বৃহস্পতিবাৰৰ দুপৰীয়া৷ ১৪ ঘণ্টাৰ পূৰ্বে ভাঙি পৰিছিল আহমেদাবাদ-লণ্ডনগামী বিমান৷ এয়াৰ ইণ্ডিয়াই জনাইছে যে এজনক বাদ দি বিমানত থকা ২৪১ গৰাকী যাত্ৰী মৃত্যুৰ মুখত পৰিছে৷ পিটিআই সূত্ৰৰ খবৰ অনুসৰি বৃহস্পতিবাৰে গভীৰ নিশা পৰ্যন্ত আহমেদাবাদৰ চিভিল হাস্পতালত মুঠ ২৬৫ টা মৃতদেহ লৈ যোৱা হৈছে যাৰ মাজত আছে মেডিকেল কলেজ হোষ্টেলৰ ছাত্ৰৰ দেহো৷
এই ভয়াৱহ দুৰ্ঘটনাত প্ৰাণ ৰক্ষা কৰিছে কেৱল এজন ব্যক্তিৰেই৷ তেওঁৰ নাম ৰমেশ কুমান বিশ্বাস৷ তেওঁৱেই জনাইছে ভয়াৱহ অভিজ্ঞতাৰ কথা৷ শুকুৰবাৰে দেশৰ প্ৰধানমন্ত্ৰীয়ে তেওঁৰ সৈতে দেখা কৰিছে৷ সৰ্বভাৰতীয় সংবাদ মাধ্যম সূত্ৰৰ খবৰ অনুসৰি জ্বলি মাংসপিণ্ডত পৰিণত হোৱা দেহ চিনাক্তকৰণ কৰা টান হৈ পৰিছে৷ সেয়ে ডি এন এ টেষ্টৰ জৰিয়তে চিনাক্ত কৰা হৈছে মৃতদেহ৷ ইতিমধ্যেই ২০০ ডি এন এ সংগ্ৰহ কৰা হৈছে৷ কিছু দেহ ইতিমধ্যে চিনাক্ত কৰা হৈছে আৰু পৰিয়ালৰ হাততো তুলি দিয়া হৈছে৷
আহমেদাবাদৰ মেঘানিনগৰৰ ২৪২ জন যাত্ৰীক লৈ বৃহস্পতিবাৰে দুপৰীয়া ভাঙি পৰে এয়াৰ ইণ্ডিয়াৰ এ আই ১৭১ বিমান৷ সেয়া বোয়িং ৭৮৭-৮ ড্ৰিমলাইনাৰ আছিল৷ বিমানৰ যাত্ৰীসকলৰ মাজত মাত্ৰ এজন আশ্চৰ্যজনক ভাৱে বাছি গৈছে৷ বাকী সকলোৰেই মৃত্যু ঘটিছে৷ বিমানবন্দৰৰ নিকটবৰ্তী চিকিৎসক আৱাসৰ ওপৰত ভাঙি পৰিছে বিমানখন৷ ফলত হোষ্টেলৰ বহু আৱাসীয়ে মৃত্যুৰ মুখত পৰিছে৷
বিমান বিশেষজ্ঞ কেপ্টেইন অমিত সিং আৰু কেপ্টেইন মনোজ হাতিয়ে এই দুৰ্ঘটনাক লৈ জনাইছে যে, বিমানৰ লেণ্ডিং গিয়েৰ সাধাৰণতে উৰণৰ পাঁচ ছেকেণ্ডৰ মাজত বন্ধ কৰা হয়৷ তেতিয়া বিমান সঠিক উচ্চতালৈ যায়৷ কাৰণ গিয়েৰ বন্ধ নকৰিলে ঘৰ্ষণ বৃদ্ধি পায়৷ ইয়াৰ ফলত ইন্ধন বেছি লাগে আৰু বিমানৰ গতি হ্ৰাস পায়৷
দুৰ্ঘটনাৰ ঠিক পূৰ্বে ঘন জনবসতিপূৰ্ণ এলেকাত বিপৰ্যয় নহওক বুলিয়েই বিমানৰ সন্মুখৰ অংশ তুলি ধৰিছিল দুই পাইলটে৷ ইয়াৰ ফলত বিমানৰ গতি কমি যায় আৰু তাৰপিছতেই ভাঙি পৰে বিমানখন৷ অমিতৰ মতে এই পদক্ষেপ নললেও বিমানখন দুৰ্ঘটনাত পতিত হোৱাটো খাটাঙেই আছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
