অসম লাইভ ২৪ঃ মহানগৰবাসীৰ বাবে এটা সুখবৰ৷ সম্পূৰ্ণ হৈ উঠিছে দিছপুৰৰ উৰণ সেতু৷ দীপাৱলীৰ দিনাই শুভাৰম্ভণি হ’ব এই উৰণ সেতুৰ৷ দিনে-নিশাই ব্যস্ত হৈ পৰিছে শ্ৰমিকসকল৷ ২০১৯ চনৰ ৮ ডিচেম্বৰ তাৰিখে আধাৰশিলা স্থাপন হোৱা দিছপুৰ উৰণ সেতুৰ নিৰ্মাণকাৰ্য প্ৰায় সম্পূৰ্ণ৷ ৯৫ শতাংশ নিৰ্মাণকাৰ্য সম্পূৰ্ণ হৈ উঠিছে এই উৰণ সেতুৰ৷ মহানগৰবাসীক যান-জঁটৰ পৰা সকাহ দিবলৈ ক্ষিপ্ৰতাৰে নিৰ্মাণ কৰিলে এই উৰণ সেতু৷ ১২০৫ মিটাৰ দৈৰ্ঘ্যৰ নিৰ্মাণ সেতুৱে আকৰ্ষণ কৰিব মহানগৰবাসীক৷ t type আৰ্হিৰে নিৰ্মিত হৈছে এই উৰণ সেতু৷ উৰণ সেতুৰ তলত থাকিব পাৰ্কিঙৰ সুব্যৱস্থা৷ প্ৰায় ১৮টা মাহতে সম্পূৰ্ণ হৈ উঠা এই উৰণ সেতু নিৰ্মাণকাৰ্যৰ শেষ পৰশত ব্যস্ত হৈছে শ্ৰমিকসকল৷ অতি আকৰ্ষণীয়ভাৱে উৰণ সেতুৰ দুয়োকাষে অংকন কৰা হৈছে অসম তথা উত্তৰ-পূৰ্বাঞ্চলৰ সাংস্কৃতিক চিহ্নসমূহ৷ তদুপৰি নান্দনিক দৃশ্য অংকন কৰি সৌন্দৰ্য বৰ্ধন কৰা হৈছে এই নৱনিৰ্মিত উৰণ সেতুত৷ অহা ৪ নৱেম্বৰ তাৰিখে শুভাৰম্ভণিৰ পূৰ্ণ সম্ভাৱনা৷ অন্ত পৰিব মহানগৰবাসীৰ অপেক্ষাৰ৷ প্ৰায় ১২৭ কোটি ২২ লাখ টকা ব্যয়ৰে নিৰ্মাণ হৈছে এই উৰণ সেতু৷ ৰাজধানী চহৰ গুৱাহাটীত যান-জঁটৰ সমস্যা সমাধানৰ ক্ষেত্ৰত ৰাজ্য চৰকাৰে বিশেষভাৱে এই উৰণ সেতু নিৰ্মাণৰ পদক্ষেপ গ্ৰহণ কৰিছে৷ জি এছ ৰোডৰ পল্টনবজাৰৰ দিশৰ পৰা খানাপাৰা অভিমুখে যাতায়াত কৰা যাত্ৰীসকলে এই উৰণ সেতুৰ ওপৰেৰে অতি সহজে যাতায়াত কৰিবলৈ পাৰিব৷ ইয়াৰ উপৰি দিছপুৰ লাষ্টগে’টৰ পৰা পল্টন বজাৰ-গণেশগুৰি অভিমুখে অহা যাত্ৰীসকলে অতি সহজে নিজৰ বাহন লৈ যাতায়াত কৰিব পাৰিব৷ ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ বিশেষ তৎপৰতাৰে অতি কম দিনৰ ভিতৰতে এনেদৰে নিৰ্মাণ হৈ উঠিছে এই উৰণ সেতু৷ বৰ্তমানপৰ্যন্ত ৰাজ্য চৰকাৰে এই উৰণ সেতুৰ নামকৰণ কৰা নাই যদিও অতি শীঘ্ৰে এই উৰণ সেতু ৰাজ্য চৰকাৰে কাৰ নামত উৎসৰ্গিত কৰিব ঘোষণা কৰাৰ সম্ভাৱনা আছে৷ আন যিয়েই নহওক অতি কম দিনৰ ভিতৰতে এনেধৰণে আকৰ্ষণীয়ভাৱে উৰণ সেতু নিৰ্মাণ কৰি মহানগৰবাসীক অহা দীপাৱলীত উপহাৰ দিবলৈ তৎপৰ হৈ পৰিছে ৰাজ্য চৰকাৰকে ধৰি উৰণ সেতু নিৰ্মাণকাৰী সংস্থা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
