টি-২০ বিশ্বকাপ ভাৰতলৈ আহিল৷ ১৭ বছৰৰ অন্তত জয়ৰ সোৱাদ পালে ভাৰতীয় দলে৷ মেচৰ পুৰস্কাৰ গ্ৰহণ কৰিবলৈ গৈ সুখৰ মাজতো ৰোহিত বিৰাটে দিলে দুঃখবৰ৷ পুৰস্কাৰ হাতত তুলি লৈ বিৰাটে ক’লে এয়াই দেশৰ হৈ খেলা মোৰ শেষৰখন টি-২০ মেচ৷ সেই ঘোষণাৰ ১২০ মিনিট পাছত অৱসৰ ঘোষণা কৰিছে ৰোহিত শৰ্মাইয়ো৷ সংবাদমেলত এই কথা স্পষ্ট কৰি দিয়ে ৰোহিত শৰ্মাই৷
ৰোহিতে লগতে কয় যে এয়াই তেওঁৰ শেষ সুযোগ আছিল৷ সেয়ে ট্ৰফী জিকাটো মোৰ বাবে বিশেষ গুৰুত্বপূৰ্ণ বিষয় আছিল৷ ভাৰতীয় অধিনায়কগৰাকীয়ে কয়, ‘যিদিনাৰ পৰা টি-২০ খেল উপভোগ কৰিছো, খেল খেলিছো সেইদিনাৰ পৰা মোৰ এটাই ভোক আছিল৷ সেই ভোক হৈছে ট্ৰফী৷ বিশ্বকাপ ট্ৰফী৷ শেষ পৰ্যন্ত সেই সুখ আমি পালো৷ মোতকৈ সুখী মানুহ আজি কোন হ’ব!’
বিশ্বকাপ জিকি উঠি ৰোহিতে জনাইছে, ‘এক কথাত নিজৰ অনুভূতি প্ৰকাশ কৰিব নোৱাৰো৷ বিগত ৩-৪ বছৰ ধৰি যি পৰিস্থিতিৰ মাজত আছো সেই কথা বুজাব নোৱাৰো৷ সঁচাকৈ ক’বলৈ হ’লে দলৰ প্ৰত্যেকেই প্ৰচুৰ পৰিশ্ৰম কৰিছে৷ ফাইনেলত উঠি বিজয়ৰ সোৱাদ লোৱাৰ আঁৰত সোমাই আছে আমাৰ দলৰ কঠোৰ পৰিশ্ৰম৷ এই জয় এদিনীয়া নহয়, বিগত ৩-৪বছৰ ধৰি কৰা পৰিশ্ৰমৰ জয়৷ বিগত ৩-৪ বছৰ আমি পৰিশ্ৰম কৰিছো৷ তাৰেই ফল লাভ কৰিছো৷’
ইয়াৰ পূৰ্বেও কঠিন পৰিস্থিতিত পৰিছে ভাৰতীয় ক্ৰিকেট দলটো৷ বেছিভাগ সময়তে হতাশা আহিছে৷ কিন্তু পিছুৱাই নগৈ আগুৱাই গৈছে ভাৰতীয় দল৷ হাৰি হাৰি লোৱা শিক্ষা ভাৰতীয় দলটোৰ বাদে কাৰনো থাকিব? ৰোহিতে এই সন্দৰ্ভত কয়, ‘হাৰি হাৰি সকলোৱে বুজি উঠিছে, কঠিন পৰিস্থিতিত কেনেকৈ শান্তভাৱে পৰিস্থিতিৰ সৈতে মোকাবিলা কৰিব লাগে৷ যেতিয়া দক্ষিণ আফ্ৰিকাৰ হাতলৈ ট্ৰফী যাওঁ যাওঁ তেতিয়া আমি সকলোৱে ব্যক্তিবিশেষে নহয় এটা দল হিচাপে মোকাবিলা কৰিছো৷ আমি যিকোনো প্ৰকাৰে জিকিব খুজিছিলো৷ এনে প্ৰতিযোগীতাই আমি বিচাৰিছিলো৷ কষ্টেৰে লাভ কৰা সকলোবোৰ বস্তুৱেই বৰ অমূল্য৷ এই ট্ৰফী খুবেই অমূল্য৷ দলৰ সকলোকে লৈ মই খুবেই গৰ্বিত৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
