অসম লাইভ ২৪ঃ ইছলামিক উগ্ৰপন্থীৰ নৃশংসতাৰ আকৌ এবাৰ সাক্ষী হ’ল সংযুক্ত আৰব আমীৰ শ্বাহী৷ আবু ধাবি আন্তঃৰাষ্ট্ৰীয় বিমানবন্দৰত দ্ৰোণেৰে তিনিখনকৈ অইল টেংকাৰত ঘটোৱা বিস্ফোৰণৰ ফলত ৩ জন লোকে প্ৰাণ হেৰুওৱাৰ লগতে ৬ জনৰো অধিক আহত হোৱাৰ তথ্য সদৰী কৰিছে আৰক্ষীয়ে৷
সোমবাৰে হোৱা এই বিস্ফোৰণৰ দায়িত্ব ইতিমধ্যে স্বীকাৰ কৰিছে য়েমেনৰ বিদ্ৰোহী সংগঠন ‘হাউথি’ৰ নেতৃবৃন্দই৷ ইছলামিক উগ্ৰপন্থী সংগঠনটোৰ এই দাবীৰ বিপৰীতে ইউনাইটেড আৰৱ এমিৰেট কৰ্তৃপক্ষই বিস্ফোৰণেৰে কোন জড়িত তাৰ মাৰাথন তদন্ত অব্যাহত ৰাখিছে৷
আৰক্ষীয়ে মৃত লোকসকলক চিনাক্ত কৰিছে আৰু ইয়াৰে দুয়োজনেই হ’ল ভাৰতৰ আৰু আনজন পাকিস্তানৰ নাগৰিক৷ আহতসকলৰ পৰিচয় ৰাজহুৱাভাৱে এই সময়লৈ মুকলি কৰা নাই আবু ধাবি আৰক্ষীয়ে৷
ইৰানৰ সাহায্যপ্ৰাপ্ত ছিয়া বিদ্ৰোহী গোটটোৱে চৌদি আৰৱ আৰু সংযুক্ত আৰৱ আমীৰ শ্বাহীক সততে টাৰ্গেট কৰি লোৱা দেখা গৈছে৷ ইয়াৰে প্ৰতিফলন সোমবাৰৰ আবু ধাবিৰ বিস্ফোৰণ বুলি দাবী কৰা হৈছে যদিও আনুষ্ঠানিকভাৱে এই কথা স্বীকাৰ কৰা নাই আবু ধাবি প্ৰশাসনে৷ প্ৰাথমিক তদন্তত দ্ৰোণেৰে দুটাকৈ ঠাইত বিস্ফোৰণ ঘটোৱাৰ সাক্ষ্য পোৱা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
