সমগ্ৰ দেশত এতিয়া লোকসভা নিৰ্বাচনৰ গৰম বতাহ। অসমতো বাজি উঠিছে নিৰ্বাচনী ৰণশিঙা। প্ৰাৰ্থীত্বক লৈ ৰাজনৈতিক দলসমূহৰ সীমাহীন ব্যস্ততা। বিৰোধী ঐক্যৰ আসন ভাগ বাটোৱাৰক লৈ খোৱা-কামোৰা কৰি থকাৰ সময়তে প্ৰায় সম্পূৰ্ণ হৈছে বিজেপিৰ প্ৰাৰ্থী তালিকা। NB NEWS ৰ হাতত আহি পৰিছে বিজেপিৰ সম্পূৰ্ণ সম্ভাব্য প্ৰাৰ্থী তালিকা।
বুধবাৰে মুখ্যমন্ত্ৰী ড০ হিমন্ত বিশ্ব শৰ্মা, ৰাজ্যিক বিজেপিৰ সভাপতি ভৱেশ কলিতা, সাংগঠনিক সম্পাদক ৰবীন্দ্ৰ ৰাজু, প্ৰভাৰী বৈজয়ন্ত জয় পাণ্ডা আৰু বিধায়ক নৱ কুমাৰ দলে অসমৰ ১২টা সমষ্টিৰ প্ৰাৰ্থীৰ পেনেল কেন্দ্ৰীয় নেতৃত্বৰ ওচৰত দাখিল কৰিছে।
বিজেপিৰ সম্ভাব্য প্ৰাৰ্থীসকল হৈছে
গুৱাহাটীঃ বিজুলী কলিতা মেধি, দৰং-ওদালগুৰিঃ দিলীপ শইকীয়া, শোণিতপুৰঃ ৰঞ্জিত দত্ত, লখিমপুৰঃ প্ৰদান বৰুৱা, যোৰহাটঃ তপন গগৈ, ডিব্ৰুগড়ঃ সৰ্বানন্দ সোণোৱাল, নগাঁওঃ সুৰেশ বৰা, কাজিৰঙাঃ কামাখ্যা তাছা, ডিফুঃ অমৰছিং টিছ’, শিলচৰঃ পৰিমল শুক্লবৈদ্য আৰু কৰিমগঞ্জঃ কৃপানাথ মাল্লা।
উল্লেখ্য যে বৰপেটা অগপক আৰু কোকৰাঝাৰ লোকসভা সমষ্টি মিত্ৰদল UPPLক এৰি দিয়াৰ স্পষ্ট ইংগিত দিছে সভাপতি ভৱেশ কলিতাই। NB NEWSক সূত্ৰই জনোৱা অনুসৰি বৰপেটা সমষ্টিৰ বাবে অগপ প্ৰাৰ্থী ফণীভূষণ চৌধুৰীৰ নাম চূড়ান্ত কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
