এগৰাকী ২১ বছৰীয়া যুৱতীয়ে অট্টালিকাৰ ১০ মহলাৰ পৰা জঁপিয়াই আত্মহত্যা কৰাৰ ঘটনাই বাংলাদেশৰ ৰাজধানী ঢাকাত চাঞ্চল্যৰ সৃষ্টি কৰিছে৷ যুৱতীগৰাকীৰ আত্মহত্যাৰ পিছত উদ্ধাৰ হোৱা ছুইচাইড নোটে সমগ্ৰ মানৱ সমাজকে জোঁকাৰি গৈছে৷
আত্মহত্যা কৰাৰ পূৰ্বে যুৱতীগৰাকীয়ে আত্মহত্যাৰ এক টোকাত নিজৰ পিতৃক এগৰাকী ধৰ্ষণকাৰী বুলি অভিহিত কৰি তেওঁৰ সৈতে মানুহ জীয়াই থাকিব নোৱাৰে বুলি লিখি গৈছে৷
এই আত্মহননৰ ঘটনাটো শনিবাৰে সন্ধিয়া বাংলাদেশৰ ৰাজধানী ঢাকাৰ দক্ষিণখান অঞ্চলত সংঘটিত হয়। আৰক্ষীৰ সূত্ৰ অনুসৰি মৃত যুৱতীগৰাকীৰ নাম সঞ্জনা। ২১ বছৰীয়া যুৱতীগৰাকীয়ে কলেজত পঢ়ি আছিল।
লগতে পঢ়ক নয়দাৰ যমজ অট্টালিকাৰ সম্পূৰ্ণ কাহিনী কি? উচ্চতম ন্যায়ালয়ে কিয় ধ্বংস কৰিবলৈ নিৰ্দেশ দিলে?
যুৱতীগৰাকীৰ আত্মহত্যাৰ পাছতে উদ্ধাৰ হোৱা আত্মহত্যাৰ টোকাত তেওঁৰ মৃত্যুৰ বাবে পিতৃকে জগৰীয়া কৰি থৈ যোৱাৰ বাবে আৰক্ষীয়ে পিতৃক গ্ৰেপ্তাৰ কৰি জেৰা অব্যাহত ৰাখিছে৷
দক্ষিণখান আৰক্ষী থানাৰ অ’চি মামুনুৰ ৰছিদে সংবাদ মাধ্যমক জনোৱা মতে, যুৱতীগৰাকীয়ে ফ্লেটটোৰ নিৰাপত্তাৰক্ষীৰ পৰা চাবিটো লৈ কাপোৰ শুকোৱাৰ কথা কৈ ছাদলৈ যায়। ইয়াৰ পিছত তেওঁ দশম মহলাৰ ছাদৰ পৰা তললৈ জঁপিয়াই দিয়ে।
এই খবৰ লাভ কৰাৰ লগে লগে আৰক্ষীয়ে ঘটনাস্থলীত উপস্থিত হয়। আৰক্ষীয়ে ঘটনাস্থলীৰ পৰা এটা ছুইচাইড নোট উদ্ধাৰ কৰিছে৷ সৰু সেউজীয়া কাগজ এখনত যুৱতীগৰাকীয়ে লিখি গৈছে ‘মোৰ মৃত্যুৰ বাবে দায়ী দেউতা’। লগতে লিখিছে ঘৰত জীৱ-জন্তুৰ লগত থাকিব পাৰি, কিন্তু অমানুহৰ লগত থাকিব নোৱাৰি। এজন অত্যাচাৰী আৰু ধৰ্ষণকাৰী, যিয়ে নিজৰ কন্যাকো ৰেহাই নিদিলে।
লগতে পঢ়ক বিবাহ মঞ্চতে দৰা আৰু কইনাৰ চৰৰ বৰষুণ, দৰাই কইনাক কল খুৱাবলৈ গৈ ঘটিল অথন্তৰ
আৰক্ষীৰ সূত্ৰ অনুসৰি কিছুদিন পূৰ্বে যুৱতীগৰাকীৰ পিতৃ শ্বাহীন আলমে দ্বিতীয়বাৰৰ বাবে বিবাহপাশত আবদ্ধ হৈছিল। ইয়াৰ পৰাই তেওঁলোকৰ পাৰিবাৰিক অশান্তি আৰম্ভ হৈছিল।
কিছুদিন পূৰ্বে অৱশ্যে সঞ্জনাৰ মাতৃয়ে স্বামীৰে বিবাহ বিচ্ছেদ কৰিছিল। কিছুদিন ধৰি মানসিক সমস্যাত ভুগি আছিল সঞ্জনা। যুৱতীগৰাকীয়ে মানসিক অস্থিৰতাৰ চিকিৎসাও গ্ৰহণ কৰি থকাৰ প্ৰমাণ পোৱা গৈছে৷ আৰক্ষীয়ে প্ৰেছক্ৰিপচনো উদ্ধাৰ কৰিছে।
আৰক্ষীৰ প্ৰাৰম্ভিক ধাৰণা অনুসৰি যুৱতাগৰাকীয়ে পাৰিবাৰিক অস্থিৰতা আৰু আৱেগিক কাৰণত আত্মহত্যা কৰে। ঢাকা আৰক্ষীয়ে সমগ্ৰ ঘটনাৰ তদন্ত অব্যাহত ৰাখিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
