পৰিৱৰ্তনকাংক্ষী ৰাজ্য চৰকাৰে এইবাৰ আনিলে ভয়ংকৰ পৰিৱৰ্তন। ৰাজ্যৰ কৃষকক ভয়ানক পৰিস্থিতিৰ মাজলৈ ঠেলি দিয়াৰ ষড়যন্ত্ৰত লিপ্ত হ’ল তথাকথিত ৰাইজৰ চৰকাৰ। ৰাজ্যৰ কৃষিভূমিত এতিয়াৰে পৰা উদ্যোগ স্থাপনৰ বাবে উদ্যোগপতিয়ে কোনো বিভাগীয় অনুমতি লোৱাৰ প্ৰয়োজন নাথাকিব। ৰাজহ বিভাগৰ অনুমতি অবিহনে যিকোনো ভূমিত যিকোনো উদ্যোগ স্থাপন কৰিব পাৰিব বণিয়াই। অসম কেবিনেটত গ্ৰহণ হৈছে এই ভূমি নীতি। কেবিনেটৰ এই সিদ্ধান্তৰ পৰিপ্ৰেক্ষিতত গ্ৰামাঞ্চলৰ কৃষিভূমি বণিয়াই ক্ৰয় কৰি যিকোনো উদ্যোগ স্থাপন কৰাৰ বাট সুচল হ’ল। কৰ’নাৰ সংক্ৰমণে ভাঙি পেলোৱা অৰ্থনৈতিক পৰিকাঠামো পুনৰ গঠনৰ বাবে চিন্তা-চৰ্চা কৰাৰ উদ্দেশ্যে ৰাজ্য চৰকাৰে এখন কমিটী গঠন কৰি দিছিল। কিন্তু এই কমিটীয়ে দাখিল কৰা প্ৰতিবেদনক গুৰুত্ব নিদিলে চৰকাৰখনে। কমিটীয়ে কৃষিভিত্তিক উদ্যোগ স্থাপনৰ ওপৰত গুৰুত্ব আৰোপ কৰিছিল। কিন্তু তথাকথিত জনপ্ৰিয় ৰাজ্য চৰকাৰে কমিটীৰ পৰামৰ্শক গুৰুত্ব নিদি কৃষিভূমিসমূহ বণিয়াৰ হাতত তুলি দিয়াৰ ক্ষেত্ৰতহে আগভাগ ল’লে। মুখ্যমন্ত্ৰী সৰ্বানন্দ সোণোৱালৰ কেবিনেটে গ্ৰহণ কৰা সিদ্ধান্তৰ পৰিণতিত এতিয়া গ্ৰামাঞ্চলৰ কৃষিভূমি সহজেই বণিয়াৰ হাতলৈ যোৱাৰ বাট মুকলি হ’ল। তেওঁলোকে নিজৰ মন-মৰ্জি মতে স্থাপন কৰিব পাৰিব উদ্যোগ। গাঁৱৰ সৰল কৃষকক খমখমীয়া নোটৰ প্ৰলোভন দি ভূমি হস্তগত কৰিবলৈ একাংশ বণিয়া শীঘ্ৰেই জঁপিয়াই পৰাৰ শংকা এই সিদ্ধান্তই প্ৰবল কৰি তুলিলে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
