ৰিমলী বৰকটকীঃ তামিল ভাষাৰ এই চিনেমাখনৰ নামটো চিনেমাৰ মূখ্য চৰিত্ৰৰ নামেৰে নামাঙ্কৃত কৰা হৈছে। গতিকে, নামৰ পৰাই বুজিবলৈ কিছু সহজ যে এইখন এখন নাৰীকেন্দ্ৰিক চিনেমা। হয়, নাৰীজনিত অপৰাধকেন্দ্ৰিক, উৎকন্ঠাধৰ্মী ছবি গাৰ্গী। গত জুলাই মাহত মুক্তিপ্ৰাপ্ত ছবিখনৰ পৰিচালনা কৰিছে গৌথম ৰামচন্দ্ৰনে। যুটীয়াভাৱে কাহিনী আৰু চিত্ৰনাট্য লিখিছে হৰিহৰণ ৰাজু আৰু গৌতম ৰামচন্দ্ৰনে। মুখ্য চৰিত্ৰ অৰ্থাৎ গাৰ্গীৰ নাম ভূমিকাত অভিনয় কৰিছে ছাই পল্লবীয়ে। ছবিখন বৰ্তমান চ’নী লিভত উপলব্ধ।
অপৰাধী এজন ন্যায়িকভাৱে দোষী সাব্যস্ত হোৱা আৰু শাস্তি পোৱা যিমানে জৰুৰী, ঠিক সিমানেই নিৰপৰাধী এজন দোষমুক্ত হোৱাও সমানেই জৰুৰী। গাৰ্গী এগৰাকী স্কুলৰ শিক্ষয়িত্ৰী। খুব সাধাৰণভাৱে চলি যোৱা গাৰ্গী আৰু গাৰ্গীৰ পৰিয়ালৰ স্বাভাৱিক জীৱনযাত্ৰাৰে চিনেমাৰ এক সহজ আৰম্ভণি।
এটি এপাৰ্টমেন্টত ছিকিউৰিটি গাৰ্ডৰ কাম কৰা গাৰ্গীৰ বয়স্ক পিতৃ সেই এপাৰ্টমেন্টৰেই এজনী কিশোৰীৰ ধৰ্ষণৰ অভিযোগত গ্ৰেপ্তাৰ হয়। ঠিক গাৰ্গীৰ পিতৃ গ্ৰেপ্তাৰ হোৱাৰ আগৰ পৰা গাৰ্গীৰ মনত চেগা-চোৰোকাকৈ নিজ শৈশৱত শিক্ষকৰ দ্বাৰা যৌন-নিপীড়নৰ সন্মুখীন হোৱাৰ দুখৰীয়া ছবি ফ্লেছবেকত দেখোৱাই থকা হয়। সমগ্ৰ জনতা, পৰিচিত ব্যক্তি সকলোৰে তিৰস্কাৰ নেওচি পিতৃৰ নিৰ্দোষিতাৰ ওপৰত আকুন্ঠ আস্থা ৰাখি গাৰ্গীয়ে পিতৃক অপৰাধমুক্ত কৰাৰ যাত্ৰা আৰম্ভ কৰে। বিভিন্ন বাধা-বিঘিনিৰ মাজেৰে মূলতঃ গাৰ্গীৰ এই যাত্ৰাৰ কাহিনীৰেই ছবিৰ কাহিনীভাগ আগবাঢ়ে।
লগতে পঢ়ক কিশোৰৰ যৌনাংগত সোমাল ইউএছবি কেবল, চিকিৎসকে অস্ত্ৰোপচাৰেৰে আনিলে উলিয়াই
কাহিনীৰ গতি মসৃণ, ক’তো ৰৈ যোৱাৰ অৱকাশ নাই৷ যদিও ক’তো তড়িৎ গতিৰো প্ৰয়োগ নাই। প্ৰথমাৰ্দ্ধৰ শেষৰ ফালৰ পৰা আৰম্ভ হোৱা ক’ৰ্টৰুমৰ বাদানুবাদৰ খেলাখনৰ পৰাই চিনেমাৰ মনোগ্ৰাহীতা বৃদ্ধি পোৱাৰ লগতে কাহিনীয়ে ৰূপ সলাবলৈ আৰম্ভ কৰে। কোনো স্থূল বা উদ্ভট নাটকীয়তাৰ অৱতাৰণা নকৰাকৈ তৃতীয় লিংগৰ ন্যায়াধীশৰ চৰিত্ৰটিৰ উপস্থাপনৰ লগতেই তেওঁৰ মুখত এটি পৰিস্থিতি সাপেক্ষ তথা শক্তিশালী সংলাপ দিয়া হৈছে— ‘‘মই পুৰুষৰ অহমিকা আৰু নাৰীৰ যন্ত্ৰণা দুয়োটিকেই অনুভৱ কৰিবলৈ সক্ষম!’’
চৰিত্ৰটি ছবিখনৰ আন চৰিত্ৰসমূহৰ দৰেই সহজ। শিশু বা কিশোৰীৰ যৌন নিৰ্যাতন এক অতিশয় স্পৰ্শকাতৰ বিষয়। এই বিষয়ক কেন্দ্ৰ কৰি ইতিমধ্যেই যথেষ্ট চিনেমাৰ নিৰ্মাণো হৈছে। শেহতীয়াভাৱে চাই লিখা একেই বিষয়বস্তুৰ বলীউডৰ চিনেমা আছিলে ‘এ থাৰ্ছডে’, যি বিষয়বস্তুৰ গভীৰতালৈ যোৱাত সম্পূৰ্ণৰূপে বিফল হৈছিলে। পিছে গাৰ্গীত এই গভীৰতা, স্পৰ্শকাতৰতাক বহু সময়তেই খুব ন্যূনতম সংলাপৰ ব্যৱহাৰৰে আৰু যথোপযুক্ত অভিব্যক্তিৰ মাজেৰেই তুলি ধৰা হৈছে। সংলাপৰ ব্যৱহাৰ কম মানেই অভিব্যক্তিৰ কাম অধিক অৰ্থৱহ কৰি তোলা, যি সুচাৰুৰূপে ফুটাই তুলিব পৰাতো, পৰিচালক-চিত্ৰনাট্যকাৰ দুয়োৰে সফলতা। পিতৃ আৰু কন্যাৰ সম্পৰ্ক আৰু নিৰাপত্তাবোধৰ বান্ধোনৰ মাধ্যমেৰে, গাৰ্গী আৰু তাইত পিতৃ আৰু ধৰ্ষণৰ বলি হোৱা কিশোৰীগৰাকীৰ পিতৃ-দুই বিপৰীত পক্ষক একেটি আৱেগৰে সংপৃক্ত কৰিছে কাহিনীকাৰে। এই একেটি আৱেগৰ প্ৰয়োগৰেই শেষাংশৰ ফালে শক্তিশালী, সংলাপবিহীন আৰু সমৃদ্ধ কিছুক্ষণৰ দৃশ্যাংশৰ উপস্থাপন দুই কাহিনীকাৰৰ এক সাফল্যই।
অভিনয় গাৰ্গীৰ এক উল্লেখনীয় দিশ। মূলতঃ মূখ্য চৰিত্ৰত অভিনয় কৰা ছাই পল্লবীৰ অভিনয়ক অভিনয় নুবুলি নিজ চৰিত্ৰত একাত্ম হৈ পৰা বুলিব পাৰি। লগতেই বাকী চৰিত্ৰসমূহো নিজ নিজ ভূমিকাত স্বাভাৱিক। শ্ৰায়ান্তি প্ৰেমকৃষ্ণ আকাট্টুৰ আলোকশিল্পৰ কাম প্ৰশংসনীয়। যেনে মানসিকভাৱে ভগ্ন অৱস্থা এটাত পৰিয়ালৰ তিনিও সদস্য একেলগে মজিয়াত নীৰৱে বহি থকা দৃশ্যক কাষৰ এন্ধাৰ কোঠালিৰ পৰা কৰা দৃশ্যায়ন অতি অৰ্থৱহ।
লগতে পঢ়ক গাৰ্হস্থ্য হিংসা, যৌন নিৰ্যাতনৰ বলি! এইবাৰ কণ্ঠশিল্পী হানি সিঙেৰে বিবাহ বিচ্ছেদ পত্নীৰ
উদ্বেগজনিত নিশাত অধিবক্তা ইন্দ্ৰনছৰ মূৰৰ ওপৰত এটি শ্বেডযুক্ত স্তিমিত পোহৰৰ লাইট আৰু চিগাৰেটৰ ধোঁৱাৰ কুণ্ডলী ভাসমান হৈ থকা দৃশ্যাংশই ইন্দ্ৰনছৰ মানসিক অৱস্থাক প্ৰতীকাৰ্থত দৰ্শাই। গোবিন্দ বছন্তাৰ আৱহ সংগীতো পৰিস্থিতি সাপেক্ষ। চিনেমাৰ তৰংগ শীৰ্ষ অপ্ৰত্যাশিত, আৰু তাৎক্ষণিকভাৱে পট-পৰিৱৰ্তক। আৰু সমগ্ৰ চিনেমাখন জুৰি বা শেষাংশ পৰ্যন্ত ইয়াৰ উমান লগাব নোৱাৰাকৈ নিখুঁট আৰু মসৃণ ট্ৰিটমেন্ট। পৰিচালক, কাহিনীকাৰ ইয়াতেই সফল।
লেখিকাৰ মেইল-rimli.borkotoky1985@gmail.com
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
