অসম লাইভ ২৪ঃ ৰাজ্যৰ আন চাৰি সমষ্টিৰ লগতে গোসাঁইগাঁও বিধান সভা সমষ্টিতো হ’ব উপ নিৰ্বাচন। একেবাৰে চাৰিবাৰকৈ বিধায়ক হিচাপে নিৰ্বাচিত হোৱা বি পি এফ দলৰ বিধায়ক মাজেন্দ্ৰ নাৰ্জাৰী দেৱে বিধায়ক হিচাপে নিৰ্বাচিত পোৱাৰ পাছত কোভিড ৰোগত আক্ৰান্ত হৈ মৃত্যুবৰণ কৰে। ফলত বিধায়ক পদটো খালি হৈ পৰে। ২৮ ছেপ্তেম্বৰ তাৰিখে নিৰ্বাচন আয়োগে ঘোষণা কৰে নিৰ্বাচনী অধিসূচনা। সেই হিচাপে অহা ৩০ অক্টোবৰ তাৰিখে ৰাজ্যৰ পাঁচ বিধান সভা নিৰ্বাচনত ভোটগ্ৰহণ অনুষ্ঠিত হব। ইয়াক লৈ বিভিন্ন দল, ৰাজনৈতিক দলৰ মাজত নিৰ্বাচনী তৎপৰতা বৃদ্ধি পোৱা পৰিলক্ষিত হৈছে। বিভিন্ন প্ৰাৰ্থীয়ে ভিৰ কৰিছে নিজ নিজ দলৰ মজিয়া।
বিটিচিত স্বায়ত্বশাসিত পৰিষদৰ শাসকীয় দল ইউ পি পি এলত প্ৰাৰ্থীত্বৰ দৌৰত আছে গোসাঁইগাঁও জিলা ইউপিপিএলৰ সভাপতি জিৰণ বসুমতাৰী। তেওঁ বিগত বিটিচি স্বায়ত্বশাসিত পৰিষদৰ কাৰ্যকালত জমদুৱাৰ পৰিষদীয় সমষ্টিৰ ইউপিপিএল দলৰ পাৰিষদ আছিল। কিন্তু যোৱা পৰিষদীয় নিৰ্বাচনত ইউপিপিএল দল শাসনত আহিল যদিও তেওঁ উত্তীৰ্ণ হবলৈ সক্ষম নহ’ল। ফলত জিৰণ বসুমতাৰী উক্ত উপ নিৰ্বাচনত ইউপিপিএল দলৰ প্ৰাৰ্থীত্ব লাভ কৰিব বুলি সৰ্বত্ৰে প্ৰচাৰিত। আনহাতে ইউপিপিএল দলৰ আন এক অন্যতম দাবীদাৰ ইউপিপিএল দলৰ যুৱ মৰ্চাৰ সভাপতি সোমনাথ নাৰ্জাৰী। তেওঁ বিগত বিধান সভা নিৰ্বাচনত প্ৰয়াত বিধায়ক মাজেন্দ্ৰ নাৰ্জাৰীৰ হাতত ১০,৩৪৩ ভোটৰ ব্যৱধানত পৰাজিত হয়।
ৰাজ্যৰ লগতে বিটিচিতো ইউপিপিএল-বিজেপিৰ মিত্ৰজোঁটৰ চৰকাৰ যদিও এতিয়ালৈ সম্পূৰ্ণৰূপে স্পস্থ হোৱা নাই যে এই মিত্ৰজোঁটে অকলশৰীয়াকৈ অৱতীৰ্ণ হব নে মিত্ৰতাৰে! তথাপিও বিজেপিৰ প্ৰাৰ্থীত্বৰ দৌৰত আছে কেইবাজনো নেতা। সমাজ কৰ্মী তথা একনিষ্ঠ বিজেপি নেতা জেঠমল মালো, বিগত বিধান সভা নিৰ্বাচনত বিজেপিৰ প্ৰাৰ্থী উইলিয়াম নাৰ্জাৰী, শ্ৰীৰামপুৰ পৰিষদীয় সমষ্টিৰ পাৰিষদ তথা বিশেষ সমাজ সেৱক সজল কুমাৰ সিংহ, কোকৰাঝাৰ জিলা বিজেপিৰ সাধাৰণ সম্পাদক দেৱৰাজ পাল, জিলা কাৰ্যনিৰ্বাহক তথা আদিবাসী সমাজৰ বৰ্ষীয়ান নেতা শ্যাম সুন্দৰ মাৰাণ্ডি আদি অন্যতম।কোকৰাঝাৰ লোকসভা সমষ্টিৰ সাংসদ নৱ কুমাৰ শৰণীয়াই জানিব দিয়া মতে, গণ সুৰক্ষা পাৰ্টীয়ে যৌথভাৱে নিৰ্বাচনত অৱতীৰ্ণ হোৱাৰ পোষকতা কৰে। যদি যৌথভাৱে নিৰ্বাচন সম্ভৱ নহয়, তেনেহলে গণ সুৰক্ষা পাৰ্টীয়ে গোসাঁইগাঁও আৰু তামুলপুৰত প্ৰাৰ্থীত্ব আগবঢ়োৱা নিশ্চিত যদিও এতিয়ালৈ প্ৰাৰ্থীৰ নাম ঘোষণা কৰা নাই।
কংগ্ৰেছ দলেও সমষ্টিটো নিজৰ অধীনত নিবলৈ আপ্রাণ চেষ্টা কৰা পৰিলক্ষিত হৈছে। প্ৰদেশ কংগ্ৰেছৰ সভাপতি ভূপেন বৰাই এই ক্ষেত্ৰত অধিক তৎপৰ হোৱা সামাজিক মাধ্যম যোগে দৃষ্টিগোচৰ হৈছে। কংগ্ৰেছ দলৰ প্ৰাৰ্থীত্বৰ দৌৰত আছে কোকৰাঝাৰ জিলা মহিলা কংগ্ৰেছৰ সভাপতি হেলেন মুৰ্মু, বি টি চি কংগ্ৰেছ সমন্বয়ক সমিতিৰ সদস্য তথা ধৰ্মগুৰু জুৱেল টুডু, মেংগত টুডু, কোকৰাঝাৰ জিলা কংগ্ৰেছৰ সভাপতি তথা গুমা পৰিষদীয় সমষ্টিৰ প্ৰাক্তন পাৰিষদ মমিনুৰ ইছলাম অন্যতম। যদি কংগ্ৰেছৰ ৰণ কৌশল সঠিকভাৱে অৱলম্বন কৰা হয়, তেনেহলে হেলেন মুৰ্মু নতুবা জুৱেল টুডুৰ বিজয়ৰ সম্ভাৱনা নথকা নহয়!
কিন্তু পোন্ধৰ বছৰকাল বি টি চি শাসন কৰা দল বিপিএফৰ এতিয়ালৈকে কেৱল এজন প্ৰাৰ্থীৰ নাম চৰ্চাত আছে। গোসাঁইগাঁও পৌৰ সভাৰ প্ৰাক্তন সভাপতি ধ্ৰুৱ কুমাৰ ব্ৰহ্ম নাৰ্জাৰী।ইফালে ইউ ডি এফৰ গোসাঁইগাঁও জিলা সমিতিৰ কাৰ্যকৰী সভাপতি খাইৰুল আনাম খন্দকাৰৰ নাম একমাত্ৰ প্ৰাৰ্থী হিচাপে শুনা গৈছে যদিও দলৰ শীৰ্ষ নেতৃত্বক মেনেজ কৰি বিজনীৰ প্ৰাক্তন বিধায়ক কমল সিংহ নাৰ্জাৰী ইউ ডি এফ দলৰ প্ৰাৰ্থী হোৱাৰ পূৰ্ণ সম্ভাৱনা আছে।আনফালে বিগত কিছুদিনৰ পৰা অসমত খোপনি পুতিবলৈ চেষ্টা কৰা তৃণমূল কংগ্ৰেছৰ তালিকাত আছে প্ৰফুল্ল কুমাৰ মহন্ত চৰকাৰৰ প্ৰাক্তন মন্ত্ৰী ৰাজেন্দ্ৰ মুছাহাৰী, তৃণমূল কংগ্ৰেছৰ ৰাজ্যিক সমিতিৰ সাধাৰণ সম্পাদক বিপ্লৱ চক্ৰৱৰ্তী আৰু ৰনেন্দ্ৰ কোঁচৰ নাম উচ্চাৰণ হৈছে।কিন্তু প্ৰয়াত বিধায়ক মাজেন্দ্ৰ নাৰ্জাৰীৰ উত্তৰসূৰী কোন হ’ব, সেইয়া ডাঙৰ প্ৰশ্ন!
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
