অসম লাইভ ২৪ঃ বৰঝাৰৰ লোকপ্ৰিয় গোপীনাথ বৰদলৈ আন্তর্জাতিক বিমানবন্দৰ সম্প্ৰতি আদানীৰ নামত। বিজেপি চৰকাৰৰ আশিসধন্য বহিৰাগত বণিয়া গোষ্ঠীয়ে ঘৰতেই ভগনীয়া কৰিলে লোকপ্ৰিয় গোপীনাথ বৰদলৈক। বৰঝাৰৰ লোকপ্ৰিয় গোপীনাথ বৰদলৈ আন্তর্জাতিক বিমানবন্দৰৰ নতুন নাম হ’ল ‘আদানী গুৱাহাটী আন্তর্জাতিক বিমানবন্দৰ’। ইতিমধ্যে আদানী গুৱাহাটী আন্তর্জাতিক বিমানবন্দৰৰ নামত নিবিদা আহ্বানৰ বিজ্ঞাপনো প্ৰকাশ পালে। non-aeronautical servicesৰ বাবে ই-টেণ্ডাৰ প্ৰক্ৰিয়াত ভাগ ল’বলৈ ইচ্ছুক পক্ষক আহ্বান জনোৱা হৈছে এই নিবিদাৰ জৰিয়তে। ৯ অক্টোবৰৰ পৰা আদানীৰ অধীনত বিমান উৰিব। ৯ আগষ্টত আৰম্ভ হোৱা নিৰীক্ষণপর্বৰ অন্তত ৯ অক্টোবৰৰ পৰা সম্পূর্ণৰূপে আদানী গ্ৰুপৰ অধীনত বৰঝাৰ বিমানবন্দৰৰ বাণিজ্যক কাম-কাজ চলোৱাৰ সিদ্ধান্ত লোৱা হৈছে। পূর্বৰে পৰা কংগ্ৰেছ, অসম জাতীয় পৰিষদ আদিয়ে বৰঝাৰ বিমানবন্দৰক ব্যক্তিগত খণ্ডলৈ হস্তান্তৰৰ বিৰুদ্ধে প্ৰতিবাদ সাব্যস্ত কৰি আহিছে যদিও ওজৰ-আপত্তি নৰজিল চৰকাৰৰ ওচৰত। এই সিদ্ধান্তত খর্গহস্ত বিভিন্ন পক্ষ। বৰ্তমানেও আদানীৰ নামত গুৱাহাটীৰ বিমানবন্দৰক লৈ তীব্ৰ প্ৰতিক্ৰিয়া প্ৰকাশ কৰিছে বিভিন্ন মহলে। সংবাদমেলযোগে প্ৰতিক্ৰিয়া প্ৰকাশ কৰে অসম জাতীয় পৰিষদৰ সভাপতি লুৰীণজ্যোতি গগৈয়ে। ৰাজ্যসভাৰ সাংসদ অজিত কুমাৰ ভূঞা, অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক পলাশ চাংমাইয়ো তীব্ৰ প্ৰতিক্ৰিয়া প্ৰকাশ কৰে এই কাৰ্যৰ বিৰুদ্ধে। কিন্তু মুখ্যমন্ত্ৰীৰ মতে পূর্বৰ নামেই বাহাল থাকিব বিমানবন্দৰৰ। নাম সলনিৰ সম্ভাৱনাক নস্যাৎ কৰিছে ৰাজ্যিক বিজেপিৰ সভাপতি ভৱেশ কলিতায়ো। ইয়াৰ বিপৰীতে, ইতিমধ্যে কাগজে-কলমে আদানী গ্ৰুপে নাম সলনি কৰিছেই। নিবিদা আহ্বান জনাইছে আদানী গ্ৰুপৰ নামত। তাৰ পাছতো হিমন্ত বিশ্ব শর্মা আৰু ভৱেশ কলিতাই ভাষ্যই আচম্বিত কৰিছে ৰাইজক। দৰাচলতে এই সিদ্ধান্ত কেন্দ্ৰীয় চৰকাৰে জাপি দিছে ওপৰৰ পৰা। এই ক্ষেত্ৰত airport authority of indiaৰ বিভাগীয় সংবিধান উলংঘাৰ উপৰি এই সংক্ৰান্তীয় আইনো উলংঘা কৰা হৈছে। বিমানবন্দৰৰ যিকোনো ধৰণৰ সিদ্ধান্তৰ বাবে airport authorityএ প্ৰিন্সিপাল প্ৰপ’জেল কেন্দ্ৰলৈ পঠোৱাটো নিয়ম। কিন্তু বৰঝাৰ বিমানবন্দৰৰ ক্ষেত্ৰত দেখা গ’ল ওলোটা নিয়ম। কেন্দ্ৰইহে সিদ্ধান্ত জাপি দিছে airport authorityৰ ওপৰত আনহাতে airport authorityৰ ৰুল মতে ৩০ বছৰলৈহে লিজত দিয়াৰ সিদ্ধান্ত হ’ব পাৰে। কিন্তু বৰঝাৰ বিমানবন্দৰ আদানীক দিয়া হ’ল ৫০ বছৰৰ বাবে। অন্যহাতে, এটা পার্টীক দুখন বিমানবন্দৰহে লীজত দিব পৰা যায়। আদানীক কিন্তু ৬ খনকৈ বিমানবন্দৰ লীজত দিয়া হ’ল। দৰাচলতে বিজেপি চৰকাৰৰ আশিস লৈ আদানীৰ লোলুপ দৃষ্টি বৰঝাৰ বিমানবন্দৰৰ বিস্তীর্ণ ভূমিদৰালৈ। যদি ব্যৱসায়িক কাম-কাজেই চলাবলগীয়া আছিল, সেই কামত মনোনিৱেশ কৰিলেই হ’লহেঁতেন। কিন্তু বিমানবন্দৰৰ কর্মচাৰীৰ আৱাসসমূহ খালী কৰাৰ তৎপৰতাৰ আঁৰৰ ৰহস্য কি? বিমানবন্দৰটোক ব্যক্তিগত খণ্ডলৈ হস্তান্তৰৰ বিৰোধিতাৰে পূর্বেই কেইগৰাকীমান বিশিষ্ট ব্যক্তিয়ে গুৱাহাটী উচ্চ ন্যায়ালয়ত এখন ৰাজহুৱা স্বার্থজড়িত আবেদন দাখিল কৰিছে। এই সন্দর্ভত ন্যায়ালয়ৰ ৰায় কি হয়, সেয়া সময়ত স্পষ্ট হ’ব। কিন্তু এই গুৰুত্বপূর্ণ বিষয়টো সন্দৰ্ভত সততে তৎপৰ অধিকাংশ দল-সংগঠনেই নিমাত। ৰাইজৰো সচেতনতাৰ অভাৱ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
