NEET প্ৰশ্নকাকত ফাদিল কেলেংকাৰীৰ বিৰুদ্ধে CJPৰ প্ৰতিবাদৰ প্ৰভাৱ যেন এইবাৰ বিহাৰৰ উপ নিৰ্বাচনতো পৰিল। বিহাৰৰ বাংকীপুৰৰ উপ নিৰ্বাচনত বৃহৎ বিপৰ্যয়ৰ সন্মুখীন হৈছে বিজেপি। বিজেপিৰ ৰাষ্ট্ৰীয় সভাপতি নীতিন নবীনে ৰাজ্যসভালৈ যোৱাৰ পিছতে খালী হৈ আছিল বাংকীপুৰ আসনখন। বিজেপিৰ দুৰ্গ হিচাপে পৰিচিত বাংকীপুৰ সমষ্টিটোত বিজেপিৰ প্ৰাৰ্থী নীৰজ কুমাৰ সিনহাক ১৮,৯৫৩টা ভোটৰ ব্যৱধানত পৰাস্ত কৰিলে জন সূৰয পাৰ্টীৰ হৈ প্ৰতিদ্বন্দ্বিতা আগবঢ়োৱা প্ৰশান্ত কিশোৰে। আশ্চৰ্যকৰ কথাটো হৈছে ৩১টাকৈ ৰাউণ্ড চলা গণনাৰ এটা ৰাউণ্ডতো বিজেপি প্ৰাৰ্থীগৰাকীয়ে লাভ নকৰিলে অগ্ৰগতি। বিগত কেইবাটাও কাৰ্যকাল বাংকীপুৰত ক্ৰমাগতভাৱে বিজেপিৰ ৰাষ্ট্ৰীয় অধ্যক্ষ নীতিন নবীনেই সমষ্টিটোৰ ভোটাৰৰ প্ৰথম পছন্দৰ আছিল।
জন সূৰযৰ বিশ্বাসযোগ্যতা আৰু বিহাৰৰ ৰাজনীতিৰ বাবে বাংকীপুৰত প্ৰশান্ত কিশোৰৰ বিজয়ৰ উল্লেখযোগ্য তাৎপৰ্য আছে। বাংকীপুৰৰ উপ-নিৰ্বাচন জন সূৰয পাৰ্টি আৰু প্ৰশান্ত কিশোৰৰ ৰাজনৈতিক ভৱিষ্যতৰ এয়া আছিল প্ৰাৰম্ভিক পৰীক্ষা। বিগত তিনিটা দশক ধৰি বাংকীপুৰ বিজেপিৰ বাবে এক অভেদ্য দুৰ্গ হৈ আছিল। এতিয়ালৈকে প্ৰশান্ত কিশোৰ কেৱল এজন সফল নিৰ্বাচনী কৌশলবিদ হিচাপেহে পৰিচিত আছিল। কিন্তু ৰাজনৈতিক দল এটাৰ নেতৃত্ব দিয়াৰ ক্ষেত্ৰত জনসাধাৰণৰ পৰা প্ৰত্যক্ষ আশীৰ্বাদ লাভৰ পৰা এই পৰ্যন্ত বঞ্চিত হৈ আছিল প্ৰশান্ত কিশোৰ। কিয়নো বিহাৰৰ বিগত বিধানসভা নিৰ্বাচনতো প্ৰশান্ত কিশোৰৰ জন সূৰযে আসনশূন্য হিচাপেই নিৰ্বাচনৰ অভিযান সামৰিছিল। কিন্তু বাংকীপুৰৰ উপ নিৰ্বাচনত প্ৰশান্ত কিশোৰৰ জন সূৰযৰ এই প্ৰদৰ্শনে বিহাৰত শাসনৰ বাঘজৰীত থকা বিজেপিৰ কাম-কাজৰ প্ৰতি যে সাধাৰণ ৰাইজ সন্তুষ্ট নহয় ইয়াকেই প্ৰমাণ কৰিছে বুলি মত ব্যক্ত কৰিছে ৰাজনৈতিক বিশেষজ্ঞসকলে। প্ৰশান্ত কিশোৰৰ এই জয়ৰ পিছতে পৰৱৰ্তী সময়ত বিধানসভাত যে বিহাৰৰ মুখ্যমন্ত্ৰী সম্ৰাট চৌধুৰী চাপত থাকিব তাত কোনো সন্দেহ নাই।
বাংকীপুৰ বিধানসভাৰ উপ-নিৰ্বাচনত এই জয়ৰ ফলত জন সূৰয পাৰ্টিৰ কৰ্মীসকলৰ মাজত প্ৰচণ্ড উৎসাহৰ সৃষ্টি হৈছে। প্ৰশান্ত কিশোৰে শেষলৈকে নিজৰ অগ্ৰগতি বজাই ৰাখিছিল। এ এন কলেজৰ কাউণ্টিং চেণ্টাৰৰ পৰা পাৰ্টিৰ কেম্প অফিচলৈকে উৎসৱমুখৰ পৰিৱেশৰ সৃষ্টি হৈছিল। শ্ৰমিকসকলে ঢোলৰ তালত নাচি, প্ৰশান্ত কিশোৰৰ সমৰ্থনত শ্লোগান দি সমদল উলিয়ায়। প্ৰশান্ত কিশোৰৰ এই জয় এক ঐতিহাসিক ৰাজনৈতিক পৰিৱৰ্তন হিচাপে দৃষ্টি দিছে অন্যান্য ৰাজনৈতিক দলসমূহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
