অসম লাইভ২৪ঃ সেইদিনা জুই, কলা ধোঁৱা আৰু মানুহৰ আৰ্তনাদে আমেৰিকাৰ আকাশ ছানি ধৰিছিল৷ তেজৰ চেকুৰা সেইদিনা অ’ত-ত’ত, আমেৰিকাৰ ৰাজ পথত মানুহৰ মাংস ছিটিকি পৰিছিল৷ চৌদিশে কেৱল শুনা গৈছিল আৰ্তনাদ৷ কিছু মুহূৰ্তৰ বাবে উশাহ-নিশাহ যেন বন্ধ হৈ পৰিছিল আমেৰিকাবাসীৰ৷ চকুৰে দেখিও বিশ্বাস কৰিবলৈ টান পাইছিল আপোন মানুহৰ চিৎকাৰ৷ সপোন লৈ ঘৰৰ পৰা ওলাই অহা বহু মানুহৰ জীয়া সপোন সিদিনা তচনচ হৈ গৈছিল৷
২০০১ চনৰ ১১ ছেপ্টেম্বৰ৷ সেই দিনা আছিল মঙলবাৰ৷ আমেৰিকাৰ বুকুত ভয়াৱহ জঙ্গি হামলাত ক্ষতিগ্ৰস্থ হৈ পৰিছিল নিউৱৰ্কৰ ৱাৰ্ল্ড ট্ৰেড চেন্টাৰ৷ নিমিষতে ধ্বংসস্তুপত পৰিণত হৈছিল হৈছিল টুইন টাৱাৰ্ছ৷ সেই ঘটনাৰ সোমবাৰে ২২বছৰ সম্পূৰ্ণ হ’ল৷ ১৯৪১ চনৰ দ্বিতীয় বিশ্বযুদ্ধৰ আৰম্ভণিৰ পূৰ্বে পাৰ্ল হাৰবাৰত আমেৰিকাৰ নৌ বাহিনীৰ ওপৰত আক্ৰমণ চলাইছিল জাপানৰ বায়ুসেনাই৷ তাৰপিছতেই ২০০১ চনৰ ১১ ছেপ্টেম্বৰৰ হোৱা এই আক্ৰমণ আমেৰিকাৰ ইতিহাসৰ দ্বিতীয় বৃহৎ আক্ৰমণ৷ ইতিহাসৰ পৃষ্ঠাত ‘৯/১১ আক্ৰমণ’ হিচাপে এই দিনটো লিখিত হৈছে৷ ১১ ছেপ্টেম্বৰৰ এই দিনটোক কলা দিন হিচাপেই মানে আমেৰিকাৰ প্ৰতিজন লোকে৷
প্ৰতি বছৰে এই দিনটোত হাজাৰ হাজাৰ মানুহ ৰাস্তালৈ ওলাই আহে৷ আক্ৰমণত নিহতসকলৰ প্ৰতি শ্ৰদ্ধা জনাই ফুল-মালা-মমবাতি লৈ ৱৰ্ল্ড ট্ৰেড ছেণ্টাৰত হাজিৰ হয়৷ কিন্তু কেনেকৈ এই আক্ৰমণৰ ঘটনা সংঘটিত হৈছিল? এই ঘটনাৰ নেপথ্যত কোন আছিল? ২০০১ চনৰ ১১ ছেপ্টেম্বৰত আমেৰিকাত সংঘটিত এই আক্ৰমণৰ ঘটনাত জড়িত আছিল অল-কায়দা৷ ঘটনাৰ দিনা পুৱাই নিষিদ্ধ সংগঠন অল কায়দাৰ ১৯ জন সদস্যই বেলেগ বেলেগ বিমানবন্দৰেৰে আমেৰিকাত প্ৰৱেশ কৰিছিল৷ তাৰপিছতেই বন্দুক, বোমা, গোলাবাৰুদ লৈ চাৰিটা দলত ভাগ হৈ চাৰিখন বাণিজ্যিক বিমানৰ ভিতৰত আত্মগোপন কৰি আছিল৷ ৪ টা দুষ্কৃতিকাৰীৰ দলৰ দুটা দলে প্ৰথমে দুখন বিমান লৈ নিউৱৰ্কৰ ৱাৰ্ল্ড ট্ৰেড ছেণ্টাৰৰ ‘টুইন টাৱাৰ্ছ’ত আক্ৰমণ কৰে৷ সেই সময়ত সেই বিশেষ টুইন টাৱাৰ্ছটো বিশ্বৰ ৫টা ওখ অট্টালিকাৰ ভিতৰত এটা আছিল৷ প্ৰথমে বিমানখনে পুৱা ৮ বাজি ৪৬ মিনিটত ৱাৰ্ল্ড ট্ৰেড চেণ্টাৰৰ উত্তৰ মিনাৰৰ ৯৩ মহলাৰ পৰা ৯৯ মহলাত গৈ ধাক্কা মাৰে৷
প্রথম ধাক্কাৰ পাছত ৯বাজি ৩ মিনিটত দ্বিতীয় বিমানখন লৈ আক্ৰমণ কৰে দলটোৱে৷ ৱাৰ্ল্ড ট্ৰেড চেণ্টাৰৰ দক্ষিণ মিনাৰৰ ৭৭ মহলা আৰু ৮৫ মহলাত আক্ৰমণ কৰে দ্বিতীয়খন বিমানে৷ এই দুয়োখন বিমানত মুঠ ১০টা দুষ্কৃতিকাৰী আছিল৷ দুখন বিমানত মুঠ যাত্ৰী আৰু বিমানত কৰ্মৰত সদস্যৰ সংখ্যা আছিল ১৪৭ জন৷ বিমান দুখনে দুবাৰকৈ চলোৱা আক্ৰমণত নিহত হৈছিল মুঠ ২,৭৬৩ জন ব্যক্তিৰ৷ এই আক্ৰমণৰ দুঘণ্টাৰ ভিতৰতেই ৱাৰ্ল্ড ট্ৰেড চেণ্টাৰৰ বিশেষ টুইন টাৱাৰটো ধুলিৰ সৈতে মিলি যায়৷ ৱাৰ্ল্ড ট্ৰেড চেণ্টাৰৰ আৰু এটা ৪৭ মহলীয়া অট্টালিকা ভাঙি পৰে৷ আন দুখন বিমানে আমেৰিকাৰ ৰাজধানী ৱাছিংটনত আক্ৰমণ চলাই৷
তৃতীয় বিমানখনত আছিল পাঁচগৰাকী জঙ্গী৷ যাত্ৰী আৰু বিমানৰ সদস্য মিলি মুঠ ৫৯গৰাকী লোক আছিল তৃতীয়খন বিমানত৷ ৯ বাজি ৩৭ মিনিটত বিমানখনে ধাক্কা মাৰে ভাৰ্জিনিয়াৰ আৰ্লিংটন কাউণ্টিত আমেৰিকাৰ প্ৰতিৰক্ষা বিভাগত আক্ৰমণ কৰে৷ সেই আক্ৰমণত মুঠ ১৮৯ গৰাকী লোকৰ মৃত্যু হয়৷ চতুৰ্থখন বিমানে আক্ৰমণ চলায় ১০ বাজি ৩ মিনিটত৷ সেই বিমানখনত মুঠ ৪ জন সন্ত্ৰাসবাদী আছিল৷ সেই আক্ৰমণত মৃত্যু হয় ৪০গৰাকী লোকৰ৷ এই ৪ জংগী আক্ৰমণত মুঠ ৯৩ খন দেশৰ প্ৰায় তিনি হাজাৰ মানুহৰ মৃত্যু হৈছিল৷ আহত হৈছিল কেইবাহাজাৰ লোক৷
ৱাৰ্ল্ড ট্ৰেড চেণ্টাৰ ধ্বংস হোৱাৰ পাছত আমেৰিকাৰ অৰ্থনীতি আৰু বিশ্বৰ বজাৰত উল্লেখযোগ্য প্ৰভাৱ পৰে৷ প্ৰায় ৭-৮ মাহ ধৰি ৱাৰ্ল্ড ট্ৰেড চেণ্টাৰৰ মেৰামতিতেই সময় পাৰ হয়৷ ইয়াৰ পাছতেই ২০০৬ চনক ৱাৰ্ল্ড ট্ৰেড চেণ্টাৰৰ পুনঃনিৰ্মাণৰ কাম আৰম্ভ হয়৷ ২০১৪ চনত এই চেণ্টাৰ আকৌ জনসাধাৰণৰ বাবে খুলি দিয়া হৈছে৷ ১১ ছেপ্টেম্বৰত নিহতসকলৰ স্মৰণত সেই স্থানত কেইবাটাও স্মৃতিসৌধ নিৰ্মাণ কৰিছে আমেৰিকাই৷ ৯/১১ৰ আক্ৰমণৰ দায়িত্ব স্বীকাৰ কৰিছে আল-কায়দাই৷ এই আক্ৰমণৰ নেপথ্যত আছিল আল-কায়দা প্ৰধান ওছামা-বিন-লাডেন৷
এই ঘটনাৰ পাছতেই আমেৰিকাই আল-কায়দাৰ নেতা খালিদ শ্বেখ মহম্মদক ২০০৩ চনত পাকিস্তানৰ ৰাৱালপিণ্ডিৰ পৰা গ্ৰেপ্তাৰ কৰে৷ গ্ৰেপ্তাৰৰ পাছত খালিদ শ্বেখ মহম্মদৰ ঠিকনা হৈ পৰে আমেৰিকাৰ গুয়ানতানামো কাৰাগাৰ৷ লাডেনে কিন্তু প্ৰাথমিকভাৱে এই আক্ৰমণৰ দায়িত্ব স্বীকাৰ কৰি লোৱা নাছিল৷ ২০০৪ চনত আমেৰিকাৰ ৰাষ্ট্ৰপতি নিৰ্বাচনৰ সময়ৰ এটা বিশেষ অডিঅ’ কল ভাইৰেল হৈ পৰিছিল বিশ্বত৷ সেই অডিঅ’ত লাডেনে ৯/১১ৰ আক্ৰমণৰ আঁৰত আল-কায়দা সেই কথা স্বীকাৰ কৰিছিল৷ এই আক্ৰমণৰ সৈতে ওছামা বিন লাডেন জড়িত থকাৰ কথাও স্বীকাৰ কৰিছিল৷
আমেৰিকাই কেতিয়াও চৰকাৰীভাৱে ১১ ছেপ্টেম্বৰৰ ঘটনাত লাডেন দায়ী বুলি কোনো বিবৃত্তি প্ৰকাশ নকৰিলে৷ কিন্তু টানজেনিয়াত থকা দাৰ-এছ-ছালাম আৰু কেনিয়াৰ নাইৰোবিত থকা আমেৰিকাৰ দূতবাসত আক্ৰমণ চলোৱাৰ অভিযোগত এফ বি আইৰ মষ্ট ৱাণ্টেড তালিকাত আহে লাডেন৷ ইয়াৰপাছতেই আমেৰিকাই প্ৰায় ১০ বছৰ ধৰি লাডেনক বিচাৰি অভিযান চলায়৷ ২০১১ চনৰ ১ মেত পাকিস্তানৰ এবোটাবাদত আমেৰিকাৰ বিশেষ বাহিনীৰ গুলিত লাডেনক হত্যা কৰা হৈছে বুলি ঘোষণা কৰে আমেৰিকাৰ তৎকালীন প্ৰেছিডেণ্ট বাৰাক ওবামাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
