ক্ৰমে ভয়াৱহ হৈ পৰিছে ৰাজ্যৰ বান, ১৯ জিলালৈ এলাৰ্ট, বিপদসীমাৰ ওপৰেৰে বৈছে পানী
ৰাজ্যত ক্ৰমান্বয়ে বৃদ্ধি পাইছে বানপানী। বহু ঠাইত ধাৰণ কৰিছে ভয়াৱহ ৰূপ। ৰাজ্যৰ মুঠ ১৯ খন জিলালৈ সতৰ্ককতা জাৰি প্ৰশাসনৰ। ১৯ জিলাৰ ১,২৭৫ খন গাঁও বৰ্তমান বানৰ কৱলত।
মুঠ ৭২টা আশ্ৰয় শিবিৰত আছে ৮,১৪২ গৰাকী বানাক্ৰান্ত। ইয়াৰে ভিতৰত ৩,৩৬১ গৰাকী পুৰুষ আৰু ২,৮৬৮ গৰাকী মহিলা। ইয়াৰ উপৰিও আশ্ৰয় শিবিৰত ১,৮৭১টা শিশু আছে। ইয়াৰে ভিতৰত কৰিমগঞ্জত সৰ্বাধিক ২,২৪৪ গৰাকী লোক আশ্ৰয় শিবিৰত বাস কৰি আছে। কাজিৰঙাতো বানৰ তাণ্ডৱ। প্ৰাণৰ মমতাত কাৰ্বি পাহাৰলৈ ঢাপলি বহু জীৱৰ।
বিপদ সীমা অতিক্ৰম কৰিছে ব্ৰহ্মপুত্ৰৰ জলপৃষ্ঠই। প্ৰতিটো ঘন্টাত বৃদ্ধি পাইছে ব্ৰহ্মপুত্ৰৰ পানী। গুৱাহাটীতো বৃদ্ধি পাইছে ব্ৰহ্মপুত্ৰৰ জলস্তৰ। ভৰলুৰে গুৱাহাটীত সোমাইছে ব্ৰহ্মপুত্ৰৰ পানী। যাৰ বাবে বন্ধ কৰি দিয়া হৈছে শান্তিপুৰৰ শ্লুইছ গেট।
হোজাইতো পুনৰ বৃদ্ধি পাইছে কপিলীৰ জলস্তৰ। বছৰৰ তৃতীয়টো বানৰ কৱলত হোজাইৰ বিস্তীৰ্ণ অঞ্চল। ফেনে ফোটোকাৰে বাঢ়িছে কপিলীৰ জলস্তৰ। শোণিতপুৰৰ বৰচলাতো বানৰ সংহাৰ অব্যাহত। বৰচলাৰ ৮খনতকৈ অধিক গাঁও বানত কৱলত পৰিছে।
উজনি অসমৰ শিৱসাগৰতো বানে ধাৰণ কৰিছে সংহাৰী ৰূপ। দিচাংমুখত অধিক জটিল হৈ পৰিছে বান পৰিস্থিতি। কাজিৰঙা ৰাষ্ট্ৰীয় উদ্যানো বানপানীৰ কবলত। ধনশ্ৰী, পাঁচ নৈ আৰু ব্ৰহ্মপুত্ৰ নৈৰ পানী বৃদ্ধি হোৱাত ওৰাং ৰাষ্ট্ৰীয় উদ্যানতো ভয়াৱহ পৰিস্থিতি ৷ উদ্যানখনত নাঁওৱেই একমাত্ৰ ভৰষা বনকৰ্মীৰ।
ক্ৰমে জটিল হৈ পৰিছে কাজিৰঙাৰ বান পৰিস্থিতি। কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ ২২৩টা বন শিৱিৰৰ ভিতৰত বানে প্লাৱিত কৰিছে ৯৫টা বন শিবিৰ এলেকা ৷ ৰাষ্ট্ৰীয় উদ্যান কৰ্তৃপক্ষই প্ৰকাশ কৰা তথ্য অনুসৰি, বিশ্বনাথ বন্যপ্ৰাণী সংমণ্ডলৰ ২০টা আৰু পূৱ অসম বন্যপ্ৰাণী সংমণ্ডলৰ অন্তৰ্গত অগৰাতলি বনাঞ্চলত ৩৪টা, কহঁৰা বনাঞ্চলত ২০টা, বাগৰি বনাঞ্চলত ১০টা, বোকাখাত বনাঞ্চলত ৬টা বনশিবিৰ এলেকা প্লাৱিত কৰিছে বানে। বৰ্তমানলৈকে স্থানান্তৰ কৰা হৈছে ৬টা বন শিবিৰ।
বানৰ পৰা পৰিত্ৰাণ পাবলৈ একাংশ বন্যপ্ৰাণীয়ে হাইলেণ্ডত আশ্ৰয় লোৱাৰ সমান্তৰালকৈ একাংশ বন্যপ্ৰাণী কাজিৰঙাৰ ৩৭ নং ৰাষ্ট্ৰীয় পথ অতিক্ৰম কৰি কাৰ্বি পাহাৰৰ দিশে গতি কৰিছে ৷ এনে সময়ত স্থানীয় স্বেচ্ছাসেৱীৰ লগতে আৰক্ষী আৰু পৰিবহণ বিভাগৰ সহযোগত বন্যজন্তুৰ নিৰাপত্তা বাবে প্ৰদক্ষেপ গ্ৰহণ কৰিছে ৰাষ্ট্ৰীয় উদ্যান কৰ্তৃপক্ষই৷
যাৰ বাবে দিনৰ ভাগত যান বাহনৰ চলাচল কিছু মধ্যমীয়া হলেও নিশাৰ ভাগত ওৱান ৱে কৰা হৈছে পথছোৱা। লগতে বনৰক্ষীয়ে পহৰা দিছে সমগ্ৰ পথ ছোৱা। যাৰ বাহনৰ গতি বেগতো ৰোধ লগাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
