ক্ৰীজতেই হওক বা ডাগআউটতেই হওক, সদায় উগ্ৰ হৈ থাকে গৰম মেজাজী গৌতম গম্ভীৰ। বিগত আইপিএলত বিৰাট কোহলীৰ সৈতে গৌতম গম্ভীৰৰ অৰিয়াঅৰি চৰ্চিত হৈছিল বহুদিনলৈ। প্ৰতিপক্ষৰ বলাৰৰ শ্লেজিঙৰ প্ৰত্যুত্তৰ দিবলৈ সদায়েই ফেপেৰি পাতি আহিছিল গম্ভীৰ। আন্তৰ্জাতিক ক্ৰিকেটৰ পৰা সন্যাস লোৱাৰ পাছত ৰাজনীতিৰ খেলপথাৰত ইনিংছ অপেন কৰিছিল ভাৰতীয় ক্ৰিকেট দলৰ প্ৰাক্তন অপেনাৰ গৌতম গম্ভীৰে। হয়তো ৰাজনীতিৰ ইনিংছ দীঘলীয়া নহ’ব বাওহতীয়া ক্ৰিকেটাৰগৰাকীৰ।
২০১৯ চনত ভাৰতীয় জনতা পাৰ্টীত যোগ দিছিল গৌতম গম্ভীৰে। পূৱ দিল্লী সমষ্টিৰ পৰা লোকসভা নিৰ্বাচনত প্ৰতিদ্বন্দ্বিতা কৰি সাংসদ হৈছিল গম্ভীৰ। আম আদমী পাৰ্টীৰ আতিশী মাৰ্লেনা আৰু কংগ্ৰেছৰ অৰবিন্দৰ সিং লাভলীক পৰাজিত কৰিছিল গম্ভীৰে। শনিবাৰে হঠাৎ সক্ৰিয় ৰাজনীতিৰ পৰা অব্যাহতি লোৱাৰ ইংগিত দিয়ে বিজেপি সাংসদগৰাকীয়ে। সামাজিক মাধ্যম এক্স (পূৰ্বৰ টুইটাৰ) যোগে এই কথা সদৰি কৰে গৌতম গম্ভীৰে।
লোকসভা নিৰ্বাচনক লৈ গৰম হৈ আছে দেশৰ ৰাজনীতি। উৎসুক হৈ আছে প্ৰাৰ্থিত্ব প্ৰত্যাশীসকল। আগন্তুক লোকসভা নিৰ্বাচনৰ বাবে ভাৰতীয় জনতা পাৰ্টীয়ে আজি প্ৰথম পৰ্যায়ৰ প্ৰাৰ্থী তালিকা ঘোষণা কৰাৰ প্ৰৱল সম্ভাৱনা আছে। ২০২৪ লোকসভা নিৰ্বাচনৰ বাবে বিজেপিয়ে কেইবাখনো নতুন মুখ প্ৰক্ষেপ কৰাৰ আশংকাই দেখা দিছে। তেনেস্থলত টিকট নাপাব পাৰে বৰ্তমানৰ বহু সাংসদে। প্ৰাৰ্থী তালিকা প্ৰকাশৰ পূৰ্বে গম্ভীৰৰ এনে সিদ্ধান্তই স্বাভাৱিকতে প্ৰশ্নৰ উদ্ৰেক ঘটাইছে অনুৰাগীৰ মাজত।
গম্ভীৰে এক্স (পূৰ্বৰ টুইটাৰ)ত এক পোষ্টযোগে ক্ৰিকেটত মনোনীৱেশ কৰিবলৈ সক্ৰিয় ৰাজনীতিৰ পৰা অব্যাহতি বিচাৰি বিজেপিৰ ৰাষ্ট্ৰীয় সভাপতি জেপি নড্ডাক অনুৰোধ জনায়। ৰাইজৰ সেৱা কৰাৰ সুযোগ দিয়া বাবে প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহক ধন্যবাদ জ্ঞাপন কৰে গৌতম গম্ভীৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
