আজি গুৱাহাটীত সংগীত পৰিৱেশন কৰিব Guns N’ Roses-এ। ইতিমধ্যে বিশ্বৰ বিভিন্ন প্ৰান্তৰ প্ৰবাসী অসমীয়াকে ধৰি দেশৰ বিভিন্ন প্ৰান্তৰ লোক আহি গুৱাহাটীত ভিৰ কৰিছে। বিশ্বৰ ৰক সংগীতৰ ইতিহাসত যিকেইটা বেণ্ডে নিজৰ এক সুকীয়া পৰিচয় গঢ়ি তুলিবলৈ সক্ষম হৈছে, তাৰ ভিতৰত অন্যতম হৈছে ‘গানছ এন ৰোজেছ’ (Guns N’ Roses)। ১৯৮৫ চনত আমেৰিকাৰ লছ এঞ্জেলছত গঠন হোৱা এই বেণ্ডটোৱে বিগত চাৰিটা দশক ধৰি সংগীত জগতত নিজৰ আধিপত্য অব্যাহত ৰাখিছে। কেৱল সংগীতেই নহয়, ব্যৱসায়িক সামগ্ৰীৰ বিক্ৰী, বিভিন্ন ব্ৰেণ্ডৰ সৈতে সহযোগিতা আৰু বিশ্বজুৰি সংগীতানুষ্ঠানৰ জৰিয়তেও বেণ্ডটোৱে বিপুল পৰিমাণৰ ধন উপাৰ্জন কৰিবলৈ সক্ষম হৈছে।
আটাইতকৈ উল্লেখযোগ্য কথাটো হ’ল, ৪০ বছৰতকৈও অধিক সময় পাৰ হোৱাৰ পিছতো বেণ্ডটোৰ জনপ্ৰিয়তা হ্ৰাস পোৱা নাই। আজিও বিশ্বৰ বিভিন্ন প্ৰান্তত তেওঁলোকৰ সংগীতৰ অনুৰাগী আছে। নতুন প্ৰজন্মৰ মাজতো তেওঁলোকৰ গীতৰ জনপ্ৰিয়তা অব্যাহত আছে।
সংগীতৰ জৰিয়তে বিশ্বজুৰি সাফল্য
১৯৮৭ চনত মুক্তি লাভ কৰা ‘এপেটাইট ফৰ ডেষ্ট্ৰাকচন’ (Appetite for Destruction) আছিল গানছ এন ৰোজেছৰ কেৰিয়াৰৰ অন্যতম সফল এলবাম। এই এলবামটোৱে আমেৰিকাৰ সংগীত জগতত এক নতুন অভিলেখ সৃষ্টি কৰিছিল। আমেৰিকাৰ চাৰ্টৰ ইতিহাসত ই সৰ্বাধিক বিক্ৰী হোৱা প্ৰথম এলবাম হিচাপে পৰিগণিত হৈছিল। বিশ্বজুৰি এলবামটোৰ প্ৰায় ৩ কোটি কপি বিক্ৰী হৈছিল।
ইয়াৰ পিছত ১৯৯১ চনত বেণ্ডটোৱে একেলগে ‘ইউজ ইউৰ ইলুজন-১’ (Use Your Illusion I) আৰু ‘ইউজ ইউৰ ইলুজন-২’ (Use Your Illusion II) নামৰ দুটা এলবাম মুকলি কৰে। এই দুয়োটা এলবামে মুক্তিৰ প্ৰথম সপ্তাহতে বিলবোৰ্ড ২০০ৰ তালিকাত ক্ৰমে প্ৰথম আৰু দ্বিতীয় স্থান লাভ কৰি বিশেষ চৰ্চা লাভ কৰিছিল। আনহাতে, ১৯৮৮ চনত মুক্তি পোৱা ‘জি এন আৰ লাইছ’ (G N’ R Lies) এলবামটোৰো বিশ্বজুৰি প্ৰায় এক কোটি কপি বিক্ৰী হৈছিল। এইদৰে কেইবাটাও সফল এলবামৰ জৰিয়তে গানছ এন ৰোজছে বিশ্বৰ সংগীত অনুৰাগীৰ মাজত এক শক্তিশালী স্থান দখল কৰিবলৈ সক্ষম হয়। সমগ্ৰ কেৰিয়াৰত বেণ্ডটোৱে বিশ্বজুৰি ১০ কোটিৰো অধিক ৰেকৰ্ড বিক্ৰী কৰিছে।
বিশ্ব ভ্ৰমণৰ পৰাও বিপুল উপাৰ্জন
গানছ এন ৰোজছৰ উপাৰ্জনৰ অন্যতম বৃহৎ উৎস হৈছে বিশ্বজুৰি অনুষ্ঠিত কৰা সংগীতানুষ্ঠান আৰু কনচাৰ্ট। ২০১৬ চনৰ পৰা ২০১৯ চনলৈ অনুষ্ঠিত হোৱা ‘নট ইন দিছ লাইফটাইম ট্যুৰ’ (Not in This Lifetime Tour) আছিল বেণ্ডটোৰ ইতিহাসৰ অন্যতম সফল সংগীত ভ্ৰমণ। দীৰ্ঘদিনৰ পিছত বেণ্ডটোৰ কেইবাগৰাকীও পুৰণি সদস্য পুনৰ একেলগে সংগীত পৰিৱেশন কৰিবলৈ অহাৰ বাবে এই ভ্ৰমণক লৈ অনুৰাগীৰ মাজত ব্যাপক উৎসাহ দেখা গৈছিল।
এই ভ্ৰমণৰ সময়ছোৱাত মুঠ ১৫৮টা সংগীতানুষ্ঠান অনুষ্ঠিত হৈছিল আৰু তাৰ পৰা প্ৰায় ৫৮৪ মিলিয়ন ডলাৰ উপাৰ্জন হৈছিল। ২০১৯ত ভাৰতীয় মুদ্ৰাত এই পৰিমাণ প্ৰায় ৪,১১৩ কোটি টকা। এই বিপুল উপাৰ্জনৰ ফলত সংগীতৰ ইতিহাসৰ সৰ্বাধিক উপাৰ্জনকাৰী ভ্ৰমণসমূহৰ ভিতৰত ইয়াৰ স্থান ১১ নম্বৰত আছিল। ইয়াৰ পিছতো বেণ্ডটোৱে সংগীত পৰিৱেশন অব্যাহত ৰাখিছে। পৰৱৰ্তী সময়ত তেওঁলোকে আৰু ৩৪৬টা সংগীতানুষ্ঠান অনুষ্ঠিত কৰিছে। অৰ্থাৎ, চাৰিটা দশকৰো অধিক সময় পাৰ হোৱাৰ পিছতো তেওঁলোকৰ মঞ্চত সংগীত পৰিৱেশন কৰাৰ আগ্ৰহ আৰু ব্যৱসায়িক সফলতা দুয়োটাই অব্যাহত আছে।
কেৱল সংগীত নহয়, ব্যৱসায়ৰ পৰাও উপাৰ্জন
গানছ এন ৰোজেছৰ সফলতা কেৱল এলবাম বিক্ৰী বা কনচাৰ্টৰ উপাৰ্জনৰ মাজতে সীমাবদ্ধ নহয়। সময়ৰ লগে লগে বেণ্ডটোৰ নাম আৰু প্ৰতিচ্ছবিয়েই এক শক্তিশালী ব্ৰেণ্ডত পৰিণত হৈছে। বেণ্ডটোৰ নাম আৰু ল’গ’ ব্যৱহাৰ কৰি বিভিন্ন ধৰণৰ ব্যৱসায়িক সামগ্ৰী প্ৰস্তুত আৰু বিক্ৰী কৰা হয়। ইয়াৰ ভিতৰত টি-চাৰ্ট, ভিনাইল ৰেকৰ্ড, স্মৃতিগ্ৰন্থ আদি উল্লেখযোগ্য। অনুৰাগীসকলৰ মাজত এই সামগ্ৰীসমূহৰ যথেষ্ট চাহিদা আছে।
ইয়াৰ উপৰি ডিজিটেল মনোৰঞ্জনৰ জগততো বেণ্ডটোৱে নিজৰ উপস্থিতি সাব্যস্ত কৰিছে। ২০১৬ চনত গেম ডেভেলপাৰ নেটএণ্টে (NetEnt) গানছ এন ৰোজেছৰ সংগীত আৰু প্ৰতিচ্ছবিৰ আধাৰত এটা কেচিনো গেম মুকলি কৰিছিল। এই গেমটোত ‘ৱেলকাম টু দ্য জংগল’ (Welcome to the Jungle)ৰ দৰে জনপ্ৰিয় গীত অন্তৰ্ভুক্ত কৰা হৈছিল। আনকি বেণ্ডটোৰ জনপ্ৰিয় গীটাৰিষ্ট স্লেছৰ প্ৰতিচ্ছবিও গেমটোত ব্যৱহাৰ কৰা হৈছিল।
ফেশ্বন উদ্যোগতো গানছ এন ৰোজেছৰ জনপ্ৰিয়তাৰ প্ৰভাৱ পৰিছে। অফ-হোৱাইট, ৰিপ্ৰেজেণ্ট, প্ৰাইমাৰ্ক আৰু এইচ এণ্ড এমৰ দৰে আগশাৰীৰ ফেশ্বন ব্ৰেণ্ডৰ সৈতে বেণ্ডটোৱে সহযোগিতা আগবঢ়াইছে। এনে সহযোগিতাৰ জৰিয়তে বেণ্ডটোৱে সংগীতৰ বাহিৰতো নিজৰ ব্যৱসায়িক পৰিসৰ বৃদ্ধি কৰিছে।
২০২৬ চনতো অব্যাহত আছে উপাৰ্জনৰ ধাৰা
বেণ্ডটো গঠন হোৱাৰ ৪০ বছৰতকৈও অধিক সময় পাৰ হোৱাৰ পিছতো তেওঁলোকৰ জনপ্ৰিয়তা আৰু উপাৰ্জনৰ ধাৰা অব্যাহত আছে। ২০২৬ চনৰ বিশ্ব ভ্ৰমণেও বেণ্ডটোৰ বাবে বৃহৎ পৰিমাণৰ উপাৰ্জনৰ সম্ভাৱনা কঢ়িয়াই আনিছে। ইয়াৰ সমান্তৰালভাৱে ব্যৱসায়িক সামগ্ৰীৰ বিক্ৰীৰ পৰাও বেণ্ডটোৱে ধন উপাৰ্জন কৰি আহিছে। প্ৰাইমাৰ্ক আৰু এইচ এণ্ড এমৰ দৰে ব্ৰেণ্ডৰ সৈতে সহযোগিতাৰ ফলত বিভিন্ন দেশৰ বজাৰত গানছ এন ৰোজছৰ নাম থকা টি-চাৰ্ট আৰু অন্যান্য সামগ্ৰী সহজে উপলব্ধ হৈছে।
আনহাতে, ডিজিটেল মাধ্যমৰ পৰাও বেণ্ডটোৰ উপাৰ্জন অব্যাহত আছে। স্পটিফাই, এপল মিউজিক আৰু ইউটিউব মিউজিকৰ দৰে সংগীত ষ্ট্ৰীমিং প্লেটফৰ্মত আজিও তেওঁলোকৰ গীত কোটি কোটি বাৰ শুনা হয়। প্ৰতিটো ষ্ট্ৰীমৰ বিপৰীতে লাভ কৰা ধনৰ পৰাও বেণ্ডটোৱে নিয়মীয়াকৈ ৰাজহ লাভ কৰি আহিছে।
সংগীত জগতত এক বিশেষ উত্তৰাধিকাৰ
গানছ এন ৰোজছৰ সফলতা কেৱল তেওঁলোকৰ জনপ্ৰিয় গীতসমূহৰ বাবেই নহয়, সংগীতক কেনেদৰে এক বৃহৎ ব্যৱসায়িক ক্ষেত্ৰলৈ ৰূপান্তৰ কৰিব পাৰি, তাৰো এক উল্লেখযোগ্য উদাহৰণ। এটা ৰক বেণ্ডে সংগীতৰ উপৰি নিজৰ নাম, ল’গ’, সাজ-পোছাক, ব্যৱসায়িক সামগ্ৰী আৰু বিভিন্ন প্ৰতিষ্ঠানৰ সৈতে সহযোগিতাৰ জৰিয়তে কেনেদৰে দীৰ্ঘদিন ধৰি উপাৰ্জন অব্যাহত ৰাখিব পাৰে, সেয়া গানছ এন ৰোজছে প্ৰমাণ কৰিছে।
১৯৮০ৰ দশকত সংগীত জগতত আত্মপ্ৰকাশ কৰা এই বেণ্ডটোৱে আজিও বিশ্বৰ অন্যতম জনপ্ৰিয় ৰক বেণ্ড হিচাপে নিজৰ স্থান অক্ষুণ্ণ ৰাখিছে। নতুন নতুন সংগীতশিল্পীৰ আগমন ঘটিলেও তেওঁলোকৰ জনপ্ৰিয়তাত বিশেষ প্ৰভাৱ পৰা নাই। আটাইতকৈ আকৰ্ষণীয় কথাটো হ’ল, ৪০ বছৰতকৈও অধিক সময় ধৰি সংগীতৰ সৈতে জড়িত হৈ থকাৰ পিছতো তেওঁলোকে এতিয়াও বিশ্বৰ বিভিন্ন প্ৰান্তত সংগীতানুষ্ঠান অনুষ্ঠিত কৰি আছে আৰু কোটি কোটি টকাৰ ব্যৱসায়িক উপাৰ্জন অব্যাহত ৰাখিছে। সেয়েহে গানছ এন ৰোজেছৰ কাহিনী কেৱল এটা সফল ৰক বেণ্ডৰ কাহিনী নহয়, বৰং সংগীত, জনপ্ৰিয়তা আৰু ব্যৱসায়িক সফলতাৰ এক অনন্য নিদৰ্শন।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















