অসম লাইভ ২৪ঃ চীফ অৱ ডিফেন্স ষ্টাফ বিপিন ৰাৱটক লৈ যোৱা হেলিকপ্টাৰ দুৰ্ঘটনাত পতিত। মুহূৰ্ততে ছাই হৈ গ’ল সেনাৰ হেলিকপ্টাৰ। তামিলনাডুৰ কুন্নুৰত সংঘটিত হয় এই ভয়ানক দুৰ্ঘটনা। দুৰ্ঘটনাত পতিত ভাৰতীয় বায়ু সেনাৰ Mi 17v5 হেলিকপ্টাৰখনত আছিল চীফ অৱ ডিফেন্স বিপিন ৰাৱট।
শীৰ্ষ সেনা বিষয়াগৰাকীৰ পত্নী মধুলিকা ৰাৱটো আছিল হেলিকপ্টাৰখনত। ইয়াৰ উপৰি ব্ৰিগেডিয়াৰ এল এছ লীডা, শীৰ্ষ বিষয়া হৰজিন্দৰ সিং, নায়ক গুৰসেৱক সিং, জিতেন্দ্ৰ কুমাৰ, লেন্স নায়ক বিৱেক কুমাৰ, বি ছাই তেজা, আৰু হভ ছটপল আছিল হেলিকপ্টাৰখনত। CDSগৰাকীয়ে দিল্লীৰ পৰা তামিলনাডুৰ চুলুৰ অভিমুখে যাত্ৰা কৰিছিল। তথ্য অনুসৰি CDSগৰাকীৰ সম্পূৰ্ণ চৰকাৰী ভ্ৰমণ আছিল এয়া। কুন্নুৰত CDSগৰাকীক লৈ যোৱা হেলিকপ্টাৰখন হঠাৎ আকাশ মাৰ্গতে জ্বলি উঠিল। দেহৰ ৭০ শতাংশ অগ্নিদগ্ধ হোৱা বিপিন ৰাৱটক চিকিৎসালয়ত ভৰ্তিৰ ব্যৱস্থা কৰে উদ্ধাৰকাৰী দলে। ইপিনে এই ঘটনাত এই বাতৰি যুগুতুৱা পৰ্যন্ত ১৩জনৰ মৃত্যু নিশ্চিত কৰিছে তামিলনাডু প্ৰশাসনে।
স্থানীয় লোকৰ ভাষ্য অনুসৰি এই ঘটনা সংঘটিত হোৱাৰ সময়ত বিকট শব্দ হোৱাৰ লগতে ক’লা ধোঁৱাই ছানি ধৰিছিল সমগ্ৰ আকাশ। নীলগিৰিৰ বনাঞ্চলত হেলিকপ্টাৰখন পৰা অংশত জ্বলি যায় গছ-বন। লগে লগে স্থানীয় লোকে আৰম্ভ কৰে যথাসম্ভৱ উদ্ধাৰ অভিযান। ঘটনাস্থলীলৈ উৰা মাৰে উদ্ধাৰকাৰীৰ দল। বায়ু সেনা প্ৰধানগৰাকীও উপস্থিত হয় দুৰ্ঘটনাস্থলীত। উপস্থিত হয় তামিলনাডুৰ বনমন্ত্ৰীও। কেনেকৈ সংঘটিত হ’ল দুৰ্ঘটনা? এই পৰ্যন্ত প্ৰকৃত কাৰণ পোহৰলৈ অহা নাই যদিও ঘন কুঁৱলীৰ বাবেই দুৰ্ঘটনাটো সংঘটিত হয়।
কুঁৱলীৰ বাবেই উদ্ধাৰ অভিযানো কিছু পৰিমাণে বাধাগ্ৰস্ত হয়। আনহাতে এই ঘটনাৰ পাছতে প্ৰতিৰক্ষা মন্ত্ৰী ৰাজনাথ সিঙ উপস্থিত হয় বিপিন ৰাৱটৰ ঘৰত। ইপিনে সেনাই ঘটনাৰ নিজাববীয়া তদন্ত ঘোষণা কৰিছে। আনহাতে ৰাষ্ট্ৰপতিয়ে এই ঘটনাৰ পৰিপ্ৰেক্ষিতত তেওঁৰ মুম্বাই ভ্ৰমণ স্থগিত ৰাখে। শাসক-বিৰোধী সকলোৱে এই ঘটনাত শোক ব্যক্ত কৰিছে। উল্লেখ্য MI হেলিকপ্টাৰ ৰুছিয়ান প্ৰযুক্তিৰে নিৰ্মিত বায়ু সেনাই ব্যৱহাৰ কৰা উন্নতমানৰ হেলিকপ্টাৰ। ইপিনে বিপিন ৰাৱট দেশৰ চীফ অৱ ডিফেন্স ষ্টাফ পদত অধিষ্ঠিত প্ৰথমগৰাকী সেনা বিষয়া।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ