ভিটামিনৰ ওপৰিও আমাৰ শৰীৰে সঠিকভাৱে কাম কৰাৰ বাবে খনিজ পদাৰ্থও অপৰিহাৰ্য৷ সেইসমূহৰ মাজত ছডিয়ামৰ সকলোতকৈ গুৰুত্বপূৰ্ণ বুলিলেও অত্যুক্তি নহয়৷ সাধাৰণতে যি নিমখ খোৱা হয় তাৰপৰাই শৰীৰত ছডিয়ামৰ ঘাটি পূৰণ হয়৷ শৰীৰত পানীৰ ভাৰসাম্য বজায় ৰখা, স্নায়ুৱে সংকেত পঠিওৱা আৰু পেশীৰ সঠিক কাৰ্যকাৰিতাৰ দৰে গুৰুত্বপূৰ্ণ কামসমূহ ছডিয়ামে পালন কৰে৷
কিন্তু যেতিয়া এই ছডিয়ামৰ মাত্ৰা কমি যায়, তেতিয়াই সমস্যা আৰম্ভ হয়৷ চিকিৎসা বিজ্ঞানৰ ভাষাত শৰীৰৰ এই অৱস্থাক হাইপোনেট্ৰেমিয়া বুলি কোৱা হয়৷ যদিও ইয়াক এক সৰু সমস্যা বুলি বহুতে ধৰে কিন্তু সঠিক সময়ত চিনাক্ত নকৰিলে ই বিপজ্জনক হৈ উঠিব পাৰে৷
ছডিয়াম কমি যোৱাৰ বহু কাৰণ আছে৷ বিশেষকৈ গ্ৰীষ্মকালত অতিৰিক্ত ঘামৰ কাৰণে শৰীৰৰ পৰা ছডিয়াম বাহিৰ হয়৷ ইয়াৰোপৰি বমি, ডায়েৰিয়া, পানী কমকৈ খোৱা, কিছু নিৰ্দিষ্ট ঔষধ খোৱাৰ কাৰণেই ছডিয়ামৰ মাত্ৰা কমি যাব পাৰে৷ বহুতে সুস্থ থকাৰ উদ্দেশ্যে বেছি পানী পান কৰে, কিন্তু কিছু ক্ষেত্ৰত সেয়াও ক্ষতিকৰ হ’ব পাৰে৷
শৰীৰত ছডিয়ামৰ মাত্ৰা কমি গ’লে কিছু লক্ষণ প্ৰকাশ পায়৷ মূৰৰ বিষ, দুৰ্বলতা, মূৰ ঘূৰোৱা, বমিৰ দৰে লক্ষণে দেখা দিব পাৰে৷ অৱস্থা গুৰুতৰ হ’লে বিভ্ৰান্তি, পেশীত টান, অজ্ঞান হৈ যোৱা আদি লক্ষণে দেখা দিব পাৰেষ কাৰোবাৰ কাৰোবাৰ হৃদস্পন্দনো অনিয়মিত হ’ব পাৰে৷
বিশেষজ্ঞই কৈছে, ছডিয়ামৰ অভাৱ চিধাকৈ হাৰ্ট এটেকৰ কাৰণ নহ’লেও ই হৃদস্পন্দনৰ ছন্দক প্রভাৱিত কৰিব পাৰে আৰু অন্যান্য সমস্যাৰ সৃষ্টি কৰিব পাৰে৷ এই সমস্যা এৰাই চলিবলৈ সুষম খাদ্যগ্ৰহণ কৰাটো অত্যন্ত গুৰুত্বপূৰ্ণ৷ শৰীৰত পানী আৰু ইলেক্ট্ৰলাইটৰ ভাৰসাম্য বজায় ৰখা উচিত৷
গ্ৰীষ্মকালত বেছি ঘাম ওলালে অআৰএছ, ডাবৰ পানী আৰু নেমুৰ ৰসৰ দৰে পানীয় পান কৰাটো ভাল৷ অৱশ্যে পানীও পৰিমিত পৰিমাণে পান কৰা উচিত৷ প্ৰয়োজনতকৈ বেছি পানী পান কৰিলে ছডিয়ামৰ মাত্ৰা অত্যধিক বাঢ়ি যোৱাৰ আশংকা আছে৷
ছডিয়ামৰ অভাৱ কিন্তু কোনো সৰু বিষয় নহয়৷ যদি আপুনি এই ধৰণৰ লক্ষণ অনুভৱ কৰে তেতিয়া অবিলম্বে চিকিৎসকৰ পৰামৰ্শ লোৱাটো ভাল৷ সঠিক খাদ্যভাষ আৰু জীৱনধাৰা অনুসৰণ কৰি এই সমস্যাটো সহজেই প্ৰতিৰোধ কৰিব পাৰি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
