অসম লাইভ২৪ঃ চিগাৰেট স্বাস্থ্যৰ পক্ষে ক্ষতিকাৰক৷ চিগাৰেটৰ বিজ্ঞাপনতেই স্বাস্থ্যৰ বাবে হানিকাৰক লিখা থাকে এনে নহয়৷ চিগাৰেটৰ পেকেটতো তুলি লওঁতে নিশ্চয় আপোনাৰো দৃষ্টিগোচৰ হয় এই কথা৷ চিগাৰেটৰ পেকেটতেই লিখা থাকে ‘ধূমপান স্বাস্থ্যৰ বাবে ক্ষতিকাৰক৷’
স্বাস্থ্যৰ বাবে হানিকাৰক হ’লেও চিগাৰেটে বিক্ৰিৰ ক্ষেত্ৰত অভিলেখ গঢ়িছে ভাৰতত৷ চিগাৰেটৰ ব্যৱসায় অত্যন্ত লাভজনক ব্যৱসায় বুলি সমীক্ষাইয়ো দাবী কৰে৷ শেহতীয়াকৈ প্ৰকাশ হোৱা বাণিজ্যিক সমীক্ষাত, চিগাৰেট প্ৰস্তুতকাৰী সংস্থা ITC য়ে ২০২২ বৰ্ষত সৰ্বাধিক ব্যৱসায়িক লাভালাভ অৰ্জন কৰা কোম্পানী হিচাপে পৰিচিত হৈছে৷ নিফটি ৫০ সূচকৰ অন্তৰ্গত এই ষ্টকে বিকাশৰ ক্ষেত্ৰত অন্যন্য নিদৰ্শন দাঙি ধৰিছে। বিগত বৰ্ষৰ ১৩ ডিচেম্বৰৰ পৰা চলিত বৰ্ষৰ ১৩ ডিচেম্বৰলৈ এই ষ্টকৰ বিকাশৰ হাৰ বৃদ্ধি হৈ হৈছেগৈ ৫৮ শতাংশ।
আনহাতে বিগত বছৰত নিফটি ৫০ আৰু ছেনচেক্স বৃদ্ধিৰ হাৰ প্ৰায় ৫.৫ শতাংশ। আকৌ, সেই সময়ছোৱাত বহল সূচক যেনে মিড-কেপ আৰু স্মল-কেপ সূচকৰ বিকাশৰ হাৰ আছিল মাত্ৰ ৩ শতাংশ। চিগাৰেট প্ৰস্তুতকাৰী সংস্থাই, চিগাৰেটৰ মূল্য বৃদ্ধি হোৱাৰ পিছতো কৰ-অনুকূল পৰিস্থিতিৰ বাবে ITC-এ চাহিদা বজাই ৰাখিবলৈ সক্ষম হৈছে। এই ধাৰাটো আহিবলগীয়া দিনতো অব্যাহত থাকিব বুলি জনাইছে সংস্থাটোৱে। আন এগৰাকী বিশেষজ্ঞৰ মতে, চলিত বছৰত মাৰ্কেটত বহু উঠা নমা আছে যদিও ITC বছৰটোৰ আৰম্ভণিৰ পৰা ক্ৰমান্বয়ে ভাল প্ৰদৰ্শন দিয়া আৰম্ভ কৰিছিল। তেতিয়াৰে পৰা আৰু গ্ৰাফডাল বাঢ়িয়েই আছে। কেৱল চিগাৰেটেই নহয়, এফএমচিজি, কৃষি, হোটেলৰ ক্ষেত্ৰতো এই কোম্পানীটোৱে যথেষ্ট লাভালাভ অৰ্জন কৰিছে।
উল্লেখ্য যে, সমীক্ষাই জনোৱামতে ভাৰতত ধূমপানকাৰীৰ সংখ্যা দৈনিক বৃদ্ধি পাইছে। ভাৰতৰ একোজন ধূমপানকাৰীয়ে দৈনিক ৮.১ হাৰত চিগাৰেট সেৱন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
