃতীয়গৰাকী নাবালিকাই পৰিস্থিতিৰ ভয়াৱহতা বুজি পায় আৰু পলায়ন কৰে। কোনোমতে সেই স্থানৰ পৰা পলাই যাবলৈ সক্ষম হয় নাবালিকাগৰাকী। পিছত ঘৰলৈ উভতি আহি পৰিয়ালৰ লোকক ঘটনাৰ বিষয়ে অৱগত কৰে। পৰিয়ালৰ লোকসকলে বিষয়টো আৰক্ষীক জনোৱাৰ পিছতে আৰক্ষীয়ে তদন্ত আৰম্ভ কৰে।
ঘটনাটোৰ সন্দৰ্ভত খুঁটি মহিলা আৰক্ষী থানাত গোচৰ ৰুজু কৰা হৈছে। আৰক্ষীয়ে POCSO আইনসহ অন্যান্য প্ৰাসংগিক ধাৰাত গোচৰ ৰুজু কৰি তদন্ত অব্যাহত ৰাখিছে। এই পৰ্যন্ত আৰক্ষীয়ে তিনিজন অভিযুক্তক আটক কৰিছে। অভিযুক্তকেইজনক গোপাল মুণ্ডা ওৰফে ৰাহুল, মনীষ লোহাৰা আৰু মানছা বুলি চিনাক্ত কৰা হৈছে। আনহাতে, চতুৰ্থজন অভিযুক্ত বৰ্তমানেও পলাতক অৱস্থাত আছে। ঘটনাৰ পিছতে আৰক্ষীয়ে দুয়োগৰাকী ভুক্তভোগী নাবালিকাক চিকিৎসা পৰীক্ষাৰ বাবে চিকিৎসালয়লৈ প্ৰেৰণ কৰে। আনহাতে, আটকাধীন তিনিজন অভিযুক্তক জেৰা কৰি ঘটনাৰ সম্পূৰ্ণ তথ্য সংগ্ৰহৰ চেষ্টা চলাইছে আৰক্ষীয়ে।
কেনেদৰে ঘটনাটো সংঘটিত হৈছিল, অভিযুক্তসকলৰ প্ৰত্যেকৰে ভূমিকা কি আছিল আৰু আন কোনো ব্যক্তি এই ঘটনাৰ সৈতে জড়িত আছে নেকি, সেই সকলো দিশ তদন্ত কৰি থকা হৈছে। বৰ্তমান মহিলা আৰক্ষী থানাত গোচৰটোৰ তদন্ত অব্যাহত আছে। পলাতক অভিযুক্তজনক গ্ৰেপ্তাৰ কৰাৰ লগতে ভুক্তভোগীসকলক ন্যায় প্ৰদানৰ বাবে আৰক্ষীয়ে প্ৰয়োজনীয় ব্যৱস্থা গ্ৰহণ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
