আজিৰ কেবিনেটৰ কেইবাটাও গুৰুত্বপূৰ্ণ সিদ্ধান্ত- আধাৰ কাৰ্ড- মাটিৰ খাজানা সন্দৰ্ভত ল’লে সিদ্ধান্ত
আজি ১১ ডিচেম্বৰ বুধবাৰে অনুষ্ঠিত হয় ৰাজ্যৰ বিশেষ কেবিনেট বৈঠক। এই ৰাজ্যিক কেবিনেটত অসম চৰকাৰে গ্ৰহণ কৰে কেইবাটাও বৃহৎ সিদ্ধান্ত । আধাৰ কাৰ্ড, মাটিৰ খাজানা, মাটিৰ পট্টা সন্দৰ্ভত লয় গুৰুত্বপূৰ্ণ সিদ্ধান্ত।
আধাৰ কাৰ্ড
আধাৰ কাৰ্ডক লৈ নতুন SOP আনিলে ৰাজ্য চৰকাৰে। সলনি কৰা হ’ল আধাৰ কাৰ্ডৰ পূৰ্বৰ সকলো নিয়ম। আধাৰ কাৰ্ডক লৈ এতিয়াৰে পৰা কঠোৰ হ’ব ৰাজ্য চৰকাৰ।
বাংলাদেশৰ অনুপ্ৰৱেশকাৰী চিনাক্ত আৰু ৰোধৰ বাবেই এই নতুন নিয়ম তথা নিৰ্দেশনা জাৰি অসম চৰকাৰৰ। যাৰ বাবে এতিয়াৰে পৰা পূৰ্বৰ দৰে সহজ নহ’ব আধাৰ কাৰ্ডৰ আবেদন।
ফিল্ড ভেৰিফিকেচনৰ পাছতহে আধাৰ কাৰ্ড লাভ কৰিব আবেদনকাৰীয়ে। আবেদনকাৰীয়ে জমা দিব লাগিব কেইবাবিধ গুৰুত্বপূৰ্ণ নথি। আবেদন কৰা পাছত ভাৰতীয় নাগৰিক সম্পৰ্কত তদাৰক কৰিব জিলা ভিত্তিত। প্ৰতিখন জিলাৰ আয়ুক্তই নিয়োগ কৰিব অতিৰিক্ত প্ৰশাসনিক বিষয়া।
সম্পূৰ্ণ আধাৰ আৱেদন প্ৰক্ৰিয়াত চক্ৰ বিষয়াসকল হ’ব দায়বদ্ধ। পূৰ্বে NRCত আৱেদন কৰা পৰিয়ালেহে লাভ কৰিব আধাৰ কাৰ্ড। পূৰ্বৰ দৰে স্বয়ংক্ৰিয়ভাৱে আৱেদন কৰিলে নাপাব আধাৰ। আধাৰ কাৰ্ডৰ সকলো তথ্য কেন্দ্ৰীয় চৰকাৰলৈ প্ৰেৰণ কৰিব লাগিব পৰ্টেলৰ জৰিয়তে।
মাটিৰ খাজানা-
আনহাতে মাটিৰ খাজানাক লৈ সকাহ ৰাজ্য চৰকাৰৰ। ডিজিটেল পদ্ধতিৰ উপৰিও মেনুৱেল পদ্ধতিৰে দিব পাৰিব মাটিৰ খাজনা। ৰাজ্যৰ দৰিদ্ৰ আৰু ক্ষুদ্ৰ পট্টাধাৰীৰ বাবে এই সুবিধা ৰাজ্য চৰকাৰৰ।
ডিজিটেল পদ্ধতিত অসুবিধা পোৱা জনসাধাৰণে নগদ টকাৰে দিব পাৰিব খাজানা। মৌজাদাৰ অফিচত গৈ পোনে পোনে দিব পাৰিব প্ৰয়োজনীয় খাজানা। আজি ১১ ডিচেম্বৰৰ পৰা ৰাজ্যত দুই প্ৰক্ৰিয়াৰে খাজানা আদায় কৰিব পাৰিব জনসাধাৰণে।
মাটিৰ পট্টা-
ইয়াৰ উপৰিও মাটিৰ পট্টাক লৈয়ো বৃহৎ সিদ্ধান্ত লয় আজিৰ ৰাজ্যিক কেবিনেটত। ছচাইটি পঞ্জীয়ন নকৰিলেও লাভ কৰিব মাটিৰ পট্টা। বসুন্ধৰাৰ জৰিয়তে অতি সহজেই লাভ কৰিব মাটিৰ পট্টা। ৰাজ্য চৰকাৰে উঠাই দিলে ৰিনুৱেল ফাইন ব্যৱস্থা। পূৰ্বৰ পঞ্জীয়ন ম্যাদ উকলিলে এতিয়াৰে পৰা দিব নালাগে কোনো ধৰণৰ জৰিমনা তথা ফাইন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
