আগ্ৰাসী ৰাছিয়াই ইউক্ৰেইন আক্ৰমণ কৰাটো নিশ্চিত! ৰাছিয়াৰ ৰাষ্ট্ৰপতি ভ্লাদিমি পুটিনে ইউক্ৰেইন আক্ৰমণ কৰা সিদ্ধান্ত লৈছে৷ ইতিমধ্যে ইউক্ৰেইন আক্ৰমণৰ সকলো পৰিকল্পনা প্ৰস্তুত কৰিছে ৰাছিয়াৰ ৰাষ্ট্ৰপতি পুটিনে৷
মাৰ্কিন ৰাষ্ট্ৰপতি জ’ বিডেনৰ উদ্ধৃতিৰে এই কথা প্ৰকাশ কৰিছে সংবাদ সংস্থা ৰয়টাৰ-এ৷
জ’ বিডেনৰ দাবী যে আৰু দুই এদিনৰ ভিতৰতে ৰাছিয়াই ইউক্ৰেইন আক্ৰমণ কৰিব৷ ইফালে ব্ৰিটিছ সংবাদ সংস্থা বিবিচি-এ প্ৰকাশ কৰা মতে মাৰ্কিন গুপ্তচৰৰ তথ্যৰ ভিত্তিত জ’ বিডেনে এই দাবী কৰিছে৷ বিডেনৰ মতে ৰাছিয়াই ভুৱা সংকটৰ সৃষ্টি কৰি ইউক্ৰেইন আক্ৰমণৰ প্ৰস্তুতি চলাইছে আৰু ইউক্ৰেইনৰ ৰাজধানী কীয়েভকো আক্ৰমণ কৰিব৷
আমেৰিকাই দাবী কৰিছে যে ৰাছিয়াই ইউক্ৰেইন সীমান্তত ১ লাখ ৬৯ হাজাৰ পৰা ১ লাখ ৯০ হাজাৰ সৈন্য মোতায়েন কৰিছে৷ আন্তঃৰাষ্ট্ৰীয় সংবাদ মাধ্যমসমূহত প্ৰকাশ পোৱা অনুসৰি ৰাছিয়াই ইউক্ৰেইন আক্ৰমণ কৰাৰ ৪০ৰ পৰা ৫০ শতাংশ সম্ভাৱনা আছে৷
সূত্ৰৰ মতে মস্কোৱে ইউক্ৰেইন সীমান্তৰ সমীপত ১২৫ টা বেটেলিয়ন অতি কৌশলেৰে মোতায়েন কৰিছিল৷ সূত্ৰসমূহে প্ৰকাশ কৰা অনুসৰি স্বাভাৱিক অৱস্থাত ৬০ টা বেটেলিয়ন মজুত ৰখাৰ বিপৰীতে ফেব্ৰুৱাৰীৰ আৰম্ভণিৰে পৰা ইয়াৰ পৰিমাণ ৮০ টালৈ বৃদ্ধি কৰা হৈছে।
ইফালে আমেৰিকাৰ এই দাবী নস্যাৎ কৰিছে মস্কোৱে৷ অৱশ্যে মস্কোৱে ইউক্ৰেইনৰ NATOত যোগদানৰ বিৰোধিতাত অটল আছে৷
ইউক্ৰেইনে NATOত যোগদান নকৰে বুলি নিশ্চিতি প্ৰদান কৰিবলৈও মস্কোৱে দাবী জনাইছে৷ অৰ্থাৎ ৰাছিয়াই ইউক্ৰেইনৰ NATOত যোগদান কেতিয়াও মানি নলয়৷
যুদ্ধ বিশেষজ্ঞসকলৰ মতে মাৰ্কিন ৰাষ্ট্ৰপতি জ’ বিডেনৰ এই দাবীয়ে ৰাছিয়াৰ ইউক্ৰেইন আক্ৰমণৰ সম্ভাৱনাক প্ৰকট কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
