প্ৰেমৰ চহৰত হিংসাৰ দাৱানল! বিশ্ববিখ্যাত মনালিছাৰ সেই ৰহস্যময় ছবিৰ ওপৰত কিয় ঢালি দিলে হালধীয়া পদাৰ্থ?

অসম লাইভ২৪ঃ কম মজুৰিসহ বেছ কিছু সমস্যাৰ বিৰুদ্ধে ফ্ৰান্সজুৰি চলিছে কৃষক বিক্ষোভ৷ তাৰমাজতেই দেওবাৰে মনালিছাৰ ওপৰতো চলিল আক্ৰমণ৷ ১৫০৩ চনত লিঅ’নাৰ্ডো দ্যা ভিঞ্চিয়ে অঁকা এই বিশ্ববিখ্যাত ৰহস্যময় ছবিখনৰ ওপৰতেই এইবাৰ চলিছে আক্ৰমণ৷ পেৰিছৰ বিখ্যাত ল্যুভৰ মিউজিয়ামত সংৰক্ষিত হৈ আছে ইটালীৰ ৰেনেছাঁৰ এই বিশেষ চিত্ৰ৷ তাতেই এটা কাঁচৰ বাকচত সোমোৱাই থোৱা হৈছে এই ছবিখন৷

সামাজিক মাধ্যমত ভাইৰেল হৈছে এটা বিশেষ ভিডিঅ’৷ তাতেই একাংশ প্ৰতিবাদকাৰীয়ে কাঁচৰ ভিতৰত বন্দি মনালিছাৰ মুখলৈ মাৰি পঠিয়াইছে চছ৷ পেইণ্টিঙৰ সন্মুখত নিৰাপত্তাবেষ্টনীও আছে৷ সেই বেষ্টনী ভাঙি গৈ মনালিছাৰ চিত্ৰ বন্দি হৈ থকা কাঁচৰ বক্সৰ ওপৰত ঢালি দিছে হালধীয়া বিশেষ পদাৰ্থ৷ সেই পদাৰ্থ ঢালি ঢালিয়েই শ্লোগানো দিছে ব্যক্তিজনে৷ ব্যক্তিজনে চিঞৰিছে, ‘সকলোতকৈ গুৰুত্বপূৰ্ণ কি? শিল্পকৰ্ম নে স্বাস্থ্যকৰ খাদ্য? খাদ্যৰ অধিকাৰ আমাৰ নাই নেকি? আমাৰ কৃষি ব্যৱস্থা একেবাৰেই অসুস্থ হৈ পৰিছে৷ পথাৰত কাম কৰি কৰিয়েই কৃষক মৰি গৈছে৷’

https://x.com/riposte_alim/status/1751554609720471872?s=20

এই ঘটনাৰ পাছতেই তাত কৰ্মৰত এজন কৰ্মচাৰীয়ে ছবিখন ক’লা কাপোৰেৰে ঢাকি পেলায়৷ উপস্থিত সকলো দৰ্শককে এই স্থানৰ পৰা ওলাই যাবলৈকো নিৰ্দেশ দিয়া হয়৷ ঘটনাৰ পাছতেই তাৎক্ষণিকভাৱে সেই স্থানত উপস্থিত হৈ পেৰিছ আৰক্ষীয়ে দুজন প্ৰতিবাদকাৰীক গ্ৰেপ্তাৰ কৰিছে৷ প্ৰতিবাদকাৰীৰ টি-ছাৰ্টত লিখা আছে ‘ফুড ৰিপোষ্ট’৷ ‘ফুড ৰিপোষ্ট’ ফ্ৰান্সৰ জলবায়ুৰ ওপৰত কাম কৰি থকা এটা বিশেষ বেচৰকাৰী সংস্থা৷ ফুড ৰিপোষ্টৰ ৱেবচাইটত লিখা আছে, ‘জলবায়ু প্ৰতিশ্ৰুতি ভংগ কৰিছে ফৰাচী চৰকাৰে৷ কৃষকক পৰ্যাপ্ত আয় প্ৰদানৰ ওপৰিও, তেওঁলোকে যাতে স্বাস্থ্যকৰ খাদ্য খাবলৈ পায় তাৰবাবে স্বাস্থ্য পৰিসেৱা ব্যৱস্থাৰ দৰে ঠায়ে ঠায়ে খাদ্য বণ্টনৰ ব্যৱস্থাও আৰম্ভ কৰিব লাগে৷ এয়াই আমাৰ দাবী৷’

উল্লেখ্য যে, ফ্ৰান্সৰ ক্ষুদ্ধ কৃষকসকলে বৰ্তমান ফ্ৰান্সৰ বিভিন্ন স্থানত ট্ৰেক্টৰেৰে ৰাস্তা অৱৰোধ কৰি বিক্ষোভ কৰিছে৷ প্ৰতিবাদৰ অংশ হিচাপে চৰকাৰী অফিচৰ দুৱাৰে দুৱাৰে দুৰ্গন্ধময় কৃষিৰ বৰ্জিত পদাৰ্থ পেলাই দিয়া হৈছে৷ তেওঁলোকৰ এটাই দাবী, পণ্যৰ উচিত মূল্য লাগে৷ কৃষকে যাতে কৃষি বিষয়ক স্কিমৰ বাবে চৰকাৰী কাৰ্যালয়ৰ দুৱাৰে দুৱাৰে ঘুৰি ফুৰিব নালাগে তাৰবাবেও বিশেষ ব্যৱস্থা গঢ়ি তোলক৷ অৰ্থাৎ চমুকৈ চৰকাৰী প্ৰক্ৰিয়াৰ সৰলীকৰণ৷ ইয়াৰোপৰি ফৰাছী কৃষকৰ দাবী যে, বিদেশৰ পৰা কৃষিজ পণ্য আমদানীত চৰকাৰী সুৰক্ষা প্ৰদান কৰিব লাগিব চৰকাৰে৷ শুকুৰবাৰে ফৰাছী চৰকাৰে একাধিক পদক্ষেপ লোৱাৰ কথা ঘোষণাও কৰিছিল৷ কিন্তু চৰকাৰ আঁচনিত মুঠেও সন্তুষ্ট নহয় কৃষকসকল৷ সোমবাৰৰ পৰা ৰাজধানী পেৰিচৰ ৰাস্তাঘাট অৱৰোধ কৰাৰো হুংকাৰ দিছে এইবাৰ প্ৰতিবাদী কৃষকে৷

(সামাজিক মাধ্যমত ভাইৰেল এই ভিডিঅ’ৰ সত্যতা সম্পৰ্কে অসম লাইভ কতৃপক্ষই কোনো সত্যতা বিচাৰ কৰা নাই, ভাইৰেল ভিডিঅ’টোত দেখা অনুসৰিয়েই এই বাতৰি প্ৰস্তুত কৰা হৈছে৷)

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ