উত্তৰ প্ৰদেশৰ আজমগড় জিলাৰ আহৰাউলা থানা এলেকাৰ শম্ভুপুৰ গাঁৱত এখন পূজাক কেন্দ্ৰ কৰি সংঘটিত এক ঘটনাই চাঞ্চল্যৰ সৃষ্টি কৰিছে। অভিযোগ অনুসৰি, পূজাৰ সময়ত আধাৰ কাৰ্ড বিচৰাক লৈ পুৰোহিতৰ সৈতে হোৱা তৰ্কৰ পিছত অৰবিন্দ সিং নামৰ এজন ব্যক্তিয়ে গু*লীচালনা কৰে। এই ঘটনাত অৰবিন্দ সিঙৰ পত্নী ববিতাসহ দুজন পুৰোহিতৰ মৃ*ত্যু হোৱা বুলি জানিব পৰা গৈছে। ঘটনাৰ সময়ত অৰবিন্দৰ ঘৰত নাৰায়ণী বালি পূজা চলি আছিল। পূজাত চাৰিজন পুৰোহিত, অৰবিন্দৰ পত্নী ববিতা, পুত্ৰ আৰু এগৰাকী কন্যা উপস্থিত আছিল। জানিব পৰা মতে, বিগত দুদিন ধৰি অৰবিন্দৰ ঘৰত এই পূজা চলি আছিল।
প্ৰায় দুবছৰ পূৰ্বে অৰবিন্দ সিঙৰ ভাতৃ গুদ্দু সিঙক গু*লীয়াই হ*ত্যা কৰা হৈছিল। ইয়াৰ পিছত পৰিয়ালৰ লোকে তেওঁৰ আত্মাৰ শান্তিৰ বাবে নাৰায়ণী বলি পূজা কৰাৰ সিদ্ধান্ত লৈছিল বুলি জানিব পৰা গৈছে। কিন্তু অভিযোগ অনুসৰি, অৰবিন্দ এই পূজাৰ বিৰোধী আছিল। তেওঁ পত্নী আৰু মাতৃক পূজা নকৰিবলৈ অনুৰোধো কৰিছিল। তথাপিও পৰিয়ালৰ লোকে ঘৰত পূজা অনুষ্ঠিত কৰে।
মঙলবাৰে সন্ধিয়া প্ৰায় ৬ বজাত অৰবিন্দ বজাৰৰ পৰা ঘৰলৈ উভতি আহে। ঘৰলৈ আহি পূজা চলি থকা দেখি তেওঁ পুৰোহিতসকলক পূজাৰ বিষয়ে সোধা-পোছা কৰে। পুৰোহিতসকলে তেওঁক অনুষ্ঠানটোৰ বিষয়ে অৱগত কৰে। ইয়াৰ পিছতে অৰবিন্দে পুৰোহিতসকলৰ আধাৰ কাৰ্ড বিচাৰে। আধাৰ কাৰ্ড দেখুওৱাক লৈ তেওঁৰ সৈতে পুৰোহিতসকলৰ তৰ্ক-বিতৰ্ক আৰম্ভ হয়।
অভিযোগ অনুসৰি, এই বিবাদৰ মাজতে অৰবিন্দে ঘৰত ৰখা পি*ষ্টল উলিয়াই গু*লীচালনা কৰে। গু*লীচালনাত অৰবিন্দৰ পত্নী ববিতা, পুৰোহিত মহেন্দ্ৰ পাঠক আৰু আন এজন পুৰোহিত আহত হয়। পিছত তিনিওজনৰ মৃ*ত্যু হোৱা বুলি জানিব পৰা গৈছে। গু*লীচালনা আৰম্ভ হোৱাৰ লগে লগে পূজাত উপস্থিত থকা আন পুৰোহিতসকলে ঘটনাস্থলীৰ পৰা পলায়ন কৰে। ঘটনাটোৰ পিছত সমগ্ৰ গাঁওখনতে আতংকৰ সৃষ্টি হয়। ঘটনাৰ খবৰ লাভ কৰাৰ লগে লগে আৰক্ষীৰ এটা দল ঘটনাস্থলীত উপস্থিত হয়। আৰক্ষীয়ে ঘটনাস্থলী পৰীক্ষা কৰাৰ লগতে গু*লীচালনাত ব্যৱহৃত অ*স্ত্ৰ আৰু অন্যান্য প্ৰমাণ সংগ্ৰহ আৰম্ভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
