অসম লাইভ২৪ঃ বয়সৰ সৈতে এগৰাকী নাৰীয়ে গৰ্ভধাৰণ কৰিব পাৰিবনে সেই বিষয়টো নিৰ্ভৰ কৰে৷ বহু বয়সলৈ বিয়াত নবহা যুৱতীয়ে একাংশই এতিয়া ডিম্বানুৰ সংৰক্ষণ কৰিবলৈ আৰম্ভ কৰিছে৷ একাংশ বলীউড অভিনেত্ৰীয়েও লৈছে এই পদক্ষেপ৷ এই তালিকাত পোনতে আছে প্ৰিয়ংকা চোপ্ৰা, একতা কাপুৰকে ধৰি বহুকেইগৰাকীয়েই৷
কিছুদিন পূৰ্বেই প্ৰিয়ংকাই জনাইছিল যে তেওঁ প্ৰায় ৩০ বছৰ বয়সৰ পৰাই ডিম্বানুৰ সংৰক্ষণ কৰি আহিছিল৷ প্ৰিয়ংকা তেতিয়া নিকৰ সৈতে বিবাহপাশত আৱদ্ধ হোৱা নাছিল৷ তথাপিও মনৰ একোণত মাতৃত্বৰ অনুভৱ কঢ়িওৱাৰ হেঁপাহ আছিল৷ সেয়ে প্ৰিয়ংকাই ভৱিষ্যতে মাতৃ হোৱাৰ ইচ্ছাৰেই ডিম্বানুৰ সংৰক্ষণ কৰিছিল৷ কিন্তু কেৱল প্ৰিয়ংকাই নহয় এই পন্থা লৈছে কেইবাগৰাকীও বলীউড তাৰকাই৷
তালিকাত আছে একতা কাপুৰো৷ ২০১৯ চনত চেৰোগেছিৰ মাধ্যমেৰে মাতৃ হৈছে একতা৷ হিন্দী টেলিভিছন জগতৰ ৰাণী একতাই ৩৬ বছৰ বয়সৰ পৰাই ডিম্বানু সংৰক্ষণ কৰিছিল৷ তেওঁ ভাৱিছিল যে তেওঁৰ বিবাহ কেতিয়াও নহ’বই সেয়ে একক মাতৃত্বৰ বাবেই ডিম্বানুৰ সংৰক্ষণ কৰিছিল একতাই৷ ডিম্বানু সংৰক্ষণ কৰিছিল কাজলৰ ভগ্নী তানিশাইয়ো৷ অভিনেত্ৰী তথা বিগবছৰ প্ৰাক্তন প্ৰতিযোগী তানিশাই ৩৩ বছৰত নিজৰ ডিম্বানু সংৰক্ষণ কৰিছিল৷ প্ৰায় ৩৯ বছৰলৈ ডিম্বানুৰ সংৰক্ষণ কৰিছিল তানিশাই৷ অভিনেত্ৰী ডায়েনা হেডেনেও ডিম্বানুৰ সংৰক্ষণ কৰিছে৷ দুবাৰকৈ অন্তঃসত্বাও হৈছে প্ৰাক্তন বিশ্বসুন্দৰী ডায়েনাই৷ ২০১৬ চনত সঞ্চিত ডিম্বানুৰ পৰাই মাতৃ হৈছিল ডায়েনা৷ দ্বিতীয়বাৰ ডায়েনা অন্তঃসত্বা হৈছে ২০১৮ চনত৷ দ্বিতীয়বাৰ তেওঁ যমজ সন্তানৰ মাতৃ হয়৷
অভিনেত্ৰী ৰাখী ছাৱন্তেও ডিম্বানুৰ সংৰক্ষণ কৰি থৈছে৷ ৰাখীৰ প্ৰেম আৰু বিবাহক লৈ একাধিক বিতৰ্ক থাকিলেও বৰ্তমানলৈ ৰাখীয়ে সন্তান জন্ম দিয়া নাই৷ ৰিয়েলিটি শ্ব বিগবছ ১৪ ত ৰাখীয়ে এবাৰ কৈছিল যে তেওঁ মাতৃ হ’ব বিচাৰে৷ যিসকলৰ সৈতে ৰাখীয়ে বৰ্তমানলৈ সম্পৰ্ক ৰাখিছে সেইসকল পিতৃ হোৱাৰ যোগ্য নহয়৷ সঠিক মানুহ পালেই তেওঁ বিয়া কৰাই মাতৃ হ’বলৈ প্ৰস্তুত বুলিও জনাইছিল ৰাখীয়ে৷
ইয়াৰোপৰি ডিম্বানু সংৰক্ষণ কৰা অভিনেত্ৰীৰ ভিতৰত এগৰাকী হৈছে লাল সিং চাড্ডা আৰু থ্ৰী ইডিয়েটত অভিনয় কৰা মোনা সিংহও৷ ৩৪ বছৰ বয়সত মোনাই ডিম্বানুৰ সংৰক্ষণ কৰিছে৷ ২০১৯ চনত বিবাহপাশত আৱদ্ধ হৈছে মোনা৷ অৱশ্যে বৰ্তমানলৈ মোনাই কোনো সন্তান জন্ম দিয়া নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
