হাস্পতালত ভৰ্তি ছুপাৰষ্টাৰ অজিত কুমাৰ, অনুৰাগীৰ বাবেই এই দশা
দক্ষিণৰ ছুপাৰষ্টাৰ অজিত কুমাৰৰ সৈতে সংঘটিত হৈছে এক দুৰ্ঘটনা। কালি ২৯ এপ্ৰিল মঙলবাৰে দিল্লীত এক গাম্ভীৰ্ষপূৰ্ণ অনুষ্ঠানত ৰাষ্ট্ৰপতি দ্ৰৌপদী মুৰ্মুৰ পৰা পদ্মভূষণ বঁটা লাভ কৰি উভতি অহাৰ সময়ত বিমানবন্দৰত আহত হয় ছুপাৰষ্টাৰগৰাকী।
জানিব পৰা মতে, বিমানবন্দৰত অবতৰণ কৰাৰ পাছতে প্ৰিয় অভিনেতাৰ চাবলৈ ভিৰ কৰিছিল বহু অনুৰাগীয়ে, সেই অনুৰাগীয়ে পাছত ঘেৰি ধৰিছিল অভিনেতাগৰাকী। সেই সময়ছোৱাতে আহত হয় অজিক কুমাৰ আৰু চিকিৎসালয়ত ভৰ্তি হ’বলগীয়া হয়।
প্ৰিয় অভিনেতাগৰাকী পদ্ম বঁটাৰে সন্মানিত হোৱাৰ পাছত অনুৰাগীয়ে তেঁওক চাবলৈ বুলি চেন্নাই বিমানবন্দৰত ভিৰ কৰিছিল। অভিনেতাগৰাকীক আদৰণি জনাবৰ বাবে হাজাৰৰ ঘৰত অনুৰাগী উপস্থিত হৈছিল বিমান বন্দৰত।
সেই সময়ত অনুৰাগীৰ বিপুল ভিৰ সমবেত হোৱাত সেই ভিৰৰ মাজত আবদ্ধ হৈ পৰে অজিত কুমাৰ। সেই সময়ছোৱাত অভিনেতাগৰাকীয়ে ভৰিত সামান্য আঘাত পোৱাৰ পিছত আজি বুধবাৰে চেন্নাইৰ এখন ব্যক্তিগত চিকিৎসালয়ত ভৰ্তি কৰোৱা হয়।
ইণ্ডিয়া টুডেৰ এক সূত্ৰৰ উদ্ধৃতিৰে প্ৰকাশ কৰা অনুসৰি, ‘চেন্নাই বিমানবন্দৰত বিপুল জনসমাগমেৰে ঘেৰি ধৰাৰ ফলত অজিত কুমাৰৰ ভৰিত সামান্য আঘাত পায়। সেয়েহে তেওঁক ফিজিঅ’থেৰাপিৰ বাবে ভৰ্তি কৰিবলগীয়া হৈছিল। অৱশ্যে তেওঁৰ স্বাস্থ্যৰ ক্ষেত্ৰত কোনো চিন্তাৰ কাৰণ নাই বুলি সদৰি চিকিৎসকৰ।
অজিত কুমাৰক শেহতীয়াকৈ দেখা গৈছিল গুড বেড আগ্লি ছবিত। বক্স অফিচত ভাল ব্যৱসায় কৰা এই ছবিখন অধিক ৰবিচন্দ্ৰনে পৰিচালনা কৰিছে। বিশ্বব্যাপী বক্স অফিচত ২৪৩.৩৫ কোটি টকা উপাৰ্জন কৰিছে গুড বেড আগ্লিয়ে। ইয়াৰ লগে লগে ছবিখনে ২০২৫ চনৰ সৰ্বাধিক উপাৰ্জনকাৰী তামিল ছবিৰ অভিলেখ গঢ়িবলৈ সক্ষম হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
