বিহাৰত মহিলাৰ সুৰক্ষাক লৈ নতুনকৈ উদ্বেগ সৃষ্টি হৈছে। জামুই আৰু সমষ্টিপুৰত যুৱতীক হাৰাশাস্তি কৰাৰ ভিডিঅ’ ভাইৰেল হোৱাৰ পিছত এইবাৰ বাংকা জিলাৰ বিখ্যাত পৰ্যটনস্থলী মন্দাৰ পৰ্বতৰ পৰা এগৰাকী যুৱতীক হাৰাশাস্তি আৰু মাৰপিট কৰাৰ ভিডিঅ’ পোহৰলৈ আহিছে। ভিডিঅ’টো ছ’চিয়েল মিডিয়াত ভাইৰেল হোৱাৰ পিছতে আৰক্ষীয়ে তদন্ত আৰম্ভ কৰিছে। আৰক্ষীৰ তথ্য অনুসৰি, ভাইৰেল হোৱা ভিডিঅ’টো বাংকা জিলাৰ বৌংছি থানাৰ অন্তৰ্গত মন্দাৰ পৰ্বতৰ। ভিডিঅ’টোত কেইজনমান যুৱকে এগৰাকী যুৱতীক ঘেৰি ধৰি অশালীন আচৰণ কৰা দেখা গৈছে। এজন যুৱকৰ হাতত লাঠি আৰু আন এজনৰ হাতত চেণ্ডেল দেখা যায়। যুৱতীগৰাকীৰ সৈতে থকা আন দুজন যুৱকৰ সৈতেও দুৰ্ব্যৱহাৰ কৰাৰ অভিযোগ উঠিছে।
আৰক্ষীৰ মতে, ঘটনাটো জুন মাহতে সংঘটিত হৈছিল। কিন্তু ভিডিঅ’টো ২২ ছেপ্টেম্বৰত আৰক্ষীৰ দৃষ্টিগোচৰ হয়। ভিডিঅ’টো লাভ কৰাৰ পিছতে আৰক্ষীয়ে ঘটনাস্থলী পৰিদৰ্শন কৰি তদন্ত আৰম্ভ কৰে। অৰ্থাৎ, ঘটনাটো পুৰণি হ’লেও ইয়াৰ ভিডিঅ’ এতিয়াহে আৰক্ষীৰ হাতত পৰিছে। বৌংছি থানাৰ আৰক্ষীয়ে ভাইৰেল ভিডিঅ’ৰ ভিত্তিত ৬ জন অজ্ঞাত যুৱকৰ বিৰুদ্ধে এজাহাৰ ৰুজু কৰিছে। তদন্তৰ সময়ত কেইজনমান সন্দেহযুক্ত লোকৰ পৰিচয়ো লাভ কৰা বুলি আৰক্ষীয়ে জনাইছে। তেওঁলোকক গ্ৰেপ্তাৰৰ বাবে অভিযান চলি আছে।
আৰক্ষীৰ অভিযোগ অনুসৰি, যুৱতীগৰাকী আৰু তেওঁৰ সংগীক হাৰাশাস্তি কৰাৰ লগতে অনলাইনযোগে ১,৫০০ টকা স্থানান্তৰ কৰাই লোৱাৰ অভিযোগো তদন্তত পোহৰলৈ আহিছে। গোচৰটোত ভাৰতীয় ন্যায় সংহিতাৰ কেইবাটাও ধাৰাৰ লগতে তথ্য-প্ৰযুক্তি আইনৰ সংশ্লিষ্ট ধাৰা সংযোজন কৰা হৈছে। বাংকাৰ এই ঘটনাৰ পূৰ্বে বিহাৰৰ জামুই আৰু সমষ্টিপুৰৰ পৰাও যুৱতী তথা নাবালিকাক হাৰাশাস্তি কৰাৰ ভিডিঅ’ পোহৰলৈ আহিছিল। জামুইৰ ঘটনাত এগৰাকী নাবালিকাক হাৰাশাস্তি কৰাৰ ভিডিঅ’ ভাইৰেল হোৱাৰ পিছত আৰক্ষীয়ে অভিযান চলাইছিল। সমষ্টিপুৰতো দিন দুপৰতে এগৰাকী যুৱতীক কেইজনমান যুৱকে আগুৰি ধৰি দুৰ্ব্যৱহাৰ কৰাৰ অভিযোগ উঠিছিল। সেই ঘটনাত আৰক্ষীয়ে চাৰিজনক গ্ৰেপ্তাৰ কৰাৰ কথা প্ৰকাশ পাইছে।
ঘটনাক লৈ বিহাৰত ৰাজনৈতিক প্ৰতিক্ৰিয়া আৰম্ভ হৈছে। বিৰোধী নেতা তেজস্বী যাদৱে জামুই, সমষ্টিপুৰ আৰু বাংকাৰ ঘটনাক লৈ ৰাজ্যৰ আইন-শৃংখলা ব্যৱস্থাৰ সমালোচনা কৰিছে। আনহাতে কেন্দ্ৰীয় মন্ত্ৰী চিৰাগ পাছোৱানে কেৱল অভিযুক্তক গ্ৰেপ্তাৰ কৰিলেই নহ’ব, এনে ঘটনা সংঘটিত হ’বলৈ দিয়া দায়িত্বশীল বিষয়াসকলৰ ভূমিকাও পৰীক্ষা কৰা উচিত বুলি মন্তব্য কৰিছে। মন্দাৰ পৰ্বতৰ দৰে জনপ্ৰিয় পৰ্যটনস্থলত এনে ঘটনা সংঘটিত হোৱাৰ অভিযোগে সেই স্থানসমূহত নিৰাপত্তা আৰু আৰক্ষীৰ উপস্থিতিৰ বিষয়টোও চৰ্চালৈ আনিছে। বিশেষকৈ ঘটনা সংঘটিত হোৱাৰ বহুদিন পিছত ভিডিঅ’ৰ জৰিয়তে আৰক্ষীৰ দৃষ্টিগোচৰ হোৱাটোৱে স্থানীয় পৰ্যায়ত নজৰদাৰী ব্যৱস্থা কিমান সক্ৰিয়, সেই সন্দৰ্ভতো প্ৰশ্ন উত্থাপন কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
