এগৰাকী ৬ বছৰীয়া শিশু কন্যাক ৬৫ বছৰীয়া এক বৃদ্ধই ধৰ্ষণ কৰাৰ এক ঘটনা পোহৰলৈ আহিছে৷
ঘটনাৰ বিৱৰণীৰ মতে ৰাজস্থানৰ আলৱাৰ জিলাৰ এখন গাঁৱৰ ৬ বছৰীয়া শিশুটিয়ে সমীপৰ ঘৰৰ বিবাহ অনুষ্ঠানত আহাৰ গ্ৰহণ কৰি উভতি অহাৰ সময়তে বৃদ্ধজনে এই জঘন্য কাণ্ড সংঘটিত কৰে৷
ঘটনাৰ পিছতে শিশুটিয়ে ঘৰলৈ আহি কান্দি কান্দি পৰিয়ালৰ লোকক ঘটনাৰ বিষয়ে অৱগত কৰে৷ ঘটনাৰ বিষয়ে অৱগত হোৱাৰ পিছতে শিশুটিৰ পৰিয়ালৰ লোকে অভিযুক্তক ঘৰত বিচাৰি যায় যদিও তেওঁলোকক যোৱাৰ সম্ভেদ পাই ঘৰৰ পৰা পলায়ন কৰে৷
লগতে পঢ়ক ধ্বংস হ’ব প্ৰাকৃতিক ভূস্বৰ্গ কাশ্মীৰৰ সৌন্দৰ্য! কোনে লৈছে ধ্বংস যজ্ঞৰ নেতৃত্ব?
ইফালে ঘটনাটো গাপ দিয়াৰ লগতে মীমাংসা কৰিবলৈ গাঁও প্ৰধানে ভুক্তভোগী পৰিয়ালটোৰ ওপৰত হেঁচা প্ৰয়োগ কৰাৰো অভিযোগ উঠিছে৷ অৱশেষত গাঁও প্ৰধানৰ হেঁচাক আওকাণ কৰি ভুক্তভোগী শিশুটিৰ পৰিয়ালে ঘটনাৰ তিনি দিনৰ পিছত স্থানীয় আৰক্ষী থানাত অভিযুক্তৰ বিৰুদ্ধে এজাহাৰ দাখিল কৰে৷
আৰক্ষীয়ে উক্ত এজাহাৰৰ ভিত্তিত অভিযুক্ত বৃদ্ধগৰাকীৰ বিৰুদ্ধে বিভিন্ন ধাৰাত গোচৰ ৰুজু কৰি কৰায়ত্ত কৰিবলৈ এক অভিযান চলাই যদিও পলাতক অভিযুক্তগৰাকীক কৰায়ত্ত কৰিবলৈ সক্ষম হোৱা নাই৷
আৰক্ষীয়ে প্ৰকাশ কৰা মতে যে ভুক্তভোগী শিশুটিক স্বাস্থ্য অৱনতি ঘটাত স্থানীয় চিকিৎসালয়ত ভৰ্তি কৰোৱা হৈছে আৰু চিকিৎসকে শিশুটি ধৰ্ষণৰ বলি হোৱাটো নিশ্চিত কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
