অসম লাইভ২৪ঃ ৫দশকৰ কেৰিয়াৰত ২০০তকৈয়ো বেছি ছবিত অভিনয় কৰিছে বলীউডৰ ‘Angry Young Man’ অমিতাভ বচ্চনে। অভিনয়ৰ বাবে যেনেদৰে তেওঁ প্ৰশংসা বুটলিছে তেনেদৰে একাধিকবাৰ সমালোচনাৰো মুখামুখি হৈছে অমিতাভ বচ্চন। অমিতাভৰ সৈতে তেওঁৰ সহ অভিনেত্ৰী জীনত আমন, পাৰভিন ববিৰ পৰা স্মিতা পেটেলৰ দৰে তাৰকাৰ নাম সাঙোৰ খোৱাৰ কথাও বিভিন্ন সূত্ৰই প্ৰকাশ কৰি আহিছে। কিন্তু এই সকলোবোৰৰ ভিতৰত ৰেখা অন্যতম। ৰেখাৰ সৈতে অমিতাভৰ সম্পৰ্কৰ কথা আজিও চৰ্চাত। আজি ৮১ বছৰত ভৰি দিলে অমিতাভ বচ্চনে। অমিতাভ বচ্চনৰ ওপজা দিনত আকৌ এবাৰ বলীউডৰ বিভিন্ন মহলে শ্বেয়াৰ কৰিছে অমিতাভ বচ্চনৰ বহু অজানা কথা।
১৯৭৩ চনত বলীউড অভিনেত্ৰী জয়া বচ্চনৰ সৈতে সাত পাকত বান্ধ খাইছিল অমিতাভ বচ্চন। বলীউডৰ এক সূত্ৰই প্ৰকাশ কৰামতে জয়াৰ সৈতে বিবাহৰ তিনি বছৰৰ পাছতেই অভিনেত্ৰী ৰেখাৰ সৈতে পৰকীয়া সম্পৰ্ক গঢ়ি উঠে অমিতাভৰ। ১৯৭৬ চনত মুক্তিপ্ৰাপ্ত ‘দৌ অনজানে’ৰ শ্বুটিং চলি থকাৰ সময়ত ৰেখাৰ সৈতে বিবাহ-বহিৰ্ভূত সম্পৰ্কত বান্ধ খাই পৰে অমিতাভ বচ্চন। সত্তৰৰ দশকৰ পৰাই দুই তাৰকাৰ সম্পৰ্কক লৈ চৰ্চা অব্যাহত আছে। অমিতাভ আৰু ৰেখা দুজনেই কিন্তু আজিলৈকে এই সম্পৰ্কৰ কথা স্বীকাৰ কৰা নাই।
ৰেখাৰ এক পুৰণা সাক্ষাৎকাৰত প্ৰকাশ কৰা অনুসৰি অমিতাভৰ প্ৰতি তেওঁৰ অগাধ ভালপোৱা আৰু শ্ৰদ্ধা আছে। সাক্ষাৎকাৰত ৰেখাই লগতে কয়, ‘তেওঁৰ সৈতে চিনেমাত ৰোমাণ্টিক দৃশ্যত অভিনয় কৰা দেখি কান্দি দিছিল জয়াই। এই ঘটনা দেখিয়েই মই তেওঁৰ সৈতে অভিনয় কৰা বাদ দিলো। মোৰ তেওঁৰ সৈতে শেষ ছবি আছিল ১৯৭৮ চনত মুক্তিপ্ৰাপ্ত ‘মুকদ্দৰ কা ছিকন্দৰ’ ছবিখন।’
এই ছবিখনতেই শেষবাৰৰ বাবে ৰেখা-অমিতাভক একেলগে দেখা গৈছিল। ৰেখাই এই প্ৰসংগত লগতে কয়, ‘মুকন্দৰ কা ছিকন্দৰ’ ছবিৰ প্ৰিমিয়াৰ শ্ব’তেই মই শেষবাৰৰ বাবে তেওঁৰ কাষত বহিছো। সন্মুখৰ আসনত জয়া বহিছিল। জয়াৰ পাছত ছীটত অমিতাভে তেঁওৰ পিতৃ-মাতৃৰ সৈতে বহিছিল। ময়ো কাষতেই আছিলো। মই জয়ালৈ মন কৰি আছিলো। জয়াই তেওঁৰ সৈতে মোৰ ৰোমাণ্টিক মুহূৰ্ত দেখি চকুপানী টুকিছিল।’ এই ছবিৰ পাছতেই অমিতাভ আৰু জয়াই সকলো প্ৰডিউছাৰকে জনাই দিয়ে যে তেওঁলোক দুয়োৱে আৰু একেলগে কাম নকৰে। ৰেখাই এই প্ৰসংগত সাংবাদিকক কয়, ‘মই অমিতাভৰ সৈতে আলোচনাত মিলিত হৈছিলো। তেওঁক সুধিছিলো মোৰ সৈতে কাম কৰিবলৈ ইচ্ছা আছেনে? তেওঁ কিন্তু তেতিয়া মোৰ প্ৰশ্নৰ একোৱেই উত্তৰ নিদিলে।’
ৰেখাৰ সেই প্ৰশ্নৰ উত্তৰত অমিতাভে কৈছিল, ‘মোক এই বিষয়ে আৰু কোনেও প্রশ্ন নকৰিব।’ বলীউড ইণ্ডাষ্ট্ৰীৰ সকলোৱে ৰেখাক এই প্ৰশ্ন বহুদিন ধৰি কৰি আহিছে। ১৯৮১ চনত যশ চোপ্ৰাৰ পৰিচালনাত প্ৰেক্ষাগৃহত মুক্তি লাভ কৰে চিলচিলা ছবিখনে। এই ছবিত অমিতাভ আৰু জয়াৰ ওপৰিও অভিনয় কৰিছে ৰেখাই। বলীউডৰ একাংশৰ অনুমান যে তিনি তাৰকাৰ ত্ৰিকোণ প্ৰেম কাহিনীৰ ওপৰত ভিত্তি কৰিয়েই এই ছবি নিৰ্মাণ কৰিছিল যশে। বলীউডৰ খবৰ অনুসৰি জয়াই ছবিখনত অভিনয় কৰিবৰ বাবে ৰাজী নাছিল। কিন্তু ছবিৰ অন্তিম কাহিনী শুনি পাছত জয়াই এই ছবিত অভিনয় কৰিবলৈ মন মেলে। বিবাহ বহিৰ্ভূত সম্পৰ্কক লৈ ছিলছিলাৰ কাহিনী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
