অসম লাইভ২৪ঃ টাইটানিকত কণ্ট নিগৰোৱা জনপ্ৰিয় কণ্ঠশিল্পী ছেলিন ডিয়ন অসুস্থ। বিৰল স্নায়ুৰোগত আক্ৰান্ত হৈছে প্ৰখ্যাত কণ্ঠশিল্পী ছেলিন। নিজেই সামাজিক মাধ্যমযোগে এই কথা জনাইছে কণ্ঠশিল্পীগৰাকীয়ে। বহুকেইখন লাইব কনছাৰ্ট বাতিল কৰাৰ কথাও সামাজিক মাধ্যমযোগে ঘোষণা কৰিছে কণ্ঠশিল্পীগৰাকীয়ে।
‘মাই হার্ট উইল গো অন…’, ‘টাইটানিক’ ছবিত এই গীত পৰিবেশন কৰিয়েই জনপ্ৰিয় হৈ পৰা ছেলিন আক্ৰান্ত হৈছে স্নায়ুৰোগত। বৰ্তমানলৈ প্ৰায় ২৫০ টাতকৈও অধিক আন্তৰ্জাতিক পুৰস্কাৰ লাভ কৰিছে ছেলিনে। উল্লেখ্য যে এই বঁটাৰ মাজতেই তেওঁ লাভ কৰিছে পাঁচবাৰকৈ বিশ্ববিখ্যাত গ্ৰেমী বঁটাও। সামাজিক মাধ্যমত ৰোগক লৈ কৰা পষ্টত কণ্ঠশিল্পীগৰাকীয়ে লিখিছে, ‘ষ্টিফ পাৰ্ছন ছিনড্ৰোম’, নামৰ এক স্নায়ুৰোগত তেওঁ আক্ৰান্ত হৈছে।
উল্লেখ্য যে বহুদিন ধৰি এই ৰোগত আক্ৰান্ত হৈ আছে ছেলিন। বহুদিন ধৰি চিকিৎসকৰ পৰামৰ্শ গ্ৰহণ কৰি আছিল ছেলিনে। কিন্তু অনুৰাগীৰ পৰা গোপনে ৰাখিছিল সকলো কথা। কিন্তু হঠাতেই কনছাৰ্ট বাতিল কৰিব লগা হোৱাৰ বাবে সকলো কথা প্ৰকাশ কৰিবলৈ বাধ্য হৈ পৰে ছেলিন।
৫৪ বছৰীয়া তাৰকাগৰাকীয়ে জনোৱা অনুসৰি এই ৰোগ স্নায়ুজনিত। এইটো অট ইমিউন ডিজিছ। যিয়ে স্নায়ুক প্ৰভাৱিত কৰে। ফলত পেশীৰ বিষ হ’বলৈ আৰম্ভ কৰিছিল। বিষৰ বাবেই ছেলিনে চলাফুৰাত সমস্যা পাইছে। এই ৰোগৰ নিৰ্দিষ্ট কোনো ঔষধ নাই। সেয়ে চিকিৎসকে দিয়া উপায় গ্ৰহণ কৰি কিছু সুস্থ হৈ থকাই একমাত্ৰ বিকল্প বুলি জনাইছে জনপ্ৰিয় কণ্ঠশিল্পীগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
